2 Bibɔrb 7 - Uwumbɔr aagbaŋ

¹ Le Elaisa gar u ke, “Li pel Uwumbɔr aah len pu na. Fen kinakokoona, aa ga fe ŋmaa daa njikaabim mu ŋan sakpen na kuruwaa bitaa, tikur aamombil libaa, ki daa muken mu kuruwaa biloob, tikur aamombil libaa, Samaria aatiŋ ni.”

² Ubɔr aajɔ nan bui Elaisa ke, “Hali Uwumbɔr ubaa le yaa kpaan cha njikaabim fuu ni kan, kina aan ŋmaa ŋa.” Le Elaisa gar u ke, “Aa ga kan kina bi ŋani, le aa ma aan tee ji tijikaar ngbaan tibaa.”

Siria aatɔb aajab aah siir pu na

³ Bijab binaa bibaa nan bi Samaria aatiŋ aapaal, ki kpa tiwon aaween i bir na. Bi nan bui tɔb ke, “Taan ŋmaa li ka do kina ki ti kpo.

⁴ Taan ŋmaa ki koo kitiŋ ponn ni, ba pu? nkon le ga ti ku timi nima; le ti yaa ti ki ka do mu kan, ti ga ki kpo. Kina pu na, cha ti buen Siria yaab aakakaa chee; kookoo aawan ni bi ga ŋa timi na le ye ke bi ku timi, nibaa mu kan, bi ga di cha timi.”

⁵ Le naah bi bɔnni na, bi buen Siria yaab aakakaa chee, tɔ, baah ti fuu na, ubaa aa nan ki bi nima.

⁶ Uwumbɔr nan cha Siria yaab ngbaan ŋun kifuuk ki naahn butɔb aajapaak, ni itaan, ni yaatɔroku tiib na pu, le Siria yaab ngbaan nan dak ke Israel yaab ti pan Hef yaab aabɔr, ni Ijipt yaab aabɔr ni baajab ke bi nan tak bi la.

⁷ Le Siria yaab ngbaan nan san kijook ngbaan ke bi ŋmar. Bi nan san cha baakeken aaboo, ni itaan, ni ibon, ki di cha baakookoo yaan ngbaan naah bi pu na.

⁸ Bijab binaa ngbaan aah nan ti fuu Siria yaab aakookoo yaan ngbaan chee na, le bi koo libool libaa ni, le ki jin ki nyun tiwan ni bi li ponn ni na, le ki tɔk tikunabr, ni salmaa, ni tiwanpeenkaan ni bi kan na ki di ti bɔr; le ki gir ni, ki nan ki koo libool liken ponn ni, le ki ki ŋa kina.

⁹ N‑yaayoonn ngbaan le bi bui tɔb ke, “Naa ŋan ke ti li bi ŋani kina. Ti joo tibɔnyaan la, ni mu aa ŋan ke ti li joo ti tibaa. Ti yaa ban ke ni ti woln waahr aan ti nin len ti kan, ti ga kan ntafadaan. Cha ti siir man libuul lee ni, ki ti bui ubɔr aaninkpiib.”

¹⁰ Le bi nan nyan Siria yaab aakookoo yaan ngbaan ni, ki gir buen Samaria aatiŋ ni, ki ti teen bui bikikiib bi kii ibisamɔi na ke: “Ti buen Siria yaab aakookoo yaan ni, kaa ti kan unii ubaa, kaa ŋun ubaa pu; itaan, ni ibon beenin si gbin la, le Siria yaab ngbaan aah siir cha baaboo ŋi na beenin bi kina.”

¹¹ Bikikiib ngbaan nan di tibɔr ngbaan moon, le bi ti len ti libɔrdichal ni.

¹² Ni nan beenin ye kinyeek la, tɔ, ubɔr mu nan tee fii ngeen pu, le ki bui waajab aaninkpiib ke, “M ga bui nimi Siria yaab ngbaan aah ban bi ŋa pu na. Bi nyi nkon mu bi kitiŋ kee ni na aabɔr, kina pu le bi buen bi ti bɔr timoor ni. Bi dak ke ti ga nyan kitiŋ ni ke ti ti ban tijikaar, le bi ga chur timi ki nyaŋ kitiŋ kee.”

¹³ Le bininkpiib ngbaan ponn ni ubaa bui ke, “Binib bi bi kitiŋ ni na aamɔfal junn ke binib bi kpoi na la. Kina pu na, cha ti tun bijab bibaa aan bi di itaan i gur na ponn ni iŋmu buen ki ti lik tiwan ni ŋa na.”

¹⁴ Bi nan nyan bijab bibaa, le ubɔr di itaan aatɔroku tiib bilee tun bi, ki tuk bi ke bi li cha ki ti lik ke ba ŋa Siria aatɔb aajab.

¹⁵ Bijab ngbaan nan di kina ki ti saa Jɔɔdann Aamɔɔl chee, le ki kani nsan ni Siria yaab ngbaan aah san aan baawanpeenkaan ni baajawan lir pu na. Le bi gir ki ti tuk ubɔr baah kan pu na.

¹⁶ Le Samaria aanib chii nyan baatiŋ ni ki ti yoor yoor Siria yaab ngbaan aawan. Le Uwumbɔr aah nan len pu na, bi daa njikaabim mu ŋan sakpen na kuruwaa bitaa, tikur aamombil libaa, ki daa muken mu kuruwaa biloob, tikur aamombil libaa.

¹⁷ Ni nan di ŋa ke ubɔr nan cha ujɔ le ye mbisamɔb aaninkpel liyaadaal ngbaan. Binib aah nan chii pu ke bi nya na, le bi tur uninkpel ngbaan lii ki taa taa ku u nima, le ni gbiin Elaisa aah fe len pu n‑yoonn mu ubɔr fe dan u chee na.

¹⁸ Elaisa fe tuk ubɔr ngbaan, ke joo cha ni fen kinakokoona, bi ga kooh njikaabim mu ŋan sakpen na kuruwaa bitaa, tikur aamombil libaa, ki ga kooh muken mu kuruwaa biloob, tikur aamombil libaa, Samaria aatiŋ ni do.

¹⁹ Waah len kina na, le uninkpel ngbaan mu len ke, “Hali Uwumbɔr ubaa le yaa kpaan cha njikaabim fuu ni kan, kina aan ŋmaa ŋa.” Le Elaisa gar u ke, “Aa ga kan kina bi ŋani, le aa ma aan tee ji tijikaar ngbaan tibaa.”

²⁰ Le kina sil kan u, u nan kpo; binib le nan taa taa u pu kitiŋ aabisamɔb chee le u ti kpo.