2 Bibɔrb 9 - Uwumbɔr aagbaŋ

Baah kaan Jehu, Israel aanaan pu na

¹ N‑yoonn mue na, Uwumbɔr aabɔnabr Elaisa nan yin bibɔnabpɔm ngbaan ponn ni ubaa ki nan bui u ke, “Gor aabaa ki buen Ramof aatiŋ ki bi Gilead aatiŋ pu na ni. Li joo olif aakpasambil limina.

² Aa yaa ti fuu nima kan, aa ban kan Nimsi aayaabil, u aate ye Jehosafat, aan bi yin u ke Jehu na. Nyan u uŋeen aatɔtiib chee ki di u buen kidiik kibaa ni,

³ ki di olif aakpan mue kpir uyil pu, ki len ke, ‘Uwumbɔr le len ke u kaan si Israel yaab aabɔr.’ Aa yaa doo kan, aa nya nima mala.”

⁴ Tɔ, ubɔnabr pɔɔn ngbaan nan buen Ramof aatiŋ ni,

⁵ le ki ti kan butɔb aajab aaninkpiib bi nkuun ni. Le u bui ke, “Uninkpel, m joo inaŋ m tii si.” Le Jehu baa u ke, “Aa len ti ponn ni ŋma chee?” Le u gar u ke, “M len sin la.”

⁶ Le bima bilee ngbaan dii koo kidiik ni, le ubɔnabr pɔɔn ngbaan di olif aakpan na kpir Jehu aayil pu ki bui u ke, “Israel yaab Aadindaan Uwumbɔr le len ke: ‘Min le kaan si maanib Israel yaab aabɔr.

⁷ Aa ku saaninkpel u ye Ahab aajapɔɔn ki ye ubɔr na, le m ga ŋmaa daa Jesebel aatafal, waah ku maabɔnabtiib ni maatutum biken pu na pu.

⁸ Aa ku Ahab aamaal, ni uyaabitiib mɔmɔk; m ga kuln waamaal ponn ni aajab mɔmɔk, biwaatiib ni bipolb mɔmɔk.

⁹ M ga ŋa waadichal ke maah ŋa Israel yaab aabɔr Jeroboam, ni baabɔr Baasa aadichal pu na.

¹⁰ Baan sub Jesebel; ibɔ le ga ŋmɔ u Jesreel aapepel ni.’” Ubɔnabr pɔɔn ngbaan aah len kina ti doo na, le u nyan kidiik ngbaan ponn ni ki san.

¹¹ Jehu nan gir buen uŋeen aatɔtiib bininkpiib ngbaan chee, le bi baa u ke, “Ni ŋan aa? Uwaar ngbaan ban ba aa chee?” Le Jehu gar bi ke, “Ni nyi waah ban tiwan ni na.”

¹² Le bi bui u ke, “Aayii, taa nyi. Bui timi waah len pu na.” Le Jehu bui bi ke, “U bui mi ke Uwumbɔr le len ke, ‘M kaan si Israel aanaan.’”

¹³ Libuul ngbaan ni le Jehu aaŋeen aatɔtiib bininkpiib ngbaan di tiwanpeenkaan ni bi pee paab na ter ŋibimbin ŋi pu bi taar joi paacham aadiik ni na ke Jehu taa ni pu, le ki pii kakaan tiib ki teen ke, “Jehu le ye ubɔr.”

Baah ku Israel yaab aabɔr Joram pu na

^14-15 Le Jehu nan kpokl Ubɔr Joram pu. Joram nan bi Jesreel aatiŋ ni ke u ti teb ubaa, waah nan kan titotonn ti Ramof aatɔb bu ponn ni, u ni Siria aatiŋ aabɔr Hasael nan ti di biyil kpaa tɔb na ni. Kina pu na, Jehu nan bui uŋeen aatɔtiib bininkpiib ngbaan ke, “Ni yaa si nchaŋ ni kan, ni li nyi ubaa taa nya Ramof ki loon buen Jesreel ki ti nyaa binib ngbaan,”

¹⁶ le ki koo waataan aatɔroku ni ki nyan kal Jesreel aasan pu. Joram aa nan kee pɔɔk, le Juda aatiŋ aabɔr Ahasia nan bi manni u nima.

¹⁷ Ukikiir u nan bi kidifɔfɔŋ paab ki kii Jesreel aatiŋ na, nan kan Jehu ni waajab aah choo pu na. Le u teen ke, “M waa bijab bibaa jak itaan choo.” Le Joram gar u ke, “Tun utandaan ubaa u ti lik ke bi ye jɔtiib le aan bidim.”

¹⁸ Ntuun ngbaan nan jak utaan ti fuu Jehu chee le ki bui u ke, “Ubɔr ban u bee ke ni choo kijɔtiik ni le aan ba?” Le Jehu gar u ke, “Naa kpaa si. Paan mpuwɔb.” Ukikiir u nan bi bikikiib aadiik ngbaan ni na, nan tuk bi ke ntuun ngbaan fuu bijab ngbaan chee ki mu aa ki gir ni.

¹⁹ Le bi ki tun ntuun muken, le u mu ti ki baa Jehu mbaan baan ngbaan. Le Jehu ki bui u mu ke, “Naa kpaa si. Paan mpuwɔb.”

²⁰ Ukikiir ngbaan nan ki tuk bi ke ntuun ngbaan mu fuu bijab ngbaan chee, ki mu aa ki gir ni, le ki ki len ke, “Bijab ngbaan aasaloln ŋaal waataan aatɔroku ke uwaar na la, ke Jehu aah ŋaal pu na.”

²¹ Le Ubɔr Joram bui ke, “Gor maatɔroku tii mi man.” Le bi ŋa kina, le u ni Ubɔr Ahasia di siir, bi mɔk bi baatɔroku tiib ponn ni ke bi ti tooh Jehu nsan ni. Bi nan ti to u Nabof aakpaakon ni la.

²² Le Joram baa u ke, “Aa joo nsuudoon le choo oo?” Le Jehu gar u ke, “Nsuudoon ga ŋa kinye ki li bi ti chee, aana Jesebel aah piin kisook ni ŋiwaa ŋi na ponn ni?”

²³ Le Joram teen ke, “Ahasia, linibiil,” le ki daa mur waatɔroku ki di kar kpaa.

²⁴ Le Jehu taln waatɔm, le ki di waapɔɔn mɔmɔk too mpiin le mu ti yun Joram aapuwɔb ki ti chaar chuu uŋuul. Joram nan lir waatɔroku ni ki kpo,

²⁵ le Jehu bui waaja u bi u chee tɔroku ni aan bi yin u ke Bidkar na ke, “Nyan u ki di mee Nabof aakpaakon ni. Teer ke m ni sin aah nan kpaan dii Ubɔr Joram aate Ahab na, Uwumbɔr nan len Ahab ke:

²⁶ ‘M kan baah ku Nabof ni ujapɔtiib fen na pu na. Le m puu ke m ga daa aatafal nkpaakon baan mue ni.’” Le Jehu bui waaja ngbaan ke, “Yoor Joram ki di mee Nabof aakpaakon ni, aan ni gbiin Uwumbɔr aah nan puu pu na.”

Baah ku Juda aatiŋ aabɔr Ahasia pu na

²⁷ Ubɔr Ahasia nan kan tiwan ni ŋa na, le ki di waatɔroku kar kpaa ki san cha Bef Hagann aatiŋ ni, le Jehu ka u pu. Jehu nan bui waajab ke, “Ku u mu man,” le waah nan bi waatɔroku ni ki ti saa Gur aatiŋ ki ŋɔk Ibleam aatiŋ na, le bi tii u titotonn. Tɔ, u nan tee pɔɔn ubaa ki ti fuu Megido aatiŋ ni, le ki kpo nima.

²⁸ Waajab aaninkpiib nan di u ŋa itaan aatɔroku ni, ki di u buen Jerusalem aatiŋ ni, ki ti sub u nnaan aacheek ni, David Aatiŋ ni.

²⁹ Ahab aajapɔɔn Joram aah nan jin Israel aanaan pu na aabin kipiik ni libaa ni, le Ahasia nan jin Juda aanaan.

Baah ku Ubɔrpii Jesebel pu na

³⁰ Jehu nan fuu Jesreel aatiŋ ni. Tɔ, Jesebel aah ŋun tibɔr ti ŋa na pu na, le u bal chaloo, ki chaal uyikpir mbamɔm le ki ti sil libɔrdichal ponn ni aatakolu ubaa chee, ki si lik kitiŋ ponn ni.

³¹ Jehu aah dii mbisamɔb koo ni na, le u teen bui u ke, “Sin Simri. Sin unikur. Aa ban ba do?”

³² Jehu nan waan lik paacham le ki teen ke, “Ŋma si nchaŋ ni?” Libɔrdichal ni aaninkpiib bilee bee bitaa nan baan takolu ni lik ni u,

³³ le Jehu bui bi ke, “Di u mee lii ni man.” Le bi di u mee lii ni kitiŋ, le waasin yaa ligoln, ni itaan pu. Jehu nan di waataan ni tɔroku jer u pu,

³⁴ le ki koo libɔrdichal ponn ni, ki ti jin tijikaar. N‑yoonn ngbaan le u nin len ke, “Yoor kipiiwanbiik ngbaan ti sub; ba pu? u ye ubɔr aabisal la.”

³⁵ Tɔ, bijab bi nan nyan ke bi ti sub u na nan ti kan waayikpaŋ ni utaa ni uŋaal aakpab baanja la.

³⁶ Baah tuk Jehu kina na, le u bui ke, “Uwumbɔr nan len ke kina le ga ŋa. U nan cha waatutunn Elaija len ke: ‘Ibɔ le ga ŋmɔ Jesebel aawon, Jesreel aapepel ni.

³⁷ Waanann ti ga gur na ga yaa ki dɔ nima ke tinaabin na, le ubaa aan ŋmaa bee ni ye niken na.’”