2 Bibɔrb 24 - Uwumbɔr aagbaŋ

¹ Jehoyakim aah nan ye ubɔr na, le Babiloŋ aatiŋ aabɔr Nebukadnesar nan koo ni Juda aatiŋ ni, le ki muk Jehoyakim u bi u taab ki ti saa ŋibin ŋitaa; nee aapuwɔb le u nyan upuwɔb.

² Uwumbɔr nan cha Babiloŋ aajab, ni Siria aajab, ni Moab aajab, ni Amonn aajab dan ki nan tak Jehoyakim le ki kuln Juda aatiŋ. Ni nan ŋa ke Uwumbɔr aah nan cha waatutum bi ye waabɔnabtiib na len ke u ga ŋa pu na la.

³ Uwumbɔr le nan cha ni ŋa. U nan ŋa kina ke u jenn Juda aanib unimbiin ni, Ubɔr Manase aatunwanbir pu,

⁴ ni waah nan ku binib bi kaa tun taani ubaa na pu na la. Uwumbɔr aa nan ŋmaa di cha pinn Manase kina pu.

⁵ Jehoyakim aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

⁶ Jehoyakim nan kpo, le ujapɔɔn Jehoyachinn nab waanaan pu.

⁷ Ijipt aatiŋ aabɔr ni waajab aa nan ki nyan Ijipt aatiŋ ni, ba pu? Babiloŋ aatiŋ aabɔr le nan gur joo lipepel li nan ye Ijipt aapepel na, ki nyan Yufrates Aamɔɔl mɔk ki ti saa Ijipt aaŋangan wɔb aatinaanmɔk.

Juda yaab aabɔr Jehoyachinn aabɔr

⁸ Jehoyachinn nan ye ŋibin kipiik ni ŋiniin aanii le ki jin Juda aanaan, le ki bi Jerusalem aatiŋ ni ki joo waanib ki ti saa iŋmal itaa. Una le nan ye Jerusalem aatiŋ aanii Elnatann aabisal Nehusta.

⁹ Jehoyachinn nan dii ute aasan, le ki tun Uwumbɔr titunwanbir.

¹⁰ Ni nan ye waanaan yoonn le Babiloŋ aatiŋ aabɔr Nebukadnesar aajab aaninkpiib di baajab buen Jerusalem ki ti gob ki.

¹¹ Baah nan ŋa kina ki ka kii na, le Nebukadnesar ubaa buen Jerusalem aatiŋ ni,

¹² le Ubɔr Jehoyachinn, ni una, ni ujapɔtiib, ni waaninkpiib, ni libɔrdichal ni aaninkpiib di bibaa tii Babiloŋ aajab. Nebukadnesar aanaan aabiln lininiin ni, le u nan chuu Jehoyachinn tinaagbiir,

¹³ le ki yoor Uwumbɔr Aadichal ni, ni libɔrdichal ni aawangol buen Babiloŋ aatiŋ ni. Uwumbɔr aah nan puen len pu na, Nebukadnesar nan wiil salmaa aawan ni mɔmɔk Ubɔr Solomonn nan ŋa ke bi li joo tun Uwumbɔr Aadichal ni lituln na.

¹⁴ Nebukadnesar nan chur Jerusalem aanib mɔmɔk, ni mbɔrbim mɔmɔk, ni bisalolm mɔmɔk tinaagbiir. Bi mɔmɔk nan ti kpaan binib ŋichur kipiik la. U nan chur biwanŋab bi nyi baatuln mbamɔm na mɔmɔk, ki chur bichaab mu tinaagbiir, le ki di cha bigiim baanja Juda aatiŋ pu.

¹⁵ Nebukadnesar nan chuu Jehoyachinn tinaagbiir le buen Babiloŋ aatiŋ ni. U nan chuu Jehoyachinn aana, ni upuutiib, ni waaninkpiib, ni Juda aasalolm mɔmɔk buen.

¹⁶ Nebukadnesar nan chuu Juda aanikpaam mɔmɔk buen Babiloŋ aatiŋ ni, bi nan ti kpaan binib ŋichur ŋilole la, le biwanŋab bi nyi baatuln mbamɔm na, ni bichaab mu ti kpaan lichur libaa, bi mɔmɔk nan ye binib bi kpa mpɔɔn ki ga ŋmaa tun butɔb aatuln na la.

¹⁷ Nebukadnesar nan di Jehoyachinn aatewaa Matania le kaan Juda aabɔr, le ki kpeln u liyimbil ke Sedekia.

Juda yaab aabɔr Sedekia aabɔr

¹⁸ Sedekia nan ye ŋibin moninko ni libaa aanii le ki jin Juda aatiŋ aanaan le ki bi Jerusalem aatiŋ ni ki joo waanib ki ti saa ŋibin kipiik ni libaa. Una le nan ye Libna aatiŋ aanii Jeremia aabisal Hamutal.

¹⁹ Ubɔr Sedekia nan tun Uwumbɔr titunwanbir ke Ubɔr Jehoyakim aah nan tun pu na la.

²⁰ Uwumbɔr aaŋuul nan fii Jerusalem ni Juda aanib pu sakpen, le u jenn nyan bi unimbiin ni.