2 Samuel 1 - Uwumbɔr aagbaŋ

David aah ŋun Sɔɔl aakun pu pu na

¹ Sɔɔl aakun aapuwɔb, le David nyan ni waah nan nyaŋ Amalek yaab butɔb bu ponn ni na, ki gir ni, ki nan bi Siklag aatiŋ ni iwiin ilee.

² Wintaa daal le unachipɔɔn ubaa nyan ni Sɔɔl aajab ni ki fuu ni. U nan dar kar waawanpeenkaan, ki di titan puŋ uyil pu, ke u mɔk usui aah bii pu na. U nan buen David chee, le ki ti gbaan ke u mɔk waapak.

³ Le David baa u ke, “Aa nyan ni la chee?” Le u gar u ke, “M nyan ni Israel aajab ni, le ki san ŋmar ni.”

⁴ Le David bui u ke, “Bui mi tiwan ni ŋa na.” Le u bui u ke, “Timi aajab san butɔb ngbaan ni, le bi ku timi aajab pam. Bi ku Sɔɔl ni ujapɔɔn Jonatann mu.”

⁵ Le David baa u ke, “Aa ŋa kinye ki ti nyi ke Sɔɔl ni Jonatann kpo a?”

⁶ Le u gar u ke, “M mu nan bi Gilboa Aajool pu, le ki kan Sɔɔl si nyii waakpaatuŋ pu, le bidim aataan aatɔroku mam, ni bitandam bi ŋɔkni u pu.

⁷ Le u fenn, ki kan mi, le ki yin mi. Le m kii ke, ‘Maaninkpel, m sɔ.’

⁸ Le u baa mi ke ‘Ŋma ye?’ Le m bui u ke m ye Amalek aanii la.

⁹ Le u bui mi ke, ‘Dan do ki nan ku mi. M kan titotonn sakpen a, le ki ban m kpo.’ Le m buen ki ti ku u; ba pu? m nan bee ke waah kan titotonn pu na, waan ki ŋmaa li bi ki yunn.

¹⁰ Maaninkpel, le m chuu chikr kibɔryikpupuk uyil pu, ki ŋmaar mbuen mu ŋmaa uŋaal na mu, ke m nan di tii si.”

¹¹ Mpombiin pu le David daa kar waawanpeenkaan, le waajab mu ŋa kina.

¹² Bi nan wii ikpowiil ki lul bumɔb ki ti saa kijook, Sɔɔl, ni Jonatann, ni Uwumbɔr aanib Israel yaab pu; ba pu? bi ponn ni pam le nan bee butɔb ni.

¹³ David nan baa unachipɔɔn u nan joo ni tibɔr ngbaan na ke, “Aa ye la chee aanii?” Le u bui ke, “M ye Amalek aanii la, le ki tee koo saatiŋ ni.”

¹⁴ Le David baa u ke, “Aa kaar kinye ki ti ku ubɔr u Uwumbɔr lee u na?”

¹⁵ David nan yin waajab ponn ni ubaa ki bui u ke, “Ku u.” Le uja ngbaan saa ku Amalek aanii ngbaan.

¹⁶ Le David bui Amalek aanii ngbaan ke, “Sin le joo ni nimina aabaa pu. Buyoonn aa kii ke sin le ku Uwumbɔr aah lee unii u ubɔr na, le aa ku aabaa.”

David aah gaa nkpolahn mu Sɔɔl ni Jonatann pu na

¹⁷ Nkpolahn mue le David nan gaa, Sɔɔl ni ujapɔɔn Jonatann pu,

¹⁸ le ki siin ke Juda aanib bae mu. Bi ŋmee mu ŋa Jasar aagbaŋ ni:

¹⁹ “Israel aatiŋ aagongon pu le timi aayidam kpoi. Timi aajab bi kpa ŋipobil na lir a.

²⁰ Taa mooni ti Gaf aatiŋ ni. Taa tuk Askelonn aatiŋ aanib. Taa cha Filistia aapiib aasui piir; taa cha binib bi kaa dii Uwumbɔr na aabisatiib kan mpopiin.

²¹ Taa cha utaal, bee limaln lir Gilboa aagongon paab, cha ŋaakpaakon kpaln nteer n‑yoonn mɔmɔk; ba pu? nima chee le bipobidam aajaak aapen dɔ inimɔɔn ni; baa ki joo nkpan ŋmir Sɔɔl aajaak aapeln.

²² Jonatann aatɔm aa nan lann ni, le Sɔɔl aajaak aajuk aa nan san kinimbaak, ki nan saar mpɔɔndam lir, ki ku bidim.

²³ Sɔɔl ni Jonatann nan ye binib la, le binib gee bi; baamɔfal ni, bi nan kpaan tɔb chee la, le baakun mu ni, bi ki kpaan tɔb chee; bi nan tun mala mala jer ŋikaagii, le ki pɔɔ jer ichinn.

²⁴ Israel aapiib, wii Sɔɔl aakpowiil man. U nan peen nimi ŋibɔkunyaan ŋi moor lak lak na, ki tii nimi salmaa ni nleenyaan mu tii nimi kinyaan na.

²⁵ Bijab bi kaar na lir a; bi ku bi butɔb ni la. Jonatann kpo dɔ ŋigongon paab la.

²⁶ Nna aabo Jonatann, m wii aa pu la; aa nan ye m chee unii pam. Saah nan gee mi pu na nan kpa iwaan, ngeehm ngbaan nan jer upii aageehm.

²⁷ Bijab bi kaar na lir a, baajawan bee, kaa ki bi tibaa ni.”