2 Samuel 16 - Uwumbɔr aagbaŋ

Ubɔr David ni Siba aabɔr

¹ David aah sunn lijool ngbaan siib na, le u kpaan kan Mefibosef aatutunn Siba nsan ni. U nan joo ibon i tu ŋiboroboro kpin ikui ilee na, ni ndaan aasubil ŋi kuur na aabon nkub, ni ŋisubil ŋi soon na mu aabon nkub, ni ndaan aalook ki gbii ndaan na.

² Le ubɔr David baa u ke, “Aa ban aa ŋa nimina mɔmɔk ba?” Le Siba gar u ke, “Mpɔɔndaan, saadichal yeh ibon ngbaan bi li diŋni i pu, le saajab mu ga ŋmaa ŋmɔ boroboro ki moo ŋisubil na mu, le bi yaa ti bak nteersakpiin ngbaan ni kan, bi ga ŋmaa di ndaan ngbaan mu nyu.”

³ Le ubɔr David baa u ke, “Sɔɔl aayaabil Mefibosef bi la chee?” Le Siba bui u ke, “U bi Jerusalem ni; ba pu? u kpa gaakii ke Israel yaab ga giin u nan kaan uyaaja Sɔɔl aanaan ni.”

⁴ Le ubɔr David bui Siba ke, “Mefibosef aah kpa tiwan nimɔk na ŋa sin yaan la.” Le Siba kii ke, “M ye saatutunn la. Mpɔɔndaan, cha m li piir aasui n‑yoonn mɔmɔk.”

Ubɔr David ni Simei aabɔr

⁵ Ubɔr David aah ti fuu Bahurim na, le Gera aajapɔɔn Simei, u ye Sɔɔl aamaal aanii na keln u nima, ki puuni lir u pu ki choo.

⁶ David aaninkpiib, ni waakikiib, ni waajab nan mann gob u la, le Simei piin ki mae bi ŋitakpal.

⁷ Simei nan puun lii u pu, le ki bui ke, “Nya do. Nya do. Unikur umina. Titunwanbirdaan umina.

⁸ Aa nan gaa Sɔɔl aanaan, le dandana Uwumbɔr bi dar aatafal, saah ku Sɔɔl aanib sakpen pu na pu. Uwumbɔr di nnaan ngbaan tii aajapɔɔn Absalom, le saamɔfal kuln, sin unikur wee.”

⁹ Le Seruya aajapɔɔn Abisai bui ubɔr David ke, “Mpɔɔndaan, ba ŋa aa cha ubɔ ngbaan bi puuni lir aa pu? Cha m buen nima ki ti gii uyil.”

¹⁰ Le ubɔr ngbaan bui Abisai, ni ukpel Joab ke, “Nimina aa ye nimi aabɔr. Uwumbɔr le yaa bui u ke u li puuni lir m pu kan, ŋma kpa nsan ke u baa u waah ŋani pu na?”

¹¹ Le David ki bui Abisai ni waajab aaninkpiib bi gur na mɔmɔk ke, “Min mbaa aajapɔɔn le bi ban ke u ku mi na, kina pu na, ni ga ŋa kinye ki li kpa iwaan ke Benjaminn aamaal aanii li seei mi? Uwumbɔr le bui u ke u li puuni lir m pu; kina pu na, di cha u man, ki cha u li ŋani.

¹² Nibaakan Uwumbɔr ga kan maanimbaak, ki tii mi tinyoor tibaa aan ti gaa waapuun ngbaan aabuul ni.”

¹³ Le David ni waajab beenin chuun cha. Simei mu nan beenin dii bi, ki chuun kpak lijool ngbaan; u nan puuni le ki mae bi ŋitakpal ni titan.

¹⁴ Ubɔr David ni waajab mɔmɔk aah nan ti fuu Jɔɔdann aamɔɔl ni na, bi nan bak, le ki kal bi fuur.

Absalom aah bi Jerusalem ni pu na

¹⁵ Absalom ni Israel yaab bi mɔmɔk nan dii u na nan koo Jerusalem ni, le Ahitofel mu kpee bi pu.

¹⁶ David aajɔnyaan Husai aah ton Absalom nsan ni na, le u teen ke, “Ubɔr li kpa limɔfafɔfɔŋ. Ubɔr li kpa limɔfafɔfɔŋ.”

¹⁷ Le Absalom baa u ke, “Saa ki kpa ubɔr aapak tii aajɔ David la aa? Ba ŋa saa dii u buen?”

¹⁸ Le Husai gar u ke, “Maan dii kina. M dii unii u Uwumbɔr, ni binib bee, ni Israel yaab mɔmɔk lee u ubɔr na la. M ga li bi aa chee la.

¹⁹ Ŋma ki ye aan m ga tun tii, kaa ye maaninkpel aajapɔɔn? Maah nan bi aate chee pu na, kina le m ga li ŋani aa mu.”

²⁰ Le Absalom fenn toŋ Ahitofel le ki baa u ke, “Tɔ, taah fuu ni do na, ba aasurm aa ga tii timi?”

²¹ Le Ahitofel gar u ke, “Buen ti doon aate aapuutiib waatiir bi gaar libɔrdichal ni na chee. Le Israel yaab mɔmɔk ga bee ke aa gur ye aate aadin la, le saadidiliib aataakpab ga pɔɔk.”

²² Kina pu le bi ŋa likekeln aabool, libɔrdichal aapaacham tii Absalom, le Absalom koo li ni ki ti doon ute aapuutiib waatiir ngbaan chee, binib mɔmɔk aanimbil ni.

²³ N‑yoonn ngbaan na, David ni Absalom mɔk nan gaar Ahitofel aasurm ke mu bi ke Uwumbɔr ubaa aabɔr na la.