2 Bibɔrb 5 - Uwumbɔr aagbaŋ

Naamann aah pɔɔk pu na aabɔr

¹ Naamann nan ye Siria aatɔb aajab aayidaan la, le ki kpa kipak, le Siria aabɔr nan nyuŋ u sakpen. U pu le Uwumbɔr nan cha Siria aajab kan linyaŋ butɔb ni pam. U nan ye butɔb aajakpaan la, le ki mu tee kpa tiwon aaween i bir na.

² Baah nan looni Israel aatiŋ pu na mubaa ni, le Siria yaab nan chuu Israel aapiibo ubaa, le u ti kpaln Naamann aapuu aanaagbiipiibo.

³ Daalbaadaal le u bui waaninkpel ke, “Maaninkpel, aachal yaa ba buen Uwumbɔr aabɔnabr u koo Samaria aatiŋ ni na chee kan, ni ba ga li mɔ mi pam. U ba ga ŋmaa cha waaween ngbaan sɔŋ.”

⁴ Naamann aah ŋun kina na, le u buen ubɔr chee ki ti bui u upiibo ngbaan aah len pu na.

⁵ Le ubɔr ngbaan bui u ke, “Gaa kigbaŋ kimina, ki li cha Israel yaab aabɔr chee.” Le Naamann nan nyan kal nsan pu, ki joo tikunabr aamombil ŋichur piitaa, ni salmaa aamombil ŋichur ŋiloob, ni tiwanpeenkaan mu ŋiker kipiik.

⁶ Waah nan joo kigbaŋ ki na len ke, “Kigbaŋ kimina le ga di maajab aaninkpel Naamann mɔk si. M ban ke aa cha waaween sɔŋ la.”

⁷ Israel yaab aabɔr aah karn kigbaŋ na, le usui bii, le u daa kar waawanpeenkaan ki teen mpɔɔn pu ke, “Siria aatiŋ aabɔr ban ke m ŋa kinye aan ki cha uja wee pɔɔk? U dak ke m ye Uwumbɔr u kpa limɔfal ni nkun aapɔɔn na la aa? Nimina dɔ mpaan pu ke u ban u tak mi la.”

⁸ Elaisa aah ŋun tibɔr ti ŋa na, le u tii ubɔr lilambil ke: “Ba ŋa aa cha aasui bii kina? Cha uja ngbaan dan m chee, aan m mɔk u ke Uwumbɔr aabɔnabr bi Israel aatiŋ pu.”

⁹ Kina pu le Naamann nan di waataan ni itaan aatɔroku buen ki ti sil Elaisa aanaakɔbaal.

¹⁰ Le Elaisa tun waatutunn ke u ti bui u ke u li cha Jɔɔdann Aamɔɔl ni ki ti fu laanyun nfum mulole, le waaween ngbaan ga doo pel pel.

¹¹ Le Naamann aaŋuul nan fii, le u siir cha ki len ke, “M ba dak ke u ba ga dan aan unimbil nan kan mi la, le ki mee Udindaan Uwumbɔr, ki di uŋaal laal laal iween ngbaan pu, le ki cha i sɔŋ.

¹² Naa kpaan ye kina ngbaan, Damaskus aamɔɔ Abana ni Fapar aa ŋan jer Israel aamɔɔ mɔmɔk aa? M ba ga ŋmaa fu ŋaanyun ki pɔɔk.”

¹³ Waatutum nan buen u chee le ki ti bui u ke, “Uninkpel, Uwumbɔr aabɔnabr ngbaan yaa ba bui si ke aa ŋa tiwanpɔɔl nibaa le kan, kina aa ba ŋa ni. Tɔ, ba ŋa saan ŋmaa buen ki ti finn aabaa waah bui si pu na ki pɔɔk?”

¹⁴ Kina pu le Naamann nan buen Jɔɔdann Aamɔɔl ni, le ki ti di ubaa pɔɔn nnyun ni nfum mulole, Elaisa aah tuk u ke u ŋa pu na, le waaween ngbaan doo pel pel. Uwon nan pɔɔk ki jɔŋ pɔl pɔl ke ubo aawon na.

¹⁵ U nan di waajab bi mɔmɔk nan dii u na gir buen Elaisa chee le ki ti bui u ke, “M bee dandana ke Uwumbɔr ubaa aa ki bi see Israel yaab Aawumbɔr baanja; kina pu na, m gaŋ si, gaa m chee ipiin.”

¹⁶ Le Elaisa gar u ke, “M puu maah dii Uwumbɔr u, aan u bi n‑yoonn mɔmɔk na aayimbil pu, ke maan gaa aa chee ipiin ibaa.” Naamann nan muk u ke u gaa, le u yii kaan gaa.

¹⁷ Le Naamann bui u ke, “Saan gaa maapiin kan, tee cha m faa do aatan tun maawakor tilee ki di kun, ki nyan din ki joo cha, maan ki toor kitork, kaan ki see kitork mmii ni tii liwaal libaa see Uwumbɔr baanja.

¹⁸ Kina pu na, m yaa cheen maaninkpel ke u ti doon Siria aawaal Rimonn, laawaadiik ni, ki yaa gbaan nima chee kan, Uwumbɔr ga di cha pinn mi. M nyi ke u ga di cha pinn mi.”

¹⁹ Le Elaisa bui u ke, “Li cha ni nsuudoon.” Le Naamann siir kal nsan pu. U nan foor siib,

²⁰ le Elaisa aatutunn Gehasi bui ke, “Maaninkpel cha Naamann siir dafir le na. Ni ba ŋan ke u gaa Siria aajab aaninkpel ngbaan aah tii u ipiin i na la. M puu Uwumbɔr u bi n‑yoonn mɔmɔk na pu ke m ga san paan u pu ki ti kan u chee nibaa,”

²¹ le ki di siir paan Naamann pu. Naamann aah kan ke unii san paa ni u pu na, le u nyan waatɔroku ni ki tooh u nsan pu, ki baa ke, “Tibaa le ŋa aa?”

²² Le Gehasi gar u ke, “Nibaa aa ŋa. Maaninkpel le tee tun ni mi ke dandana le Uwumbɔr aabɔnabtiib bi bi Efraim aagongon aatiŋ ni na bilee fuu ni, le u ban ke aa tii ni bi tikur aamombil ŋichur ŋitaa, ni tiwanpeenkaan ni ŋan mbamɔm na ŋiker ŋilee pu.”

²³ Le Naamann bui u ke, “M gaŋ si, gaa tikur aamombil ŋichur ŋiloob.” U nan sil di kina aamombil di gbin tikpalɔnn tilee ponn ni, ki kpee tiwanpeenkaan nyaan ŋiker ŋilee pu ki di tii waanaagbiib bilee, le bi di loln Gehasi pu nsan.

²⁴ Baah nan ti fuu Elaisa aah koo ligongoln li chee na, le Gehasi gaa tikpalɔnn tilee ngbaan ki di koon lidichal ngbaan ni, le ki cha Naamann aanaagbiib ngbaan gir.

²⁵ U nan gir koo lichiln ni, le Elaisa baa u ke, “Aa nyan ni la chee?” Le u gar u ke, “Uninkpel, maa buen nibaa.”

²⁶ Le Elaisa bui u ke, “Uja ngbaan aa ba nyan waatɔroku ni ki tooh ni si nsan pu na, maawiin aa ba bi nima chee ee? N‑yoonn mue aa ye n‑yoonn mu unii ga gaa ilik, ni tiwanpeenkaan, ni olif aasui aasar, ni ŋisubil aasui aasar, ni ipiih, ni inaa, bee binaagbiib na.

²⁷ Tɔ, Naamann aaween ngbaan ga gir ni aa pu, le aa ni aayaabitiib ga li kpa i ki ti saa n‑yoonn mu kaa kpa ndoon na.” Gehasi aah siir na, le iween ngbaan pii u, uwon nan piir chak chak.