2 Samuel 10 - Uwumbɔr aagbaŋ

David aah nyaŋ Amonn ni Siria yaab pu na

¹ Nee aapuwɔb le Amonn Aabɔr Nahas kpo, le ujapɔɔn Hanunn jin waanaan.

² Le Ubɔr David bui ke, “Ni ŋan ke m ŋa Hanunn tiŋann ke ute Nahas aah nan ŋa mi pu na.” Kina pu le u nan tun binib ke bi ti doon u likpuul. Baah ti fuu Amonn aatiŋ ni na,

³ le Amonn yaab aayidam bui ubɔr ngbaan ke, “Aa dak ke aate aanyuŋ pu le David tun ni bijab bee, ke bi nan doon si likpuul aa? Naa ye kina pu. U tun ni bi ke bi nan pekr kitiŋ kee la, aan u ŋmaa nyaŋ timi.”

⁴ Le Hanunn chuu David aatuun ngbaan, ki kuu bilangban lipepel libaabaa, ki gii gii baawanpeenkaan mu bichaŋ mɔk, ki di bi lii, ke bi li cha.

⁵ Inimɔɔn pu, baa nan ki ŋmaa gir kun. David aah ŋun baah ŋa bi pu na, le u naŋ tuk bi ke bi gaar Jeriko aatiŋ ni, aan bilangban ngbaan ki pa ni waahr.

⁶ Amonn yaab nan bee ke bi ŋa David baadin, le bi buen Siria ki ti ban bijab ŋichur moninko, Bef Rehob ni Soba aatim ni, ki ban ŋichur kipiik ni ŋilee Tob aatiŋ ni, le ki ban Maaka aabɔr ni waajab lichur, ke bi ti jan tii bi aan bi pa bi.

⁷ David nan ŋun tibɔr ngbaan, le ki tun Joab ni waajab mɔmɔk, ke bi ti ŋeer tɔb.

⁸ Amonn yaab nan nyan ki ti lul sil baatiyil Raba aabisamɔb, le bijab bi gur ki ye Siria aajab, ni bijab bi nyan ni Tob, ni Maaka na mu lul sil mpaan pu.

⁹ Joab nan kan ke baadim aajab ban ke bibaa li bi upuwɔb le biken mu li bi umɔb wɔb, kina pu le u nyan Israel aajab bi nyi butɔb aabɔr mbamɔm na, ki cha bi sil toŋ Siria yaab,

¹⁰ le ki di bijab bi gur na tii unaal Abisai, le u mu di bima ngbaan lul sil toŋ Amonn yaab.

¹¹ Joab nan bui u ke, “Aa yaa kan ke Siria yaab yaa bi nyaŋni mi kan, dan ki nan ter mi; Amonn yaab mu yaa bi nyaŋni si kan, m mu ga dan nan ter si.

¹² Li kpa lipobil. Cha ti li pɔɔ ki jan tii timi aanib ni Uwumbɔr aatim pu. Cha Uwumbɔr aageehn ŋa.”

¹³ Joab ni waajab nan chii ke bi ti tak Siria yaab, le Siria yaab san yaa.

¹⁴ Amonn yaab aah kan Siria yaab bi san na, le bi mu san cha Abisai ni waajab, ki gir koo baatiŋ ni. Le Joab di cha, kaa ki faa Amonn yaab ngbaan butɔb, ki gir kun Jerusalem.

¹⁵ Siria yaab ngbaan nan bee ke Israel yaab nyaŋ bi, le bi kuun baajab mɔmɔk nan kpaan.

¹⁶ Soba aabɔr Hadadeser nan yin ni Siria yaab bi bi Yufrates Aamɔɔl aawipuul wɔb na, le waajab aaninkpel Sobak joo ni bi Helam aatiŋ ni.

¹⁷ David aah ŋun ti na, le u kuun Israel aajab, le bi puur Jɔɔdann Aamɔɔl, ki buen Helam, nin chee Siria yaab nan lul sil ki lik u na. Kijaak ngbaan nan piin,

¹⁸ le Israel yaab jenn Siria aajab giin bipuwɔb. David ni waajab nan ku Siria aajab bi joo itaan aatɔroku mam na ikui ilole, ki ku bitandam mu ŋichur imonko ilee, ki tii baadim aajab aaninkpel Sobak mu titotonn, le u bee butɔb ngbaan ni.

¹⁹ Bibɔrb bi nan bi Siria aabɔr Hadadeser aataab na aah kan ke Israel yaab nyaŋ bi na, le bi ŋa bi chee nsuudoon aamɔbaan ki kpaln baatutum. Le Siria yaab aa nan ki kaa ke bi ter Amonn yaab.