2 Bibɔrb 3 - Uwumbɔr aagbaŋ

Israel yaab ni Moab yaab aatɔb aabɔr

¹ Juda aabɔr Jehosafat aanaan aabin kipiik ni lininiin ponn ni, le Ahab aajapɔɔn Joram jin Israel aatiŋ aanaan, le ki bi Samaria aatiŋ ni ki joo waanib ki ti saa ŋibin kipiik ni ŋilee.

² U nan tun Uwumbɔr titunwanbir, ki mu aa nan tee pii ute, bee una Jesebel aah nan tun pu na. U nan ber ute aah nan naan Baal aawaal li siin ke bi li dooni li na.

³ Tɔ, Nebat aajapɔɔn Ubɔr Jeroboam u nan puen u jin nnaan na aah nan bi pu na, u mu bi kina la, le ki nan cha Israel yaab tun titunwanbir kaa di cha.

⁴ Moab aatiŋ aabɔr Mesa nan kpiini ipiih la, le libiln mɔk ni kan, u tii Israel yaab aabɔr tipar ipihbi ŋichur nkub, le ki di ipiih ŋichur nkub mu aakor mu kpee.

⁵ Tɔ, Israel yaab aabɔr Ahab aah nan kpo na, Moab aabɔr Mesa nan nyan Israel yaab aapuwɔb ki pa sil bi pu.

⁶ Libuul ni le Ubɔr Joram nyan Samaria aatiŋ ni ki kuun waatɔb aajab mɔmɔk.

⁷ U nan tun Juda yaab aabɔr Jehosafat chee ke: “Moab aatiŋ aabɔr yii maamɔb; saan ter mi aan ti faa u butɔb aa?” Le Ubɔr Jehosafat gar u ke, “M ga ter si. M ye aa yoo la, ki kpee maajab ni maataan mu.

⁸ Mulasan aan ti ga dii ki ti tak bi?” Le Joram bui ke, “Ti ga dii ni daa na la, ti ga bɔ dii Edom aateersakpiin aasan la.”

⁹ Le Ubɔr Joram, ni Juda, ni Edom aatim aabɔrb nyan kal nsan pu. Baah chuun ti saa iwiin ilole na, le baanyun doo, le nnyun aa ki bi bijab ni tiwakor ti nan tu baatun na nyu.

¹⁰ Ubɔr Joram nan len ke, “Ti doo a. Uwumbɔr di timi bibɔrb bitaa bimina ŋa Moab aatiŋ aabɔr aaŋaal ni a.”

¹¹ Le Ubɔr Jehosafat baa u ke, “Uwumbɔr aabɔnabr ubaa aa bi do aan ti cha u baa Uwumbɔr tii timi ii?” Le Ubɔr Joram aajab aaninkpel ubaa bui ke, “Safat aajapɔɔn Elaisa bi do. U nan ye Elaija aateter la.”

¹² Le Ubɔr Jehosafat bui ke, “U ye Uwumbɔr aabɔnabr bamɔnn la.” Kina pu le bibɔrb bitaa ngbaan dii buen Elaisa chee.

¹³ Le Elaisa baa Israel yaab aabɔr ke, “M ga ŋa kinye aan ki ter si? Li cha aate ni aana aah nan chaa ŋiwaa aabɔnabr bi chee na.” Le Joram gar u ke, “Aayii. Uwumbɔr le di timi bibɔrb bitaa bimina ŋa Moab yaab aabɔr aaŋaal ni.”

¹⁴ Le Elaisa gar u ke, “M puu Uwumbɔr u bi n‑yoonn mɔmɔk, aan m dii u na pu ke, m yaa kaa ba pak aamaantɔ Juda yaab aabɔr Jehosafat kan, maa ba ga gar si.

¹⁵ Tɔ, ban ubeegbaar ubaa tii mi.” Ubeegbaar ngbaan aah bi gbaa waabeek na, le Uwumbɔr aapɔɔn sunn ni Elaisa pu,

¹⁶ le u bui ke, “Uwumbɔr aah len pu na sɔ: ‘Gbii inyunsan mbufan mumina pu, ni kookoo man.

¹⁷ Tɔ, naan kan utaal bee libuln, mbufan mumina mu ga tee gbiin nnyun, le nimi, ni nimi aawakor, ni tiwakor ti tu ŋitun na ga kan nnyun ki nyu ti gur.’”

¹⁸ Le Elaisa ki nab ke, “Tɔ, nimina ye Uwumbɔr chee tiwan ni kaa pɔɔ ke u ŋa na la; u ga ki cha ni nyaŋ Moab yaab.

¹⁹ Ni ga gaa baatim mu ŋan ki pɔɔ na mɔmɔk; ni ga per baasubil aasui mɔmɔk lir, ki kpaa baayayak aanyunbun mɔmɔk, ki di ŋitakpal gbiin baakpaakon i aatan nyuun na pu ki bii i.”

²⁰ Kitaak aah woln na, kichakpiik mɔmɔk aameel yoonn, le nnyun puu nya ni Edom aatiŋ wɔb, le ki biin kitiŋ ngbaan mɔmɔk pu.

²¹ Moab yaab aah nan ŋun ke bibɔrb bitaa ngbaan dan ke bi nan tak bi na, le bi yin ni bijab bi mɔmɔk ga ŋmaa ŋum tijawan na, bi por na, ni bi laa par na mɔmɔk, le ki nan lul bi siin baatinaanmɔk.

²² Naah woln aan bi fii na, le bi kan nwiin aah nyii nnyun pu aan mu mann ke nsin na.

²³ Le bi teen ke, “Ni ye nsin la. Nibaakan bibɔrb bitaa ngbaan ga li jan biŋmeen ni le ki ku tɔb. Cha ti buen ti yoor baawan man.”

²⁴ Tɔ, baah ti fuu bima ngbaan aakookoo yaan chee na, le Israel yaab fii lir bi pu ki jenn bi giin bipuwɔb. Israel yaab ngbaan nan beenin ka bi pu, le ki ku bii Moab yaab,

²⁵ ki kuln baatim. Bi yaa ti bi jer nkpaakon ni kan, le Israel aanii mɔk di litakpal mee lii mu ponn ni, le ki di ŋitakpal biin ikpaakon ngbaan mɔmɔk pu ti doo; bi nan ki kpaa baayayak aanyunbun, ki per baasubil aasui mu lir. Kookoo na, litiyil Kir Heres le nan ti gur, le bijab bi gbaa ŋifulaatan na, lul goln ki, ki tak ki mu.

²⁶ Buyoonn Moab aatiŋ aabɔr ti bee ke bijab bi nyaŋni u na, le u nyan bijab bi joo kijaak aajum jaa na ikui ilole, ke u di bɔ dii bidim aajab ni ki san buen Siria aatiŋ aabɔr chee, le kaa nan ŋman,

²⁷ le ki chuu ujapɔpol u ba ga nan nab waanaan pu na ki di kɔr toor kitork kitiŋ ngbaan aagoln pu tii Moab aawaal. Nimina nan chuu Israel yaab ijawaan pam le bi siir cha kitiŋ ngbaan ki gir kun baatiŋ pu.