2 Samuel 12 - Uwumbɔr aagbaŋ

Uwumbɔr aabɔnabr Natann aah sur Ubɔr David pu na

¹ Uwumbɔr nan tun waabɔnabr Natann, Ubɔr David chee. Natann nan buen u chee le ki ti bui u ke, “Bijab bilee le nan kpaan bi kitiŋ kibaa ni, ubaa nan ye uwankpadaan, le uma nan ye ugiin.

² Uwankpadaan na nan kpa inaa ni ipiih pam,

³ le ugiin na kpa upihbo ubaa, u nan daa u la. U nan lik u, le u ni waabim nan kpaan bi waadichal ni. U nan joo ubaa aajikaar le kpiini u, le ki cha u nyu nnyun waayinyook ni, ki yoor u puini utaa pu. Upihbo ngbaan nan bi u chee ke ubisal na la.

⁴ Daalbaadaal le uwankpadaan na nan kan uchaan. Uwankpadaan ngbaan aa nan ban ke u di ubaa aawakork kibaa ŋa uchaan ngbaan tichann, le ki tee chuu ugiin na aapihbobaan na ki di ŋa uchaan ngbaan tichann.”

⁵ David aaŋuul nan fii uwankpadaan ngbaan pu, le u bui ke, “M puu Uwumbɔr u bi n‑yoonn mɔmɔk na pu, ke uja u ŋa kina na ŋeer nkun.

⁶ Waah ŋa titunwanbir ti na pu, u ga pa waah gaa pu na nfum munaa.”

⁷ Le Natann bui David ke, “Sin le ye uja ngbaan. Le Israel yaab Aadindaan Uwumbɔr bui si ke, ‘M ŋa si Israel yaab aabɔr ki gaa si lii Sɔɔl chee.

⁸ M di waanaan ni upuutiib tii si; m ŋa si Israel ni Juda yaab mɔmɔk aabɔr. Nima ngbaan yaa kaa ba ŋeer si kan, m ba ga ki tii si kina nfum mulee pu kpee.

⁹ Ni ki ŋa kinye aan aa yii maamɔb ki tun titunwanbir timina? Aa cha bi ku Uria butɔb ni, aa cha Amonn yaab ku u, le aa gaa upuu.

¹⁰ Nima pu na, n‑yoonn mɔmɔk ni, saanib bibaa ga kpo mpɔɔnkun; ba pu? aa yii maamɔb ki gaa Uria aapuu.

¹¹ M puu ke m ga cha saachiln ni aanii ban tibɔr sakpen tibaa tii si. Buyoonn m ga nan gaa aapuutiib aa chee, ki di tii uja ubaa aan u doon bi chee nwiin pu na, le aa ga kan ti.

¹² Aa tun saatunwanbir libɔɔl ni la, le m ma ga cha nimina ŋa nwiin pu, aan Israel yaab mɔmɔk kan.’”

¹³ Le David bui ke, “M tun Uwumbɔr titunwanbir.” Le Natann gar u ke, “Uwumbɔr di cha pinn si, saan kpo.

¹⁴ Saah tee lik seen Uwumbɔr pu ki ŋa kina na, saabo ga kpo.”

¹⁵ Le Natann siir kun. Uwumbɔr nan cha Uria aapuu ngbaan aah ma ubijabo u tii David na buŋ pam.

David aajapɔɔn aah kpo pu na

¹⁶ David nan mee Uwumbɔr ke ubo ngbaan pɔɔk. U nan yii tijikaar mɔmɔk, le kinyeek mɔk kan, u doo kitiŋ le waadiik ni.

¹⁷ Waachiln ni aaninkpiib nan buen u chee ki ti pɔɔn bibaa ke bi cha u fii kitiŋ, le u yii, kaa fii, ki mu aa ji nibaa bi chee.

¹⁸ Likpaakool libaa aah jer na le ubo ngbaan kpo, le David aaninkpiib ngbaan aa nan kaa ke bi bui u tibɔr ngbaan. Bi nan bui ke, “Ubo ngbaan aah nan laa bi na, David aa nan gar timi buyoonn ti len u chee na. Ti ga ŋa kinye ki bui u ke ubo ngbaan aa ki bi? Nibaakan u ga tii ubaa titotonn tibaa.”

¹⁹ David aah kan ke bi bi looni tɔb chee tibɔr na, le u bee ke ubo ngbaan aa ki bi. Le u baa bi ke, “Ubo ngbaan kpo oo?” Le bi kii ke, “Een, waa ki bi.”

²⁰ Le David fii kitiŋ, ki fu nnyun, ki chaa uyil, le ki kpeln waawanpeenkaan, le ki buen Uwumbɔr Aadichal ni, u ti doon uma Uwumbɔr. Waah gir ni libɔrdichal ni na, le u cha bi tii u tijikaar, le u jin ti libuul ngbaan ni.

²¹ Le waaninkpiib nan bui u ke, “Taa bee nimina aatataa. Ubo ngbaan aah nan laa bi na, aa nan wii le kaan ji nibaa, le waah kaa ki bi na, aa kpaan fii ki jin tijikaar.”

²² Le David gar bi ke, “Mbamɔn, m nan lul bumɔb, waah nan laa bi na. M nan dak ke nibaakan Uwumbɔr ga san mi kinimbaak ki taa cha u kpo la.

²³ Tɔ, waah kaa ki bi na, m ga ki ŋa kinye ki lul bumɔb? M ga ŋmaa giin ni ubo ngbaan aa? Nwiin mbaa daal kan, m ga nan buen waah bi nin chee na, le uma aan ki ŋmaa gir ni m chee.”

Baah ma Solomonn pu na

²⁴ Le David sɔŋ upuu Batseba aasui. U nan doon u chee, le u ma ubijabo, le David yin u ke Solomonn. Uwumbɔr nan gee ubo ngbaan,

²⁵ ki tuk waabɔnabr Natann ke u ti yin ubo ngbaan ke Jedidia; ba pu? Uwumbɔr nan gee u.

David aah nyaŋ ki gaa Raba aatiŋ pu na

²⁶ N‑yoonn mue na, Joab nan beenin ban u nyaŋ Amonn yaab aatiyil Raba, ki ti ban ke u gaa ki,

²⁷ le u tun ntuun David chee ke u ti bui u ke, “M tak Raba ki gaa baah lu nnyun nin chee na.

²⁸ Kuun ni saajab bi gur na, ki nan tak kitiŋ ngbaan ki gaa ki aabaa. Maa ban kipak ngbaan li ye mi yaan.”

²⁹ Kina pu le David kuun waajab, ki buen Raba, ki ti tak ki, le ki nyaŋ ki gaa ki.

³⁰ David nan chikr baabɔr aayil pu salmaa aabɔryikpupuk ki aanyunyuun ga nan pii ndibim libɔtɔgeln aanyunyuun na, le ki kpa litakpanyaan ki ponn ni. David nan di litakpanyaan ngbaan ki di tam uma ubaa aabɔryikpupuk pu. U nan ki yoor tiwan kitiŋ ngbaan ponn ni pam,

³¹ ki cha kaanib joo tikur aakuu, ni nchɔkm, ni kpaacha mam tun lituln, ki muk bi aan bi li tun ŋitambil aatuln. U nan ŋa Amonn aatim muken mɔmɔk kina la. Le u ni waajab gir kun Jerusalem aatiŋ ni.