2 Bibɔrb 25 - Uwumbɔr aagbaŋ

Jerusalem aatiŋ aah lir pu na

¹ Sedekia nan nyan Ubɔr Nebukadnesar aapuwɔb, kina pu na, Sedekia aanaan aabiwawaer ponn ni aaŋmapiik aawiin kipiik daal le Nebukadnesar ni waajab mɔmɔk dan nan tak Jerusalem aatiŋ. Bi nan ti kuun kal kitiŋ ngbaan aagbaan, le ki maa ŋibimbin tam tam kaagon ti mann to,

² ki ka nima kina ki ti saa Sedekia aanaan aabin kipiik ni libaa ni.

³ Libinbaal ngbaan aaŋmanaa aawinwae daal, buyoonn nkon nan ti moo nyaŋ aan binib aa ki kpa nibaa bi ji na,

⁴ le bi nan tur kitiŋ ngbaan aagon lir. Tɔ, Babiloŋ aajab nan gob kitiŋ ngbaan ti to, Juda aajab mu nan ti loon san kinyeek ki ŋmar. Bi nan dii libɔrdichal aasaak aasan la, le ki dii mbisamɔb mu bi ŋigon ŋilee ngbaan aakaasisik ni na, le ki di toŋ Jɔɔdann Aafataŋ wɔb.

⁵ Tɔ, Babiloŋ aajab ngbaan nan di paan Ubɔr Sedekia pu, le ki ti chuu u Jeriko aatiŋ pu, le waajab mɔmɔk san cha u.

⁶ Bi nan di Sedekia buen Ubɔr Nebukadnesar u nan bi Ribla aatiŋ ni na chee, le Nebukadnesar nan siin baah ga ŋa u pu na nima chee.

⁷ Sedekia nan si lik, le bi ku ujapɔtiib unimbil ni, le Nebukadnesar cha bi chuu lokr Sedekia aanimbil, le ki di tikululn gbin u, ki di u buen Babiloŋ aatiŋ ni.

Baah nan ber Uwumbɔr Aadichal pu na

⁸ Ubɔr Nebukadnesar aah nan ye Babiloŋ aatiŋ aabɔr pu na aabin kipiik ni liwawaer ponn ni aaŋmaŋmu aawiin ilole daal, le waasusur Nebusaradann, u nan ki ye waajab aayidaan na, nan koo Jerusalem aatiŋ ni.

⁹ U nan see Uwumbɔr Aadichal, ni libɔrdichal, ni binikpaam bi mɔmɔk nan bi Jerusalem aatiŋ ni na aadichal lii;

¹⁰ le waajab mu tur kaagon lir.

¹¹ Nebusaradann nan di binib bi gur ki ponn ni na buen Babiloŋ aatiŋ ni, ni biwanŋab bi nyi baatun mbamɔm ki beenin bi nima na, ni binib bi nan nyan ti di bibaa kpee Babiloŋ yaab pu na.

¹² Tɔ, u nan di cha bigiim bi kaa kpa liwankpal libaa na, le ki cha bi tun lituln ŋisubil aasar, ni tijikaar aakpaakon ni, Juda aatiŋ ni.

¹³ Babiloŋ yaab ngbaan nan gbaa wiil tikumann aajaatɔlk tiib, ni tɔroku tiib bi nan bi Uwumbɔr Aadichal ni na, ki kpee tikumann aakin na, le ki yoor tikumann ngbaan mɔmɔk buen Babiloŋ aatiŋ ni.

¹⁴ Bi nan ki yoor tiwan ni bi joo faar timoor, ni nfatan, kitork aabimbiln pu na. Bi nan yoor tiwan ni bi joo toor karyaa tiib na, ni ŋisambil ŋi bi joo teŋni kitork aasin na, ni ŋisambil ŋi bi joo seer tulalee aayon na, ni tikumann aawan ni mɔmɔk bi joo tun lituln Uwumbɔr Aadichal ni na.

¹⁵ Bi nan yoor salmaa, ni tikunabr aawan mɔmɔk: bi nan yoor yoor nsambim ni ŋisambil ŋi bi joo moi mmii na.

¹⁶ Ubɔr Solomonn aah nan ŋa tikumann aawan ni bi joo tun Uwumbɔr Aadichal ni aatuln na: jaatɔlk tiib bilee na, ni tɔroku tiib, ni nkin sakpiin na, nan nyuun sakpen ke bi ŋaŋ naanyunyuun.

¹⁷ Jaatɔlk tiib bilee na nan naahn tɔb la: bimɔk aafɔfɔk nan ye ŋitaa moninko ni ŋilole, le bi naan tiwan nibaa tɔŋ bi mɔmɔk paab, le naafɔfɔk nan ye ŋitaa ŋinaa ni ligeln. Bi nan naan ŋisubinyaan mann goln ni. Bi nan di tikumann le naan ŋi mu.

Baah di Juda aanib buen Babiloŋ aatiŋ ni pu na

¹⁸ Butɔb aajab aayidaan Nebusaradann nan ki chuu Utotoorninkpel Seraya, ni utotoor u paa u pu, bi yin u ke Sefania na, ni Uwumbɔr Aadichal ni aanikpaam bitaa buen tinaagbiir ni Babiloŋ aatiŋ ni.

¹⁹ U nan ki chur kitiŋ ngbaan ponn ni Juda aajab aayidaan, ni ubɔr aasusurb biŋmu bi nan beenin bi ki ponn ni na, ni uja u paa bijab aayidaan pu ki nan joo baagbann na, ni binikpaam imonko itaa bibaa mu.

²⁰ Nebusaradann nan di bi buen Babiloŋ aatiŋ aabɔr u nan bi Ribla aatiŋ

²¹ ki bi Hamaf aapepel ni na chee. Nima chee ubɔr ngbaan nan ti cha bi ku bi. Kina le bi nan di Juda aanib buen tinaagbiir ni ki cha baatiŋ.

Juda aayidaan Gedalia aabɔr

²² Babiloŋ aatiŋ aabɔr Nebukadnesar nan di Ahikam aajapɔɔn Gedalia u aayaaja nan ye Safann na ŋa Juda aayidaan, le ki cha u joo Juda aanib bi mɔmɔk baa nan di bi buen Babiloŋ aatiŋ ni na.

²³ Juda aaninkpiib ni baajab bi kaa nan di bibaa tii Babiloŋ yaab na aah ŋun kina na, le bi buen Gedalia chee Mispa aatiŋ ni. Bininkpiib ngbaan le nan ye Netania aajapɔɔn Ismael, ni Karea aajapɔɔn Johanann, ni Tanhumef u nyan ni Netofa aatiŋ ni na aajapɔɔn Seraya, ni Maaka aatiŋ aanii Jesania.

²⁴ Le Gedalia nan bui bi ke, “M puu tii nimi ke ijawaan ibaa aa bi ni ga li san Babiloŋ aaninkpiib. Kal kitiŋ kee pu man, ni yaa tun tii Babiloŋ aatiŋ aabɔr kan, ni ga li ŋan tii nimi.”

²⁵ Tɔ, libinbaal ngbaan aaŋmalole ni, le Netania aajapɔɔn Ismael, u aayaaja nan ye Elisama, aan u nyan ni libɔrdichal ni na, di bijab kipiik buen Mispa aatiŋ ni ki ti tak Gedalia ki ku u. U nan ku Israel yaab, ni Babiloŋ yaab bi nan bi u chee na mu.

²⁶ Le Israel yaab, biwankpadam ni bigiim mɔmɔk, ki kpee butɔb aajab aaninkpiib san Babiloŋ yaab ijawaan, le ki fii di buen Ijipt aatiŋ ni.

Baah nyan Jehoyachinn kiyondiik ni pu na

²⁷ Libiln li ponn ni Efil‑Merodak nan jin Babiloŋ aatiŋ aanaan na, u nan san Juda yaab Aabɔr Jehoyachinn kinimbaak le ki nyan u kiyondiik ni. Nimina nan ŋa baah nan chuu Jehoyachinn buen tinaagbiir ni pu na aabin piitaa ni lilolole aaŋmapiik ni ilee aawiin moninko ni ilole daal la.

²⁸ Efil‑Merodak nan san u kinimbaak ki tii u nsisii mu kpa kipak na ki jer bibɔrb bi mu nan bi Babiloŋ ni tinaagbiir ni na.

²⁹ Kina pu na, Jehoyachinn nan kan nsan ki kpeln waayondiik ni aawanpeenkaan, ki gur ji ubɔr chee tijikaar le ki ti kpo.

³⁰ Waah nan bi limɔfal ni n‑yoonn mumɔk na, bi nan luu u iwiin mɔmɔk aajikaar kina le ki ti saa waakundaal.