2 Bibɔrb 23 - Uwumbɔr aagbaŋ

Josia aah kuln ŋiwaa aadoon pu na

¹ Ubɔr Josia nan kuun Juda ni Jerusalem aatim aasalolm mɔmɔk,

² le bi mɔmɔk kpaan dii buen Uwumbɔr Aadichal ni, le bitotoorb, ni Uwumbɔr aabɔnabtiib, ni binib bi gur ki ye biwankpadam ni bigiim na mɔmɔk nan dii bi buen. Bi mɔmɔk aanimbil ni, nima chee, le ubɔr karn tipuur aagbaŋ ki bi nan kan ki Uwumbɔr Aadichal ponn ni na mpɔɔn pu tii bi.

³ U nan si gbɔk nnaan aajaatɔlk chee le ki puu tipuur tii Uwumbɔr ke u ga di usui kii waamɔb ki li joo waakaal ni waamɔkm, ki ŋa tipuur ngbaan aah ban pu, aan ni ŋmee dɔ kigbaŋ ngbaan ni na. Le binib ngbaan mɔmɔk mu puu ke bi ga li joo tipuur ngbaan.

⁴ Le Josia nan cha Utotoorninkpel Hilkia, ni waatotoorb bi paa u pu na, ni bikikiib bi nan kii Uwumbɔr Aadichal aabisamɔb na nyan ni Uwumbɔr Aadichal ponn ni tiwan ni mɔmɔk bi joo dooni liwaal Baal, ni liwaapii Asera, ni iŋmabi na li ponn ni. Ubɔr nan see ni mɔmɔk mmii ni n‑gbaan, Kidronn aafataŋ chee, le ki cha bi di naafatan buen Betel aatiŋ ni.

⁵ U nan nyan bitotoorb bi Juda yaab aabɔrb nan di kaan kaan ke bi li toor kitork, ŋiwaa aatork aabimbin pu, Juda aatim ni, ni nin chee duun Jerusalem aatiŋ na, baatun ni, bitotoorb bi mɔmɔk nan toor kitork tii liwaal Baal, ni nwiin, ni uŋmal, ni paacham aawan niken na, ni iŋmabi na, u nan nyan bi mɔmɔk.

⁶ U nan nyan liwaapii Asera aanaŋ Uwumbɔr Aadichal ni, le ki di buen Kidronn aafataŋ ni, le ki ti di li see mmii ni, le ki san laafatan ti kpaln kitangbaak, le ki di kitangbaak ngbaan yaa yaa binib mɔmɔk aacheek ni.

⁷ U nan ber binib bi nan joo bibaa kooh tiwaadir ngbaan ni na aakookoo yaan. Nima chee le bipiib nan luu tiwanpeenkaan ni bi joo dooni liwaapii Asera na.

⁸ U nan di bitotoorb bi bi Juda aatim ni na buen Jerusalem aatiŋ ni, ki nan bii ŋibimbin ŋi mɔmɔk bi nan toor kitork ŋi pu na kitiŋ ngbaan mɔmɔk pu. U nan ki ber ŋibimbin ŋi bi nan maa tii uŋoob aawaal aan li bi kitiŋ ngbaan aayidaan Josua aabisamɔb chee na. Aa yaa chaa koo kitiŋ ngbaan ni kan, kina aabisamɔb ngbaan bi kitiŋ ngbaan aabisamɔbamɔnn na aaŋangan wɔb la.

⁹ Bitotoorb ngbaan aa nan ki kpa nsan ke bi ki tun lituln Uwumbɔr Aadichal ni, ki mu nan tee ga ŋmaa ŋmɔ boroboro u kaa kpa boroboro aanyɔk aan bitotoorb biken ŋmɔ na.

¹⁰ Ubɔr Josia nan ki bii kiwaachuk ki bi Hinom Aafataŋ ni, aan bi yin ki ke Tofef na, aan ubaa taa ki ŋmaa di ujapɔɔn bee ubisal kɔr toor kitork ki bi joo seer mmii ni na tii liwaal Molek.

¹¹ U nan ki nyan itaan i Juda yaab aabɔrb nan nyan siin ke bi li joo dooni nwiin na, le ki seer itaan aatɔroku tiib bi bi joo dooni kina aadoon na mmii ni. Tiwan ngbaan mɔmɔk nan si Uwumbɔr Aadichal aachiln ni, ki bi duun mbisamɔb, kaa daa Natann Melek, uninkpekpaan ubaa aakookoo yaan chee.

¹² Ubɔr Josia nan ber ŋiwaa aatork aabimbin ŋi Juda yaab aabɔrb nan maa tɔŋ Ubɔr Ahas aadir paab libɔrdichal aapaacham na mɔmɔk, le ki ber Ubɔr Manase mu aah nan maa ŋiwaa aatork aabimbin ŋi Uwumbɔr Aadichal aachin ŋilee na ponn ni na; u nan gbaa wɔi ŋiwaabimbin ngbaan le ki di ŋi mee Kidronn aafataŋ ni.

¹³ Josia nan bii ŋiwaa aatork aabimbin ŋi Ubɔr Solomonn nan maa Jerusalem aatiŋ ponn ni aawipuul wɔb, ki bi Olif Aajool aaŋangii wɔb na, ŋiwaabimbin ngbaan pu le bi nan dooni tijɔŋ aawaa. Nima le ye Saidonn aawaapii Astaate, ni Moab aawaal Kemos, ni Amonn aawaal Molek.

¹⁴ Ubɔr Josia nan gbaa wiil ŋiwaabimbin fɔfɔŋ na, ki gbaa wɔi liwaapii Asera aanaŋ, le ki di binib aakpab biin ŋaah nan si nin chee na.

¹⁵ Josia nan ki ber Nebat aajapɔɔn Jeroboam u nan di titunwanbir mɔk Israel yaab na aah nan maa tiwaadir ti Betel aatiŋ ni na. Josia nan tur liwaabimbiln ngbaan lii, le ki gbaa wɔi laatakpal, le ki san ŋi, ŋi ti kpaln kitangbaak; u nan ki see liwaapii Asera aanaŋ mu mmii.

¹⁶ Le Josia lik mann goln ubaa ki kan ŋikaakul ŋibaa ligongoln pu nima; le u cha bi kur nyan ikpab i bi ŋi ponn ni na le ki di see mmii ni, kitork aabimbiln ngbaan pu. U nan ŋa kina le ki bii kitork aabimbiln ngbaan. U nan ŋa Uwumbɔr aabɔnabr aah nan puen len ke ni ga ŋa pu buyoonn Ubɔr Jeroboam nan si libimbiln ngbaan chee njim mubaa ponn ni na. Josia nan lik mann le ki kan Uwumbɔr aabɔnabr u nan len ke kina ga ŋa na aakaakul.

¹⁷ Le u baa ke, “Ŋma aakaakul sɔ?” Le Betel aanib gar u ke, “Uwumbɔr aabɔnabr u nan nyan ni Juda aatiŋ ni ki nan len ke saah bi ŋani libimbiln ngbaan tiwan ni na ga ŋa na aakaakul ye.”

¹⁸ Le Josia bui ke, “Cha li li bi laah bi pu na man. Ubaa taa meeh waakpab.” Kina pu na, baa nan meeh waakpab, le kaa meeh Uwumbɔr aabɔnabr u nan nyan ni Samaria aatiŋ ni na mu aakpab.

¹⁹ Ubɔr Josia nan ber Israel yaab aabɔrb aah nan maa tiwaadir ti ntim mɔmɔk ni ki di fiin Uwumbɔr aaŋuul na. Waah nan ŋa Betel aatiŋ ni aatork aabimbiln pu na, kina le u nan ŋa ŋibimbin ngbaan mɔmɔk.

²⁰ U nan kɔr uwaadaan mɔk waah nan toor kitork libimbiln li pu na la, le ki di unibɔn aakpab see mmii ni libimbiln mɔk pu, le ki gir kun Jerusalem aatiŋ ni.

Josia aah nan jin Lakr‑jer Aajim pu na

²¹ Ubɔr Josia nan bui binib ngbaan ke bi ji Lakr‑jer Aajim ki nyuŋ Bidindaan Uwumbɔr, ke naah ŋmee nkaal aagbaŋ ni pu na.

²² N‑yoonn mu bibɔjirb nan joo litimbol ngbaan na ki nan saa din, Israel yaab aabɔrb, ni Juda yaab aabɔrb ubaa aa kee jin Lakr‑jer Aajim mubaa aan mu ti pii mumina.

²³ Tɔ, Josia aanaan aabin kipiik ni lininiin ponn ni, le bi nan ki jin Lakr‑jer Aajim, Jerusalem aatiŋ ni.

Josia aah nan ki kpeln mbimbin mu na

²⁴ Ubɔr Josia nan nyan Jerusalem aatiŋ ni, ni Juda aatim mɔmɔk ni, binib bi mɔmɔk bui ke bi ŋun bitekpiib aaliin na, ni bibɔɔb mɔmɔk, ni ŋidichal aawaa, ni ŋiwaa mɔmɔk, ni ŋiwaa aadoon mɔmɔk, ke u kan nsan aan ikaal i ŋmee kigbaŋ ki Utotoorninkpel Hilkia nan kan Uwumbɔr Aadichal ni na tun lituln.

²⁵ Ubɔr ubaa aa nan ki bi ki di usui mɔmɔk, ni waalandak mɔmɔk, ni waapɔɔn mɔmɔk tii Uwumbɔr, ki joo Moses Aakaal ke uma na; ubaa aa nan puen u ki jin nnaan ki bi ke uma na, le waah kpo na, ubaa aa ki paan u pu ki bi kina.

²⁶ Tɔ, Ubɔr Manase aah nan tun pu na nan puen fiin Uwumbɔr aaŋuusakpeln Juda aatiŋ pu, le laa ŋmaa sɔŋ n‑yoonn mue.

²⁷ Uwumbɔr nan bui ke, “Maah ŋa Israel aatiŋ pu na, kina le m ga ŋa Juda aatiŋ: m ga jenn nyan Juda aanib nnimbiin ni, le ki ga yii Jerusalem aatiŋ ki m lee ki na, ni Uwumbɔr Aadichal li ponn ni m bui ke bi li dooni mi na.”

Josia aanaan aah doo pu na

²⁸ Ubɔr Josia aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

²⁹ N‑yoonn mu Josia nan ye ubɔr na, le Ijipt aatiŋ aabɔr Neko nan di waajab buen Yufrates Aamɔɔl chee ke u ti ter Asiria aatiŋ aabɔrkpaan. Ubɔr Josia nan pɔɔn ubaa ke u kiir Ijipt aajab ngbaan Megido aatiŋ ni, le bi ku u butɔb ni, nima chee.

³⁰ Waaninkpiib nan di u ŋa itaan aatɔroku ni, le ki di u giin buen Jerusalem aatiŋ ni, le ki ti di u sub nnaan aacheek ni. Juda aanib nan nyan Josia aajapɔɔn Joahas le ki kaan u nnaan.

Juda yaab aabɔr Joahas aabɔr

³¹ Joahas nan ye ŋibin moninko ni ŋitaa aanii le ki jin Juda aanaan ki bi Jerusalem aatiŋ ponn ni, ki joo waanib ki ti saa iŋmal itaa. Una le nan ye Libna aatiŋ aanii Jeremia aabisal Hamutal.

³² U nan dii uyaajatiib aasan le ki tun Uwumbɔr titunwanbir.

³³ Waanaan nan doo buyoonn Ijipt yaab aabɔr Neko nan chuu u tinaagbiir Ribla aatiŋ ki bi Hamaf aatiŋ pu na ni la. Ijipt yaab aabɔr ngbaan nan cha Juda aanib pan tikunabr aamombil ti aanyunyuun ga pii njikaabim kuruwaa ŋichur ŋitaa ni ikui inaa na, ni salmaa u mu aanyunyuun ga pii njikaabim kuruwaa piitaa ni binaa na, ke ni li ye lampoo aamombil.

³⁴ Ubɔr Neko nan di Joahas aakpel Eliakim le kaan Juda aanaan, le ki kpeln waayimbil ke Jehoyakim. Ubɔr Neko nan di Joahas buen Ijipt aatiŋ ni, le u ti kpo nima chee.

Juda yaab aabɔr Jehoyakim aabɔr

³⁵ Ubɔr Jehoyakim nan gaal binib lampoo ki ŋeer baakpal la, ke u gaa ŋimombil Ijipt aatiŋ aabɔr aah siin pu na.

³⁶ Jehoyakim nan ye ŋibin moninko ni ŋiŋmu aanii le ki jin Juda aanaan, le ki bi Jerusalem aatiŋ ni ki joo waanib ki ti saa ŋibin kipiik ni libaa. Una le nan ye Ruma aatiŋ aanii Pedaya aabisal Sebida.

³⁷ Jehoyakim nan dii uyaajatiib aasan le ki tun Uwumbɔr titunwanbir.