2 Bibɔrb 4 - Uwumbɔr aagbaŋ

Elaisa aah ter ukpopiigiin pu na

¹ Ukpopii u nan ye Uwumbɔr aabɔnabr bibaa ponn ni ubaa aapuu na nan buen Elaisa chee ki ti bui u ke, “Uninkpel, nchal kpo a. Aa nyi ke u nan ye unii u san Uwumbɔr na la. Tɔ, u nan joo uja ubaa aapɔln, le u dan ke u nan yoor njapɔtiib bilee na ti teen lipɔln ngbaan, aan bi ti li ye waanaagbiib.”

² Le Elaisa baa u ke, “M ga ter si kinye? Tuk mi, aa kpa ba linampal?” Le u gar u ke, “Maa ki kpa nibaa ki kpee nkpan siib mu bi likpasambil ni na pu.”

³ Le Elaisa bui u ke, “Li cha aaŋeen aatɔtiib chee ki ti pinn ŋikpasambikuun ŋi mɔk aa ga kan na.

⁴ Le aa ni aajapɔtiib koo nimi aadichal ni ki di mbisamɔb laŋ, ki piin ki li kpaar nkpan na ŋani ŋikpasambil ŋi ni pinn na ni. Libaa yaa ti gbiin kan, ni di li siin n‑gbaan.”

⁵ Le upii ngbaan ni ujapɔtiib koo bido le ki di mbisamɔb laŋ, le ki yoor likpasambil waatiir li kpa nkpan na, le ki kpaar ŋani ŋikpasambil ŋi ujapɔtiib joo laani u na ni.

⁶ Baah kpaar gbiin ŋikpasambil mɔmɔk na, le u baa ke libaa gur aan laa gur. Le ujapɔɔn ubaa bui u ke, “Kookoo yaal le bi na.” Le nkpan sil, kaa ki nya ni.

⁷ Le u gir buen Uwumbɔr aabɔnabr Elaisa chee, le u bui u ke, “Ti di nkpan ngbaan kooh ki pa saapɔn, ŋimombil ga gur ki ga kpiin aa ni aajapɔtiib.”

Elaisa ni Sunem aapii uwankpadaan na

⁸ Daalbaadaal le Elaisa nan buen Sunem aatiŋ ni, le upii uwankpadaan ubaa bi nima. U nan yin u ke u nan ji udo tijikaar. Ki nyan liyaadaal ngbaan, u yaa nan ki buen Sunem aatiŋ ni kan, upii ngbaan do le u ji.

⁹ Le upii ngbaan nan bui uchal ke, “M dak nsui ni ke uja u choo do n‑yoonn mɔmɔk na ye Uwumbɔr aanii u kaa kpa tijɔŋ na la.

¹⁰ Cha ti ŋa kidiwaatiir kibaa timi aadichal aapaacham, ki siin tiwandookaan, ni teebul, ni lijal, ni karyaa ki ponn ni. Le u yaa ki dan u nan mann timi kan, u li doo nima.”

¹¹ Daalbaadaal le Elaisa nan gir ni Sunem aatiŋ ni, le ki jon buen waadiik ni u ti fuur.

¹² U nan tun waatutunn Gehasi ke u ti yin ni upii ngbaan. Waah nan fuu ni na,

¹³ le Elaisa bui Gehasi ke, “Baa u ke m ga ŋa ba tii u, waah pɔɔni ubaa ki ter timi pu na pu. Nibaakan u ga li neen ke m buen ubɔr chee, bee butɔb aajab aaninkpel chee ki ti len tibɔnyaan tii u.” Le u gar u ke, “M kpa maah ban tiwan ni mɔmɔk maanib ponn ni do na.”

¹⁴ Le Elaisa baa Gehasi ke, “M ga ŋa ba tii u?” Le u gar u ke, “Tɔ, waa kpa ubijabo, uchal mu por.”

¹⁵ Le Elaisa bui u ke, “Yin ni u ke u dan do.” Le u dan ki nan sil mbisamɔb ni,

¹⁶ le Elaisa bui u ke, “Libiln li choo na, kinakokoona aa ga li ŋmab ubijabo aaŋaal ni.” Le u teen ke, “Uninkpel, m gaŋ si ke aa taa gii mi inyamɔn. Aa ye Uwumbɔr aanii la.”

¹⁷ Tɔ, Elaisa aah len pu na, libiln aah nan saa n‑yoonn ngbaan na le u ma ubijabo.

¹⁸ Ŋibin nan jer, le lijikaacheel yoonn, kichakpiik kibaa ni le ubo ngbaan buen ute chee. Ute ni bijikaacheeb nan bi kisaak ni la.

¹⁹ Libuul ni le u faa nkuun ki bui ute ke, “N‑yil wu la. N‑yil wu la.” Le ute bui waatutunn ubaa ke, “Yoor ubo ngbaan ti tii una.”

²⁰ Ututunn ngbaan nan di u ti tii una, le u di u puin utaa pu ki ti saa nwiin aakaasisik ni, le ubo ngbaan kpo.

²¹ Una nan yoor u le ki di u koon Elaisa aadiik ni, le ki ti di u paan waawandookaan pu, le ki di kidiik ngbaan laŋ ki siir.

²² Le u yin ni uchal ki nan bui u ke, “Cha ututunn li joo ni mi ubon do. M ban ke m buen Uwumbɔr aabɔnabr Elaisa chee la. M ga gir ni dandana.”

²³ Le uchal baa u ke, “Ba ŋa aa ban aa buen din wee? Naa ye Likpaakool daal, kaa ye Uŋmapɔɔn Aajim aayoonn mu.” Le u gar u ke, “Taa cha ni muk si.”

²⁴ Le u cha bi buu ubon ngbaan tii u, le u bui ututunn ngbaan ke, “Cha ubon ngbaan li chuun mala mala ki taa sil siib, see m ti bui si ke aa cha u sil,”

²⁵ le ki siir kal nsan pu, ki buen Kamel Aajool paab, Elaisa aah bi nin chee na. U nan laa bi ni daa le Elaisa waa waah choo pu na, le ki bui waatutunn Gehasi ke, “Lik, Sunem aapii na le ti choo na.

²⁶ Tooh u nsan pu mala ki ti baa lik ke udo ŋan aan naa ŋan; baa uchal, ni ujapɔɔn bɔr.” Upii ngbaan nan bui Gehasi ke tiwan mɔmɔk ŋan u chee,

²⁷ le waah ti fuu Elaisa chee na, u gbaan unimbiin ni le ki bub chuu utaal. Le Gehasi nan ban u tur u foor nima, le Elaisa bui u ke, “Di cha u. Saa waa ke usui bii sakpen aa? Uwumbɔr mu aa tuk mi ti ponn ni tibaa.”

²⁸ Le upii ngbaan nan bui u ke, “Uninkpel, m nan mee si ubijabo oo? Maa nan bui si ke aa taa fiin maamakl aa?”

²⁹ Le Elaisa fenn lik Gehasi wɔb le ki bui ke, “Yoor maajaangbeek ki li san mala. Taa sil nsan ni ke aa doon unii ubaa, le unii yaa doon si kan, taa sil ke aa kii. Li cha lidichal ngbaan ni ki ti di maajaangbeek jɔnn ubo ngbaan pu.”

³⁰ Upii ngbaan nan bui Elaisa ke, “M puu maah kii tii Uwumbɔr ni sin pu na ke maan siir cha si.” Le bi mɔmɔk bilee gir dii tɔb cha.

³¹ Gehasi nan loln nsan ki ti di Elaisa aajaangbeek jɔnn ubo ngbaan pu; tɔ, limɔkl libaa, bee kifuuk kibaa aa nan bi ki mɔk ke u beenin kpa limɔfal. Kina pu le u nan gir buen Elaisa chee ki ti bui u ke, “Ubo ngbaan aa finn.”

³² Elaisa aah ti fuu na, u nan koo kidiik ngbaan ni ubaa la, le ki kan ke ubo ngbaan kpo ki dɔ tiwandookaan pu.

³³ U nan di kidiik ngbaan piin le ki mee Uwumbɔr,

³⁴ le ki doon paan ubo ngbaan pu, le ki di umɔb, ni unimbil, ni uŋaal paan ubo ngbaan aamɔb, ni unimbil, ni uŋaal pu. Waah taln dɔ paa ubo ngbaan pu na, le ubo ngbaan aawon piin ki bi toŋni.

³⁵ Elaisa nan fii, le ki chuun gonni kidiik ngbaan ni, le ki ti ki doon paan ubo ngbaan pu. Ubo ngbaan nan chiin nfum mulole, le ki likr unimbil.

³⁶ Elaisa nan yin Gehasi, le ki bui ke u yin ni ubo ngbaan aana. Upii ngbaan aah koo ni na, le Elaisa bui u ke, “Aajapɔɔn sɔ.”

³⁷ U nan tar lir Elaisa aanimbiin ni le unimbil wɔb ti meeh kitiŋ; le u fii sil ki yoor ujapɔɔn ki di nyan.

Ŋijinjii aatun ŋilee ŋiken

³⁸ N‑yoonn mu nkon nan lir kitiŋ ngbaan mɔmɔk pu na, le Elaisa gir ni Gilgal aatiŋ ni. Uwumbɔr aabɔnabtiib bibaa nan bi u chee, le u bui waatutunn ke u di likumbusakpeln tɔŋ mmii pu ki ŋaa tikpin tii bi.

³⁹ Le bi ponn ni ubaa buen ikpaakon ni ke u ti ban ni tikpifar. U nan ti kan timoor ni aapɔlaajol, le ki ker waah ga ŋmaa tun pu na. U nan di ŋi gir ni le ki nan chɔi chɔi le ki di ŋa tikpin ngbaan ni, kaa nyi naah ye tiwan ni na.

⁴⁰ Bi nan kpaar tikpin ngbaan siin bijab ngbaan ke bi wob, tɔ, baah wob lik na, le bi teen bui Elaisa ke, “Ni ye njinn la,” le kaa wob ti.

⁴¹ Le Elaisa cha bi joo ni u n‑yon, le u di mu mee ŋa tikpin ngbaan ni, le ki bui ke, “Bar tikpin tii bi man.” Le nibaa aa nan ki bi ti ni.

⁴² N‑yoonn muken, le uja ubaa nan nyan ni Baal Salisa aatiŋ ni, ki joo ni waajikaapɔnn aaboroboro kpin moninko, ni njikaabipɔm nan tii Elaisa. Le Elaisa bui waatutunn ke u di kina aajikaar kpiin Uwumbɔr aabɔnabtiib ngbaan,

⁴³ le ututunn ngbaan gar u ke, “Aa dak ke nimina ga ŋeer bijab nkub aa?” Le Elaisa bui ke, “Di tii bi aan bi ji, ba pu? Uwumbɔr bui ke bi ga ji ki gur ti.”

⁴⁴ Le ututunn ngbaan di tijiir ngbaan siin bi, le Uwumbɔr aah len pu na, bi nan jin, le tijikaar gur.