2 Bibɔrb 8 - Uwumbɔr aagbaŋ

Sunem aapii na aah ki gir ni pu na

¹ Elaisa nan tuk upii u nan bi Sunem aatiŋ ni, aan Elaisa nan fikr ujapɔɔn nkun ni na, ke Uwumbɔr ga cha nkon dan kitiŋ ngbaan pu, ki ga yunn ki ti saa ŋibin ŋilole, kina pu na, u ni waadichal nya nima ki buen nibaa chee.

² U nan ŋa Elaisa aah tuk u pu na, le u ni waadichal nan fii nima ki ti koo Filistia aatiŋ ni, ŋibin ŋilole ngbaan.

³ Ŋibin ŋilole ngbaan aah jer na, le u gir ni Israel aatiŋ pu, le ki buen ubɔr chee ke bi ki giin waadichal, ni waatiŋ tii u.

⁴ U nan ti kan ubɔr ni Elaisa aatutunn Gehasi bi gbaa tibɔr; ubɔr nan bi ban ke u bee Elaisa aajinjii aatun aabɔr la.

⁵ Gehasi aah nan bi tuk ubɔr ngbaan Elaisa aah nan fikr unii nkun ni pu na, le upii ngbaan nan di waah chuun pu na tuk ubɔr ngbaan. Le Gehasi bui ubɔr ke, “Mpɔɔndaan, upii ngbaan sɔ, ujapɔɔn u Elaisa nan fikr u nkun ni na mu sɔ.”

⁶ Ubɔr aah nan baa upii ngbaan na, u nan kii ke Gehasi aah len pu na gbii, le ubɔr ngbaan nan yin waaninkpel ubaa ki nan bui u ke u giin tiwan ni mɔmɔk ye upii ngbaan aawan na tii u; ki kpee waakpaakon aah nan ŋa tijikaar pu ŋibin ŋilole ŋi ponn ni waa bi na mu.

Elaisa ni Siria aatiŋ aabɔr Ben‑Hadad aabɔr

⁷ Buyoonn Siria aatiŋ aabɔr Ben‑Hadad nan bun na le Elaisa nan buen Damaskus aatiŋ ni. Ubɔr ngbaan aah nan ŋun ke Elaisa bi nima na,

⁸ le u bui waaninkpel u bi yin u ke Hasael na ke, “Ban ipiin ki ti tii Uwumbɔr aabɔnabr ngbaan ki bui u ke u baa Uwumbɔr ki lik ke m ga pɔɔk aan maan pɔɔk.”

⁹ Le Hasael nan ban ipiin i ŋan sakpen ki bi Damaskus aatiŋ ni na aabɔŋ aabɔŋ ki di tun laakumii tiib imonko ilee ki di buen Elaisa chee. Hasael aah nan ti kan u na, u nan bui ke, “Saatutunn Ubɔr Ben‑Hadad le tun ni mi ke m nan baa si lik ke u ga fii waabunbunn tee pu aan waan fii.”

¹⁰ Le Elaisa gar u ke, “Uwumbɔr kpiir tuk mi ke u ga kpo; aa mu ti tee tuk u ke u ga pɔɔk.”

¹¹ Le Elaisa nan lik u ijawaan aanimbil libaa le inimɔɔn ti chuu Hasael. Libuul ngbaan ni le tinyunyunn gbiin Elaisa aanimbil ni.

¹² Le Hasael baa u ke, “Uninkpel, ba ŋa aa wii?” Le Elaisa gar u ke, “Saah ga ŋa Israel yaab ijawaan sakpen aawan ni na pu le m wii. Aa ga see baatim mu pɔɔ aan bi maa ŋigon gob mu na mmii, ki suŋ baanachipɔm bi ŋan sakpen na, ki loe ku baabim, ki saa gbir baapiipudam aapuu.”

¹³ Le Hasael baa u ke, “M ga kan kina aapɔɔn la chee? M mu ye ŋma?” Le Elaisa gar u ke, “Uwumbɔr mɔk mi ke aa ga ji Siria aatiŋ aanaan.”

¹⁴ Hasael nan gir Ben‑Hadad chee, le u baa u ke, “Elaisa ti len kinye?” Le Hasael gar u ke, “U bui mi ke aa ga pɔɔk.”

¹⁵ Tɔ, naah nan ki woln na, Hasael nan di likekeln mɔɔn nnyun ki di ŋeeb ubɔr aamɔfal le u kpo. Hasael le nan nab Ben‑Hadad aanaan pu ki ye ubɔr Siria aatiŋ pu.

Juda yaab aabɔr Jehoram aabɔr

¹⁶ Ahab aajapɔɔn Joram aah nan ye Israel aatiŋ aabɔr pu na, aabiŋmuŋmur ni, le Jehosafat aajapɔɔn Jehoram jin Juda aanaan.

¹⁷ U nan ye ŋibin piitaa ni ŋilee aanii le ki jin nnaan ngbaan. U nan bi Jerusalem aatiŋ ni le ki joo waanaan ni aanib ki ti saa ŋibin ŋiniin.

¹⁸ Upuu aate le nan ye Ahab, le u nan dii Ahab aamaal aah nan bi pu na ki tun Israel aatiŋ aabɔrb aah nan tun titunwanbir ti na. U nan tun Uwumbɔr titunwanbir,

¹⁹ Uwumbɔr mu aa nan tee ban ke u kuln Juda aatiŋ, ba pu? u nan puu tipuur tii waatutunn David ke uyaabitiib ga li ji nnaan n‑yoonn mɔmɔk.

²⁰ Jehoram aanaan yoonn le Edom aatiŋ nan nyan Juda aatiŋ aapuwɔb ki gur si kibaa pu.

²¹ Nima pu le Jehoram ni waataan aatɔroku tiib mɔmɔk nan di buen Sair aatiŋ ni, nima chee le Edom aajab nan ti gob bi. Kinyeek le u ni waatɔroku tiib aayidam nan kar nyan ki san ŋmar, le waajab yaa ki kun bido bido.

²² Ki nyan n‑yoonn ngbaan Edom aatiŋ aa ki bi Juda aatiŋ aataab. N‑yoonn baan mue le Libna aatiŋ mu nyan Juda aapuwɔb.

²³ Jehoram aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

²⁴ Jehoram nan kpo, le bi di u sub nnaan aacheek ni, David Aatiŋ ni, le ujapɔɔn Ahasia nab waanaan pu.

Juda aatiŋ aabɔr Ahasia aabɔr

²⁵ Ahab aajapɔɔn Joram aah nan ye Israel yaab aabɔr pu na, aabin kipiik ni lileler ponn ni, le Jehoram aajapɔɔn Ahasia nan jin Juda aanaan.

²⁶ U nan ye ŋibin moninko ni ŋilee aanii le ki jin nnaan, le ki nan bi Jerusalem ni, nnaan aajal pu ki ti saa libiln libaa. Una le nan ye Ubɔr Ahab aabisal Atalia. Atalia aayaaja le nan ye Israel yaab aabɔr Omri.

²⁷ Ahasia aachool aah nan ye Ubɔr Ahab na, kina pu na, u mu nan tun Uwumbɔr titunwanbir ke Ahab aamaal na la.

²⁸ Ubɔr Ahasia nan ti kpee Israel yaab aabɔr Joram pu, le bi faa Siria yaab aabɔr Hasael butɔb. Bijab ngbaan nan ti di biyil kpaa tɔb Ramof aatiŋ ki bi Gilead aatiŋ pu na ni la, le Joram nan kan titotonn butɔb ngbaan ni.

²⁹ U nan gir ni Jesreel aatiŋ ni ke u nan teb ubaa, le Ahasia nan buen ti mann u nima.