2 Bibɔrb 22 - Uwumbɔr aagbaŋ

Juda yaab aabɔr Josia aabɔr

¹ Josia nan ye ŋibin ŋiniin aanii le ki jin Juda aatiŋ aanaan, ki koo Jerusalem aatiŋ ni ki joo waanib ki ti saa ŋibin piitaa ni libaa. Una le nan ye Boskaf aatiŋ aanii Adaya aabisal Jedida.

² Josia nan ŋani tiwan ni piir Uwumbɔr aasui na la; u nan dii uyaaja Ubɔr David aah nan dii nsan mu na, le ki joo Uwumbɔr aakaal kin kin.

Baah nan kan Uwumbɔr aakaal aagbaŋ pu na

³ Ubɔr Josia aanaan aabin kipiik ni lininiin ponn ni, le u nan tun libɔrdichal ni aagbaŋmeer, Asalia aajapɔɔn Safann, u aayaaja nan ye Mesulam na, Uwumbɔr Aadichal ni ki bui u ke:

⁴ “Li cha Utotoorninkpel Hilkia chee ki ti baa ŋimombil ŋi bitotoorb bi kii Uwumbɔr Aadichal aabisamɔb na gaal binib chee na aabɔr.

⁵ Bui u ke u di ŋimombil ngbaan tii binib bi yeh Uwumbɔr Aadichal aatoorn aatuln na.

⁶ Bima le ga pa bikpikpiib ni bidimaab, ni bitapɔlb, ki daa idɔ, ni ŋitakpal ŋi bi joo toor lidichal ngbaan na.

⁷ Bijab bi nan yeh lituln ngbaan na nan ye bibulchim la, kina pu na, naa nan ki kpa ke bi lik ke bi ji ŋimombil ngbaan kinye.”

⁸ Safann nan ti di ubɔr aamɔboln ngbaan tii Hilkia, le Hilkia bui u ke u kan Nkaal aagbaŋ, Uwumbɔr Aadichal ni. Hilkia nan di kigbaŋ ngbaan tii Safann, le u karn ki,

⁹ le ki gir buen ti bui ubɔr ke: “Saatutum gaa Uwumbɔr Aadichal aamombil ngbaan ki di tii bijab bi yeh lituln ngbaan aabɔr na;”

¹⁰ le ki ki bui ke, “Hilkia le di kigbaŋ kimina tii mi,” le ki karn ki tii ubɔr.

¹¹ Ubɔr aah ŋun kigbaŋ ngbaan aaponn ni aabɔr na, le u daa kar waawanpeenkaan ijawaan ni itaakpayɔl pu,

¹² le ki bui utotoor Hilkia ni Safann aajapɔɔn Ahikam, ni Mikaya aajapɔɔn Akbor, ni libɔrchiln ni aagbaŋmeer Safann, ni ubɔr aatutunn Asaya ke:

¹³ “Li cha man ki ti baa Uwumbɔr chee, min ni binib bi gur Israel ni Juda aatim ni na pu. Baa ki bee man kigbaŋ kimina aamɔkm aah ye pu na. Tiyaajatiib aah yii Uwumbɔr aamɔboln, kaa ŋa kigbaŋ kimina aah bui ke bi ŋa tiwan ni na pu, le u gee ti pu liŋuul.”

¹⁴ Ubɔr aamɔboln ngbaan pu le Hilkia, ni Ahikam, ni Akbor, ni Safann, ni Asaya nan buen upii u bi yin u ke Hulda na chee bi ti baa lik. Upii ngbaan nan ye Uwumbɔr aabɔnabr le ki koo baah laa maa Jerusalem ponn ni ŋidichapɔɔn lipepel li na ni. Uchal le nan ye Tikfa aajapɔɔn Salum. Salum aayaaja le nan ye Harhas. Uchal ngbaan le nan ye Uwumbɔr Aadichal ni aawanpeenkaan aaninkpel. Bi nan ŋeer tuk upii ngbaan tiwan ni ŋa na,

¹⁵ le u tuk bi ke bi gir ti tuk ubɔr

¹⁶ Uwumbɔr aabɔr timina ke: “M ban m daa Jerusalem aatiŋ ni kaanib mɔmɔk aatafal ke ubɔr aah karn pu kigbaŋ ngbaan ni na la.

¹⁷ Bi yii mi le ki dooni ŋiwaa, le ki di baah tun pu na mɔmɔk fiin maaŋuul. Maaŋuul fii Jerusalem aatiŋ pu, le kaan ki sɔŋ.

¹⁸ Min, Israel yaab Aadindaan Uwumbɔr aah kpa pu ki joo cha ubɔr wɔb na sɔ: ‘Aa pel tibɔr ti bi kigbaŋ ngbaan ni na,

¹⁹ le ki kpeln saabimbin ki sunn aabaa taab nnimbiin ni, ki daa kar saawanpeenkaan ki wii buyoonn aa ŋun maah nyan sil ke m daa Jerusalem ni kaanib aatafal pu na. M ga cha nima chee kpaln ijawaan sakpiin aabuul ni, le binib ga li joo nima aayimbil puuni lir biken pu. Tɔ, m ŋun saameel,

²⁰ le kaan ki cha ntafadaan mu ba choo Jerusalem pu na dan see saakun aapuwɔb. M ga cha aa kpo nsuudoon ni la.’” Le bijab ngbaan nan di tibɔr ngbaan nan tuk Ubɔr Josia.