2 Samuel 11 - Uwumbɔr aagbaŋ

David ni upii Batseba aabɔr

¹ Unaalan yoonn, n‑yoonn mu libiln mɔmɔk ni bibɔrb jaa kijaak na, le David nan tun Joab, ni waaninkpiib, ni Israel aajab, le bi ti nyaŋ Amonn yaab ki gob baatiŋ Raba. David ubaa nan gaar Jerusalem ni.

² Daalbaadaal aajoowiin pu, le David nan fii waafuur aadɔdooyaan, ki buen libɔrdichal aapaacham. Waah bi chuun paacham ngbaan na, le u kan upii ubaa bi fu nnyun. U nan ŋan sakpen.

³ Kina pu le u tun ke bi ti bee u, le bi nan bui u ke Eliam aabisal Batseba, u aachal ye Hef aanii Uria na ye.

⁴ David nan tun yin ni u, le bi nan joo ni u, u chee, le u doon u chee. U nan laa doo waaŋmal aapiir aatork la. Le u gir kun.

⁵ Nee aapuwɔb le u kan ke u dik la, le ki tun ti bui David.

⁶ Le David tun Joab chee ke, “Cha Hef aanii Uria dan.” Kina pu le Joab cha u buen David chee.

⁷ Uria aah ti fuu na, le David baa u ke Joab ni bijab ngbaan pɔɔ aan baa pɔɔ, ni kijaak ngbaan mu aah bi pu na,

⁸ le ki bui Uria ke, “Kun ti fuur siib.” Le Uria siir, le David di ipiin tun udo.

⁹ Tɔ, Uria mu aa nan kun; u nan yii ki dɔ ubɔr aakikiib chee, libɔrchiln ni aabisamɔb.

¹⁰ David aah ŋun ke Uria aa kun na, le u baa u ke, “Saa bi linampal ni yunn, le ki laa fuu ni; ba ŋa saa kun linampal?”

¹¹ Le Uria gar u ke, “Israel ni Juda aajab bi butɔb ni la, le Uwumbɔr Aakaal Aadakaa bi bi chee; le maaninkpel Joab ni saajab doo lipaal la. M ga ŋa kinye ki kun, ki ti ji ki nyu, ki koo doon mpuu chee? M puu sin ubɔr aayimbil pu, ke maan ŋa kina aawan kpala.”

¹² Le David bui u ke, “Kina kan, gaar do aan nwiin mue lir, le m fe cha aa gir fen.” Kina pu le Uria nan gaar Jerusalem ni, nwiin ngbaan daal, ni kitaak ki ki woln na.

¹³ David nan cha u nan jin u chee kinyeek ngbaan, le ki cha u nyun ndaan gbii. Tɔ, kinyeek ngbaan mu Uria aa nan ki kun linampal; u nan yii ki doon waawandookaan pu, libɔrdichal aakikiib aadiik ni.

¹⁴ Kitaak aah woln na, le David ŋmee kigbaŋ ki di tii Uria u ti tii Joab.

¹⁵ Waah nan ŋmee pu na sɔ: “Di Uria siin nsaloln aakuul ni, nin chee kijaak pɔɔ sakpen na, ki gir puwɔb aan bi ku u.”

¹⁶ Joab aah ki bi gob kitiŋ ngbaan na, le u di Uria tun nin chee u nyi ke baadim pɔɔ na.

¹⁷ Baadim nan nyan ni kitiŋ ngbaan ni, le bi ni Joab aajab nan di pii tɔb; bi nan ku David aajab bibaa, ki ku Uria mu.

¹⁸ Le Joab tun David chee butɔb ngbaan aah bi pu na aabɔr,

¹⁹ le ki sak ntuun ngbaan ke, “Aa yaa ti tuk u butɔb aabɔr doo kan,

²⁰ nibaakan waaŋuul ga fii, le u baa si ke, ‘Ni ŋa kinye ki ti ŋɔŋ kitiŋ ngbaan pu sakpen ke nimi ni bima jan? Naa nyi ke bi ga ŋmaa kal ŋigon pu ki too ni nimi ipiin aa?

²¹ Naa teer baah nan ku Abimelek u aate nan ye Gideonn na pu na aa? Tebes aatiŋ ni, le upii nan di kinaak baan lii ni u pu, ligoln taab. Ni ŋa kinye, aan ni ti ŋɔŋ ligoln ngbaan pu kina?’ Ubɔr yaa ti baa si kina kan, bui u ke, ‘Bi ku saaninkpel Uria mu.’”

²² Le ntuun ngbaan buen David chee, ki ti bui u Joab aah tuk u ke u ti len pu na.

²³ U nan len ke, “Mpɔɔndaan, timi aadim nan pɔɔ jer timi, le ki nyan ni baatiŋ ni, aan timi ni bima nan jan lipaal, le ti pɔɔn tibaa ki dii bi ti saa kitiŋ ngbaan aabisamɔb.

²⁴ Le bi kal ligoln pu ki too ni timi ipiin, le ki ku saajab bibaa; saatutunn Uria mu bee butɔb ni.”

²⁵ Le David bui ntuun ngbaan ke, “Ti pɔɔk Joab aataakpab, ki bui u ke u taa cha usui bii; ba pu? saan ŋmaa bee unii u ga bee butɔb ni na. Bui u ke u ki gir ti tak kitiŋ ngbaan ki nyaŋ ki.”

²⁶ Batseba aah ŋun uchal aakun pu na, le u wii waakpuul.

²⁷ Waah wii uchal aakpuul doo na, le David cha bi ti bui u ke u dan libɔrdichal ni; le u nan kpaln upuu ki ma ubijabo tii u. Tɔ, Uwumbɔr aasui aa nan piir David aah ŋa pu na pu.