2 Samuel 17 - Uwumbɔr aagbaŋ

Husai aah ŋmann Absalom pu na

¹ Naa yunn, le Ahitofel bui Absalom ke, “Cha ti nyan bijab ŋichur kipiik ni ŋilee, aan m paan David pu kinyeek kee.

² Buyoonn u ti bak aan utaakpab yɔl na, le m ga ti tak u. Ijawaan ga chuu u, le waajab mɔmɔk ga san cha u. Ubɔr baanja le m ga ku,

³ le ki giin waajab mɔmɔk nan tii si, ke ubɔndinn aah gir cha uchal chee pu na. Aa ban unibaan baanja le aa ku, bi gur na ma ga li kpa limɔfal.”

⁴ Nimina nan naahn nsurm mu ŋan na le ki tii Absalom ni Israel aayidam mɔmɔk.

⁵ Le Absalom bui ke, “Tɔ, yin ni man Husai, aan m nan ŋun u mu aah ga len pu na.”

⁶ Husai aah fuu ni na, le Absalom bui u ke, “Ahitofel aah tii timi nsurm mu na sɔ; ti dii mu uu? Mu yaa kaa ŋan kan, bui timi taah ga ŋa pu na.”

⁷ Le Husai kii u ke, “Ahitofel aasurm mumina ma aa ŋan.

⁸ Aa nyi ke aate David ni waajab ye bijab bi kpa lipobil na la, ki ki nyi ke bi bir ke baah chuu kipeewanbiik ki aabo na la. Aate ye uja u nyi butɔb aabɔr na la, le waa doo waajab chee kinyeek.

⁹ Libuul lee ni kina u bɔr kitakpaluŋ kibaa ni, bee u bi nibaa chee. Unii umɔk ŋun ke David tak saajab na kan, u ga kpaan bui ke u nyaŋ saajab a.

¹⁰ Israel yaab mɔmɔk nyi ke David ye ujakpaan, le waajab mu kpa lipobil, nima pu le uja umɔk kaar kaa san nibaa ke uchinn na, ga san ijawaan.

¹¹ Maasurm le ye ke aa kuun ni Israel aanib mɔmɔk Israel aatiŋ kee pu nan kpaan. Bi li wiir ke litambol li bi nnyusakpem aagbaan na, le sin aabaa di bi buen butɔb.

¹² David yaa bi nimɔk na kan, ti ga kan u ki tak u waahr aan u nin ŋun taah bi ŋani pu na. U ni waajab mɔmɔk ni, ubaa aan ŋmar.

¹³ U yaa san koo kitiŋ kibaa ponn ni kan, timi aajab ga ban iŋmin ki nan dar kitiŋ ngbaan ti lii kifataŋ taab, litakpal libaa aan gur lijool ngbaan paab.”

¹⁴ Le Absalom ni Israel yaab mɔmɔk bui ke, “Husai aasurm ŋan jer Ahitofel aasurm.” Uwumbɔr le nan siin ke bi taa kii Ahitofel aasurm, aan tibɔbir dan Absalom pu.

Baah nyaa David aan u san ŋmar pu na

¹⁵ Le Husai bui bitotoorb Sadok ni Abiatar waah tii Absalom ni Israel aayidam nsurm mu na, ni Ahitofel mu aah tii mu na.

¹⁶ Le Husai ki bui bi ke, “Tɔ, ŋa mala. Tun ti tuk David ke u taa doon kipɔɔk ni, baah puur limɔɔl nin chee na kinyeek kee; u puur Jɔɔdann aamɔɔl mala, aan bi taa pii u ni waajab ki ku bi mɔmɔk.”

¹⁷ Abiatar aajapɔɔn Jonatann ni Sadok aajapɔɔn Ahimaas nan bi Enn Rogel aayayak aanyunbun na chee, Jerusalem aanambokon ni, le ki kii; baa ban ke unii ubaa kan bi koo ni Jerusalem ponn ni. Unaagbiipiibo ubaa le nan chaa ti tuk bi naah bi pu na, le bi mu buen ti bui Ubɔr David.

¹⁸ Tɔ, daalbaadaal le unachipɔnbo ubaa nan kan bi, le ki buen ti tuk Absalom; le bi san mala ti bɔr Bahurim aaja ubaa do. Uja ngbaan nan kpa nnyunbun mubaa udo chee, le bi koo mu ni.

¹⁹ Uja ngbaan aapuu nan ban liwanbiil le ki di biin nnyunbun ngbaan aamɔb pu, le ki di njikaabim den liwanbiil ngbaan pu, ke ubaa taa li nyi ke nibaa bi nima.

²⁰ Absalom aajab nan dan lidichal ngbaan ni le ki nan baa upii ngbaan ke, “Ahimaas ni Jonatann bi la chee?” Le u bui bi ke, “Bi puur Jɔɔdann aamɔɔl a.” Bijab ngbaan nan ban bi, le kaa kan bi, le ki gir kun Jerusalem ni.

²¹ Baah buen na, le Ahimaas ni Jonatann nin nyan ni ki buen ti tuk Ubɔr David, Husai aah naŋ bi pu na. Bi nan bui u Ahitofel aah kpokl u pu pu na, le ki bui ke, “Ŋa mala ki puur limɔɔl ngbaan man.”

²² Kina pu le David ni waajab piin ki bi puur Jɔɔdann aamɔɔl, le kitaak aah ti woln na, bi mɔmɔk puur a.

²³ Ahitofel aah kan ke bi yii waasurm na, le u diŋ waabon pu ki gir kun udo aatiŋ ni. Waah ti gor waatuln doo na, le u leen ubaa ŋŋmin ki ku ubaa. Bi nan sub u baadichal aacheek ni la.

²⁴ Buyoonn Absalom ni Israel yaab ti puur Jɔɔdann aamɔɔl na, David ni waajab nan fuu Mahanaim aatiŋ ni.

²⁵ Absalom nan di Amasa le ŋa waajab aaninkpel, Joab aabuul ni. Amasa aate le nan ye Israel aanii u bi yin u ke Jeter na; le una mu ye Nahas aabisal Abigail, u aakpel nan ye Joab aana Seruya na.

²⁶ Absalom ni waajab nan ti kuun kal Gilead aatiŋ pu la.

²⁷ David aah nan ti fuu Mahanaim aatiŋ ni na, le Sobi u aate ye Nahas u nyan ni Raba aatiŋ ki bi Amonn ni na, ni Makir u aate ye Amiel u nyan ni Lodebar aatiŋ ni na, ni Basilai u nyan ni Rogelim aatiŋ ki bi Gilead aatiŋ pu na nan tooh u nsan pu.

^28-29 Bi nan joo ni ŋisambil, ni ŋibuu, ni tiwandookaan, ni tijikaar mu nan tii David ni waajab: njikaabim, ni baah ken mu na mu, ni n‑yon, ni ŋisin, ni simaa, ni tisiir, ni wangaasi, ni nnaabiinkpan, ni tiwakor mu. Bi nan nyi ke nkon ni nnyunyuu ga li joo David ni waajab nteersakpiin ngbaan ni, lisachuln ngbaan mu tii bi tibakr pam.