2 Samuel 15 - Uwumbɔr aagbaŋ

Absalom aah nan ban isan ke u nya ute aapuwɔb pu na

¹ Nee aapuwɔb, le Absalom ban ubaa aataan aatɔroku, ni itaan, ki kpee bijab bi ga li dii u na piiŋmu.

² Kichakpiik mɔk ni kan, le u fii mala ki ti bi kitiŋ ngbaan aasan aabisamɔb chee. Unii umɔk yaa ti kpa tibɔr ki joo choo ubɔr chee ke bi nan len ti na kan, le Absalom ti yin u ki baa u ke u bee waah nyan nin chee na. Udaan yaa ti bui u waah nyan ni linibol li ponn ni na kan,

³ le Absalom ti bui u ke, “Lik, aa dii nkaal la, ubɔr aanii ubaa mu aa bi ki ga ŋun saabɔr tii si,”

⁴ le ki ki len ke, “M yaa ba ye ubɔlen kan, m ba nyi. Unii umɔk kpa tibɔr na ba ga dan m chee, le m nan tii u mbamɔn.”

⁵ Le udaan yaa ti foor duun u ke u gbaan ki doon u kan, le Absalom ŋa mala, ki chuu udaan, ki moor utakpiln.

⁶ Absalom nan ŋani Israel aanii umɔk nan dan ubɔr chee ki ban ibamɔn na kina la, le ki gaa bi chee ubɔr aapak.

⁷ Ŋibin ŋinaa aah jer na, le Absalom bui Ubɔr David ke, “Maaninkpel, tii mi nsan aan m buen Hebronn ki ti gbiin maah nan puu Uwumbɔr ke m ga ŋa pu na.

⁸ Maah nan bi Siria aatiŋ ki bi yin ki ke Gesur na, m nan puu tipuur tii Uwumbɔr ke u yaa ki di mi giin Jerusalem ponn ni kan, m ga li dooni u Hebronn ni la.”

⁹ Le ubɔr bui u ke, “Li cha ni nsuudoon.” Le Absalom buen Hebronn ni,

¹⁰ ki tee tun ituun buen Israel aanibol mɔmɔk chee ke, “Ni yaa nan ŋun ikpiin wii kan, ni teen ke, ‘Bi kaan Absalom nnaan Hebronn aatiŋ ni.’”

¹¹ Absalom aah nan chɔi bijab bi aan bi dii u buen ki nyan Jerusalem ni na nan ye bijab ikui ilee la; baa nan nyi waalandak aah ye pu na, le ki dii u ni ilandak nyaan.

¹² Waah nan ti bi toor kitork na, u nan tun Gilo aatiŋ ni bi ti li joo ni Ahitofel, u nan ye ubɔr David aasusur ubaa na. Absalom aalandak ngbaan nan moo kan mpɔɔn, le waadidiliib mu moo wiir.

David aah san nyan Jerusalem ni pu na

¹³ Ntuun mubaa nan ti bui David ke, “Israel yaab joo ubɔr aapak tii Absalom la.”

¹⁴ Kina pu le David bui waaninkpiib bi nan bi u chee Jerusalem ni na ke, “Ti yaa ban ti ŋmar Absalom chee kan, cha ti nya do man libuul lee ni. Mala man. Naa ye kina kan, u ga fuu ni do libuul lee ni, le ki nan nyaŋ ki ku ti mɔmɔk kitiŋ kee ni.”

¹⁵ Le bi kii ke, “Mbamɔn, Mpɔɔndaan, ti gor ke ti ŋa saah len pu na mɔmɔk.”

¹⁶ Le ubɔr, ni waadichal, ni waaninkpiib mɔmɔk nyan Jerusalem ni. Upuutiib waatiir kipiik bi u nan cha bi gaar ke bi li lik libɔrdichal na baanja le nan gur.

¹⁷ Ubɔr ni waajab aah nan ban bi nya kitiŋ ngbaan ni na, bi nan ti sil kookoo aadichal chee.

¹⁸ Waaninkpiib nan sil gbaŋ u, le ubɔr aakikiib lul jer unimbiin ni. Le bijab ikui iloob bi nan dii u nyan ni Gaf aatiŋ ni na mu jer,

¹⁹ le ubɔr bui Itai, u ye baayidaan na ke, “Ba ŋa aa dii timi ki cha? Gir ki ti li bi ubɔrpɔɔn ngbaan chee. Aa ye uwɔwɔnii la, le ki ye ukusann u san nyan ni saatiŋ ni na.

²⁰ Saa koo do ni yunn, kina pu na, naa ŋan ke aa li chuun dii timi ki yenni. Hali min mbaa aa nyi maah cha nin chee na. Di aanaabitiib gir, aan Uwumbɔr li kpa ni pu tiŋann mbamɔm.”

²¹ Le u gar u ke, “Mpɔɔndaan, m puu Uwumbɔr aayimbil pu ki tii si, ke m ga li dii si ki ti saa nimɔk aa cha na, hali ni yaa ye nkun kan, m ga dii si.”

²² Le David bui u ke, “Tɔ, ni ŋan. Li chuun.” Le Itai ni waajab ni baamaal mɔmɔk dii buen.

²³ David ni waadidiliib aah nan siir na, le kitiŋ ngbaan aanib mɔmɔk nan wii mpɔɔn pu. Ubɔr David nan ti puur Kidronn aabunbik na, le waajab dii u, le bi mɔmɔk di toŋ nteersakpiin ni.

²⁴ Utotoor Sadok, ni Liifai yaab bi nan tu Uwumbɔr Aakaal Aadakaa na nan bi nima. Bi nan tur u siin kitiŋ, kaa ki yoor u aan binib ngbaan mɔmɔk ti nyan kitiŋ ngbaan ni. Utotoor Abiatar mu nan bi nima.

²⁵ Le ubɔr David bui Sadok ke, “Yoor Uwumbɔr Aakaal Aadakaa ngbaan giin kitiŋ ponn ni. Uwumbɔr yaa lik ki faar mi kan, daalbaadaal u ga nan cha m ki dan, ki nan kan Dakaa ngbaan, ni nin chee u si na.

²⁶ Tɔ, u yaa kaa lik faar mi kan, cha u ŋa mi waah gee pu na,”

²⁷ le ki bui Sadok ke, “Saa ye Uwumbɔr aabɔnabr aa? Cha aajapɔɔn Ahimaas, ni Abiatar aajapɔɔn Jonatann li dii si cha kitiŋ ponn ni, ki li kpa nsuudoon.

²⁸ N‑yoonn mue na, m ga li kii si, baah puur limɔɔl nin chee kipɔɔk ni na, ki ti saa buyoonn aa ga tii ni mi lilambil na.”

²⁹ Kina pu le Sadok ni Abiatar yoor Uwumbɔr Aakaal Aadakaa gir Jerusalem ponn ni, ki ti koo nima.

³⁰ David nan bi joi Olif Aajool le ki wii. Waa nan tak ŋinaatak, le ki di tiwan biin uyil pu ki mɔk ke usui bii. Binib bi mɔmɔk nan dii u na mu nan di tiwan biin biyil pu, ki mu wii.

³¹ David aah ŋun ke Ahitofel ti kpee Absalom pu na, le u mee limeel ke, “Uwumbɔr, m gaŋ si ke aa kpeln Ahitofel aasurm mɔmɔk ŋa kijɔrk aaliin.”

³² David aah ti fuu lijool ngbaan paab, nin chee binib nan dooni Uwumbɔr na, le ujɔnyaan Husai, u nan ye Ak aanii na, ton u nsan ni, aan waawanpeenkaan mɔmɔk kar kar, le u di titan puŋ uyil.

³³ Le David bui u ke, “Aa yaa dii mi kan, saan ŋmaa ter mi.

³⁴ Aa yaa tee gir buen Jerusalem ponn ni, ki bui Absalom ke aa ga li tun tii u ki kii waamɔb, ke saah nan bi ute chee pu na kan, aa ga ŋmaa ter mi. Pɔɔn aabaa ki taa cha bi li keei tii Ahitofel aasurm mu u ga li tii u na.

³⁵ Bitotoorb Sadok ni Abiatar ga li bi nima; bui bi tibɔr timɔk aa ŋun ubɔr do na.

³⁶ Bijapɔtiib Ahimaas ni Jonatann bi bi chee, le aa ga ŋmaa di tibɔr timɔk aa ŋun na tun ni bi m chee.”

³⁷ Kina pu le David aajɔ Husai gir buen Jerusalem ni, ki ti fuu n‑yoonn mu Absalom fuu ni nima na.