2 Bibɔrb 21 - Uwumbɔr aagbaŋ

Juda yaab aabɔr Manase aabɔr

¹ Manase nan ye ŋibin kipiik ni ŋilee aanii le ki jin Juda aanaan, le ki koo Jerusalem aatiŋ ni ki joo waanib ki ti saa ŋibin piiŋmu ni ŋiŋmu. Una le nan ye Hefsiba.

² Uwumbɔr aanib aah nan tur koo ŋitimbol ŋi ponn ni, aan u jenn nyan ŋaanib bi na aabimbiyɔyɔl na le Manase nan gaa, le ki tun Uwumbɔr titunwanbir.

³ U nan ki gir maa tiwaadir ti ute Hesekia nan ber na. U nan maa ŋiwaa aatork aabimbin ke bi li dooni liwaal Baal nima chee, le ki naan liwaapii Asera aanaŋ, ke Israel yaab aabɔr Ahab aah nan ŋani pu na, ki dooni iŋmabi mu.

⁴ U nan maa ŋiwaa aatork aabimbin Uwumbɔr Aadichal li ponn ni Uwumbɔr len ke bi ga li dooni u nima chee na.

⁵ U nan maa kitork aabimbin ŋi pu bi ga li dooni iŋmabi na, Uwumbɔr Aadichal aachin ŋilee na ponn ni.

⁶ U nan di ujapɔɔn toor kitork ki di see mmii ni. U nan tun tibɔɔr ni beebee aanyɔk aatuln, ki chaa binib bi bui ke bi nyi fen aabɔr na chee, ki len bitekpiib chee tibɔr. U nan tun Uwumbɔr titunwanbir sakpen, le ki fiin waaŋuul.

⁷ U nan naan liwaapii Asera aanaŋ siin Uwumbɔr Aadichal li ponn ni Uwumbɔr nan bui David ni ujapɔɔn Solomonn ke: “Jerusalem ponn ni do chee na, Uwumbɔr Aadichal limina ponn ni, le ye nin chee m nyan Israel aanibol kipiik ni ŋilee aapepel mɔmɔk ni, ke binib li dooni mi na.

⁸ Le Israel aanib yaa ga kii maamɔkm, ni ikaal i mɔmɔk maatutunn Moses nan di tii bi na kan, maan kii ke binib jenn nyan bi kitiŋ ki m nan di tii biyaajatiib na ni.”

⁹ Tɔ, Juda aanib aa nan kii Uwumbɔr aamɔb, le Manase cha bi tun titunwanbir ti jer ŋitimbol ŋi Uwumbɔr nan kuln ŋi na aah nan tun pu na.

¹⁰ Uwumbɔr nan cha waatutum bi ye waabɔnabtiib na len ke:

¹¹ “Ubɔr Manase nan tun tijɔŋ sakpenn aawan nimina, u nan tun ni bir jer Kanaann aanib aah nan tun pu na, le ki di waawaa mɔk Juda aanib le bi tun titunwanbir.

¹² Kina pu na, min, Israel yaab Aadindaan Uwumbɔr ga cha tibɔbir tibaa aaboln dan Jerusalem ni Juda yaab pu, le unii umɔk ŋun ti pu na aalan ga ŋmal.

¹³ M ga daa Jerusalem yaab aatafal ke maah nan ŋa Samaria aatiŋ, ni Israel yaab aabɔr Ahab ni uyaabitiib pu na. M ga ŋar Jerusalem aatiŋ aanib ŋŋaan chain ke baah ŋir lisambil chain chain ki labr li chiŋni pu na.

¹⁴ M ga siir cha binib bi ŋmar na, le ki ga di bi tii baadim, le bi ga nyaŋ bi ki faar baatiŋ aawan mɔmɔk.

¹⁵ Maanib aah tun mi titunwanbir pu ki fiin maaŋuul ki nyan n‑yoonn mu biyaajatiib nan nyan ni Ijipt aatiŋ ni ki nan saa din wee na pu, le m ga ŋa bi kina.”

¹⁶ Manase nan ku binib bi kaa tun taani ubaa na sakpen, le Jerusalem aatiŋ ponn ni nan ti gur ye nsin ŋmeen; u nan ŋa kina le ki di kpee waah nan di ŋiwaa mɔk Juda aanib ki cha bi tun Uwumbɔr titunwanbir pu na pu.

¹⁷ Manase aah nan ki tun ŋitun ŋi mɔmɔk na, ni waatunwanbir aatun mɔmɔk bi Juda Aabɔrb Aatun Aagbaŋ ni la.

¹⁸ Manase nan kpo, le bi di u sub libɔrdichal aasaak ni, Usa aasaak le nan bi na, le ujapɔɔn Amonn nab waanaan pu.

Juda yaab aabɔr Amonn aabɔr

¹⁹ Amonn nan ye ŋibin moninko ni ŋilee aanii le ki jin Juda aatiŋ aanaan, le ki koo Jerusalem aatiŋ ni ki joo waanib ki ti saa ŋibin ŋilee. Una le nan ye Jotba aatiŋ aanii Harus aabisal Mesulemef.

²⁰ Amonn nan bi ke ute Manase na, le ki tun Uwumbɔr titunwanbir;

²¹ u nan taŋ ute aataabuu ni la, le ki dooni ŋiwaa ŋi ute nan dooni na.

²² U nan yii uyaajatiib Aadindaan Uwumbɔr, le ki yii waakaal mu.

²³ Amonn aaninkpiib nan nyan upuwɔb le ki kpokl ki ku u libɔrdichal ponn ni.

²⁴ Juda aanib nan ku binib bi nan ku Amonn na, le ki di ujapɔɔn Josia kaan Juda aabɔr.

²⁵ Amonn aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

²⁶ Bi nan di Amonn sub Usa aasaak aakaakul ni la, le ujapɔɔn Josia nab waanaan pu.