2 Bibɔrb 6 - Uwumbɔr aagbaŋ

Elaisa aah nan pii nchɔkbim mu wɔŋ na pu na

¹ Daalbaadaal le Elaisa aah nan ye Uwumbɔr aabɔnabtiib bi aaninkpel na dan nan bui u ke, “Taah koo nin chee na par timi a.

² Tii timi nsan aan ti buen Jɔɔdann Aamɔɔl ni ki ti gaa idɔ, ki nan maa kpee timi aakookoo yaan pu.” Le Elaisa gar bi ke, “Li cha man.”

³ Bi ponn ni ubaa nan muk u ke u dii bi buen, le u ti kii,

⁴ le bi dii tɔb buen. Baah ti fuu Jɔɔdann Aamɔɔl ni na, le bi piin ki bi tun.

⁵ Bi ponn ni ubaa aah bi gaar busub bubaa na, le waachɔkbim finn lir nnyun ni. Le u bui ke, “Maaninkpel, m ga ŋa kinye? Mu ye nchɔkbim pinnkoo la.”

⁶ Le Elaisa baa u ke, “Mu lir la chee?” Uja ngbaan nan mɔk u mu aah lir nin chee na, le Elaisa koo nkpakpaa, ki di mee lii nnyun ni nima, le nchɔkbim ngbaan fii deen.

⁷ Le Elaisa bui u ke, “Chuu deer mu,” le uja ngbaan boon ki deer mu.

Siria aatɔb aajab aah lir pu na

⁸ Siria aatiŋ aabɔr ni Israel yaab nan joo tɔb kijaak la. U ni waaninkpiib nan kpokl le u lee libuul li ni bi ga ŋa baakakaa na.

⁹ Le Elaisa nan di lilambil tii Israel yaab aabɔr, ki sak u ke u taa duun nima chee, ba pu? Siria aajab nan dɔ kii u nima.

¹⁰ Kina pu le Israel yaab aabɔr mu nan sak waanib bi koo nima chee na, le bi nan gor ki kii bibaa. Nimina nan ŋani kina ki ti nyaŋ.

¹¹ Le ni nan muk Siria aatiŋ aabɔr ngbaan ki ti nyaŋ; le u yin ni waajab aaninkpiib ki nan baa bi ke, “Ni ponn ni ulau si Israel yaab aabɔr aachaŋ ni?”

¹² Le bi ponn ni ubaa gar u ke, “Mpɔɔndaan, ubaa aa bi. Uwumbɔr aabɔnabr Elaisa le tuk u saah len pu na. Hali aa yaa bi saadiik ni le ki loon len ti kan, u ga ŋun.”

¹³ Le ubɔr ngbaan bui ke, “Bee man waah bi nin chee na, aan m ti chuu u.” Waah nan ŋun ke Elaisa bi Dotann aatiŋ ni na,

¹⁴ le u di bijab bi wiir na, ni itaan ni yaatɔroku tiib tun nima. Bi nan ti fuu kitiŋ ngbaan ni kinyeek la, le ki gob ki ti ton.

¹⁵ Kichakpinaanyeek ni le Elaisa aatutunn fii, le ki nyan lipaal, le ki kan Siria aatɔb aajab ngbaan, ni baataan, ni yaatɔroku tiib mann kitiŋ ngbaan ti ton. U nan gir koo Elaisa chee le ki ti teen ke, “Maaninkpel, timɔfal junn a. Ti ga ŋa kinye?”

¹⁶ Le Elaisa bui u ke, “Taa san ijawaan. Ti kpa bijab tipuwɔb jer baah kpa pu na,”

¹⁷ le ki mee limeel ke, “Uwumbɔr, woln unimbil aan u kan.” Uwumbɔr nan kii waameel, le Elaisa aatutunn ngbaan waan lik paacham ki kan ke mmii aataan, ni yaatɔroku tiib le gbii ligongoln paab ki mann goln Elaisa.

¹⁸ Siria yaab ngbaan aah tak kitiŋ ngbaan na, le Elaisa mee limeel ke, “Uwumbɔr, cha bijab bimina jɔb.” Uwumbɔr nan ŋun waameel, le ki cha bi jɔb.

¹⁹ Le Elaisa buen bi chee ki ti bui bi ke, “Ni yenn nsan a; naah ban kitiŋ ki na aa ye kimina. Li dii mi man, aan m cheen nimi buen uja u ni bi ban u na chee,” le ki cheen bi buen Samaria aatiŋ ni.

²⁰ Baah ti kpaan koo kitiŋ ngbaan ni na, le Elaisa ki mee limeel ke, “Uwumbɔr, likr binimbil, ki cha bi li waa.” Uwumbɔr nan ŋun waameel; ki cha binimbil ki likr, le bi kan ke bi bi Samaria aatiŋ ni la.

²¹ Israel yaab aabɔr aah kan Siria yaab ngbaan na, le u baa Elaisa ke, “Uninkpel, m ku bi ii? M ku bi ii?”

²² Le u gar u ke, “Aayii. Hali saah chuu bijab bi butɔb ni na, saan ŋmaa ku bi. Tii bi nibaa aan bi ji ki nyu, ki cha bi gir li cha baabɔr chee.”

²³ Le Israel yaab aabɔr nan ŋa njim kpaan ki tii bi; baah jin ki nyun doo na, le u giin bi ti tii Siria aatiŋ aabɔr. Ki nyan liyaadaal ngbaan ki joo cha Siria yaab nan di cha, kaa ki looni Israel yaab.

Siria yaab aah nan gob Samaria aatiŋ pu na

²⁴ Ni nan bi kina le ki cha, le Siria aatiŋ aabɔr Ben‑Hadad di waatɔb aajab mɔmɔk buen ti tak Israel yaab, ki ti maa maa ŋibimbin tam tam Samaria aatiŋ aagon.

²⁵ Baah nan gob Samaria aatiŋ pu na, tijikaar aa nan ki bi Samaria aatiŋ ni, le ubon aayil nan daa tikur aamombil imonko inaa, le ŋituun likuruwaageln daa tikur aamombil ŋiŋmu.

²⁶ Israel yaab aabɔr nan bi chuun jer kitiŋ ngbaan aagoln paab, le upii ubaa nan wii u chee ke, “Mpɔɔndaan, ter mi.”

²⁷ Le u gar u ke, “Uwumbɔr yaa kaan ter si kan, m kpa ba aaterm ki ga tii si? Maa kpa njikaabim, kaa kpa ndaan mu.

²⁸ Ba muk si?” Le upii ngbaan bui ke, “Liyaadaal na le upii umina kpokl mi ke ti di maabo ŋaa ŋmɔ, aan ni yaa woln kan, ti ŋmɔ u mu yoo.

²⁹ Le ti nan di maabo ŋaan ki ŋman. Naah woln aan m bui u ke ti ga ŋmɔ ujapɔɔn na, le u di u bɔr.”

³⁰ Ubɔr aah ŋun kina na, le u daa kar kar waawanpeenkaan mpombiin pu, le binib bi nan bi duun ligoln ngbaan na kan ke u nan pee tiwan ni saak kuub na taab.

³¹ Le u teen ke, “Bi yaa kaa gii Elaisa aayil waahr aan nwiin nin lir kan, Uwumbɔr faa ku mi,”

³² le ki tun ntuun ke mu ti joo ni Elaisa. N‑yoonn mue na, Elaisa nan ka bininkpiib bi nan dan ke bi nan mann u na chee. Waahr aan ubɔr aatuun ngbaan nin fuu ni na, Elaisa nan bui bininkpiib ngbaan ke, “Unikur na tun ni unii ke u nan ku mi la. Tɔ, udaan yaa nan fuu ni kan, ni di kidiik piin ki taa cha u koo ni. Ubɔr ubaa ga paan ni u pu dandana.”

³³ U laa bi len kina, le ubɔr kpaan fuu ni ki nan bui ke, “Uwumbɔr le cha tibɔbir timina dan ti pu. Maan ki ŋmaa kiir u ke u ki ŋa nibaa.”