2 Samuel 14 - Uwumbɔr aagbaŋ

Joab aah nan ban isan ke Absalom gir ni pu na

¹ Joab nan bee ke Ubɔr David aajapɔɔn Absalom aah san na, naa ki piir usui,

² le u tun ti yin ni Tekoa aapiilandaan ubaa. Upii ngbaan aah nan fuu ni na, le u bui u ke, “Ŋmann ke aa bi wii likpuul la, ki di ŋikpuu aakeken gbab, ki taa chaa aayikpir. Ŋa aabaa ke upii u bi wii likpuul, ni ti yunn sakpen na,

³ ki buen ubɔr chee, ki ti bui u maah ban m tuk si pu na.” Le Joab bui u waah ga ti len pu na.

⁴ Upii ngbaan nan buen ubɔr chee, le ki ti gbaan kitiŋ, le ki bui u ke, “Mpɔɔndaan, ter mi.”

⁵ Le ubɔr baa u ke, “Aa ban ba?” Le u bui u ke, “Maaninkpel, m ye ukpopiigiin la. Nchal kpo a.

⁶ Maaninkpel, m nan kpa mbijabim mulee la, le daalbaadaal bi nan ti jan kisaak ni, nin chee ubaa aa nan bi ki ga par bi na, le ubaa ku uken.

⁷ Tɔ, maaninkpel, maanib mɔmɔk fenn lir m pu, ki ban ke m di njapɔɔn uken na tii bi, aan bi ku u mu teen. Bi yaa ŋa kina kan, maan ki li kpa ubijabo. Bi ga kuln maakookoo aamakl, le nchal aan ki li kpa ubijabo u ga cha waayimbil li beenin bi na.”

⁸ Le ubɔr bui u ke, “Li chaa kun, m ga lik ti ponn ni.”

⁹ Le u ki bui u ke, “Mpɔɔndaan, saah ga ŋa nimɔk na ga li ye m ni maanib aataani la, sin ni libɔrdichal ni yaab aaŋaal aa bi ti ni.”

¹⁰ Le ubɔr kii u ke, “Unii umɔk ban si ke u ŋa si nibaa na kan, li joo ni udaan, le waan ki muk si daalbaadaal.”

¹¹ Le u ki bui ke, “Mpɔɔndaan, m gaŋ si ke aa mee Aadindaan Uwumbɔr, aan maanib bi ye ke bi teen njapɔɔn aapɔln na taa ku njapɔɔn u gur na, ki moo koo taani ni.” Le David bui u ke, “M puu Uwumbɔr u bi n‑yoonn mɔmɔk na ke nibaa aan ŋa aajapɔɔn.”

¹² Le upii ngbaan ki bui u ke, “Mpɔɔndaan, m gaŋ si ke aa cha m len libɔbil libaa kpee.” Le ubɔr kii u ke, “Ni ŋan.”

¹³ Le u ki bui ke, “Aa ŋa kinye ki tun Uwumbɔr aanib taani wee? Saa cha sin aabaa aajapɔɔn gir ni, le saah len pu dandana wee na mɔk ke saabɔr bii.

¹⁴ Ti mɔmɔk ga kpo, ti naahn nnyun mu kpir kitiŋ, aan baan ki ŋmaa faa mu na la. Hali Uwumbɔr ubaa aa cha binib bi kpo na ki gir ni limɔfal ni, le ubɔr ma tee ga ŋmaa kan nsan ki cha unii u san kikusɔŋ na gir ni.

¹⁵ Tɔ, Mpɔɔndaan, nlandak mu pu m dan aa chee na le ye ke binib ngbaan ban mi la, le m bui mbaa ke nibaakan m yaa nan len aa chee kan, aa ga ŋa maah ban pu na.

¹⁶ M nyi ke aa ga nan ŋun tii mi, ki gaa m ni njapɔɔn lii uja u ban u ku timi ki nyan timi Uwumbɔr aah tii waanib kitiŋ ki na ni.

¹⁷ Maaninkpel, m bui mbaa ke saah ga puu tipuur ti na ga gaa mi lii; ba pu? ubɔr naahn Uwumbɔr aatuun la, ki ga ŋmaa gann ni ŋan na, ni ni kaa ŋan na ponn ni. Aadindaan Uwumbɔr li bi aa chee.”

¹⁸ Le ubɔr bui u ke, “M ban m baa si mbaan mubaa la, le ki ban ke aa bui mi mbamɔn.” Le upii ngbaan bui ke, “Mpɔɔndaan, aa ga ŋmaa baa mi saah ban pu na mɔmɔk.”

¹⁹ Le u baa u ke, “Naa ye Joab le bui si ke aa len kina aa?” Le u kii ke, “Mpɔɔndaan, mbamɔn, nsan mubaa aa bi aan m ga ŋmaa minn kaan gar saabaan ngbaan. Mbamɔn, ni ye uninkpel Joab le bui mi maah ga nan ŋa ki len pu na.

²⁰ Tɔ, u tee ŋa kina ke u toor tibɔr timina la. Mpɔɔndaan, aa kpa nlan ke Uwumbɔr aatuun na la, ki nyi tiwan nimɔk ŋani na.”

²¹ Nee aapuwɔb le ubɔr nan bui Joab ke, “M kii ke m ŋa saah ban pu na. Buen ti yoor ni Absalom, ki di u giin ni do.”

²² Le Joab tar gbaan David aanimbiin ni, kipak ponn ni, le ki bui ke, “Mpɔɔndaan, Uwumbɔr ŋa tinyoor ŋa aa pu. Dandana wee m bee ke aasui piin m pu; ba pu? aa kii ki ŋa maah mee pu na.”

²³ Le u fii ki buen Gesur ki ti yoor ni Absalom giin ni Jerusalem ponn ni.

²⁴ Ubɔr mu nan tee bui ke u cha Absalom koo ubaa aadichal ni, waa ban ke u kan u. Kina pu le Absalom nan koo waadichal ni, kaa buen ubɔr aanimbiin ni.

Absalom ni ute David aah ki ŋa kimɔbaan pu na

²⁵ Ubaa aa nan ki bi Israel aanib ni ki kpa kinyaan ke Absalom na. Uwon nibaa chee aa nan bi ki kpa kidaan.

²⁶ Uyikpir nan wiir sakpen, le u chee ti nfum mubaabaa libiln libiln, buyoonn ti ti fɔk sakpen ki nyuŋ na. Taanyunyuun ga nan jer ndibim kuruwaa bilee aanyunyuun.

²⁷ Absalom nan kpa mbijabim bitaa, ni upiibo ubaa, le bi yin u ke Tamar. U nan ye upii u ŋan sakpen na la.

²⁸ Absalom nan koo Jerusalem ponn ni ki ti saa ŋibin ŋilee, kaa kan ubɔr.

²⁹ Le u tun ti yin ni Joab, ke u nan tun u ubɔr chee u ti gaŋ u tii u, le Joab yii, kaa dan. Absalom nan ki gir tun u chee, le Joab ki yii, kaa dan.

³⁰ Le Absalom bui waatutum ke, “Ni kan ke Joab aakpaakon le paa maakpaakon pu, le njikaabim bi mu ponn ni. Buen ti see bu lii man.” Le bi buen ti see bu lii.

³¹ Le Joab buen Absalom do, ki ti baa u ke, “Ba ŋa saatutum see maakpaakon lii?”

³² Le Absalom gar u ke, “Maah yin si aan aa yii na, nima pu le m ŋa kina. M ba ban si ke aa buen ti gaŋ ubɔr le tii mi ke, ‘Ba pu aan m nyan ni Gesur ki kun ni do? M yaa ba beenin bi nima kan, ni ba soor.’” Le Absalom ki len ke, “M ban ke aa ban nsan aan m kan ubɔr, m yaa bii libiil kan, u ga ŋmaa ku mi.”

³³ Le Joab buen Ubɔr David chee ki ti bui u Absalom aah len pu na. Le ubɔr nan tun yin ni Absalom, le u buen u chee ki ti gbaan kitiŋ unimbiin ni. Le ubɔr doon u ki moor utakpiln.