2 Bibɔrb 20 - Uwumbɔr aagbaŋ

Ubɔrkpaan Hesekia aah nan buŋ ki ki pɔɔk pu na

¹ N‑yoonn mumina le ubɔrkpaan Hesekia nan buŋ ki ti gur siib u kpo. Uwumbɔr aabɔnabr Aisaya, u aate nan ye Amos na nan buen u ti mann u, le ki ti bui u ke, “Uwumbɔr bui ke, ‘Gor tiwan mɔmɔk, ba pu? saan ŋmar. Gor ki li kii nkun.’”

² Le Hesekia fenn unimbil toŋ lidigbimal ki mee Uwumbɔr ke;

³ “Uwumbɔr, teer ke m di gaakii tun saatuln ni kipak ŋmeen la, ki pɔɔni mbaa n‑yoonn mɔmɔk ke m ŋa saah ban ke m ŋa pu na,” le ki wii sakpen.

⁴ Le Aisaya siir cha u, tɔ, waa nan kee jer libɔrdichal aachinjal, le Uwumbɔr bui u

⁵ ke u gir buen Hesekia u ye uma Uwumbɔr aanib aajojoor na chee, ki ti bui u ke, “Min Uwumbɔr u ye aayaaja David Aawumbɔr na ŋun saameel, ki kan saanyunyunn. M ga cha saaween sɔŋ, ki joo cha ni iwiin itaa na aa ga buen Uwumbɔr Aadichal ni.

⁶ M ga di ŋibin kipiik ni ŋiŋmu kpee saamɔfal pu. M ga gaa si ni Jerusalem aatiŋ kimina Asiria aatiŋ aabɔrkpaan ngbaan chee lii. M ga li kii kitiŋ kimina, mbaa aanyuŋ pu, ni maah nan puu tipuur ti tii maatutunn David na pu.”

⁷ Le Aisaya bui binib bi joo ubɔr ngbaan na ke bi san likakaln aasubil ki di boon lichakpelar ngbaan aan u pɔɔk.

⁸ Ubɔr Hesekia nan baa Aisaya ke, “Ba ga li ye limɔkl ki mɔk ke m ga pɔɔk aan ki joo cha ni iwiin itaa aapuwɔb na m ŋmaa buen Uwumbɔr Aadichal ni?”

⁹ Le Aisaya giin gar u ke, “Uwumbɔr ga tii si limɔkl li ga mɔk ke u ga ŋa waah puu tipuur ti na. Tɔ, aa ga li gee ke kijunjuŋ ki bi mbisamɔb aabimbin ŋi bi taar koo na pu na buen mɔb wɔb ŋibimbin kipiik, bee ki gir puwɔb ŋibimbin kipiik la?”

¹⁰ Le Hesekia gar ke, “Naa pɔɔ ke kijunjuŋ buen mɔb wɔb ŋibimbin kipiik. Cha ki gir puwɔb ŋibimbin kipiik.”

¹¹ Le Aisaya mee Uwumbɔr, le u cha kijunjuŋ ngbaan gir puwɔb ŋibimbin kipiik, ŋibimbin ŋi Ubɔr Ahas nan maa na pu.

Ituun i nan nyan ni Babiloŋ aatiŋ ni na aabɔr

¹² N‑yoonn mumina, le Babiloŋ aatiŋ aabɔrkpaan, Baladann aajapɔɔn u bi yin u ke Merodak Baladann na, ŋun ke ubɔr Hesekia dɔ bun, le u ban ipiin ki ŋmee kigbaŋ ki di tun u chee.

¹³ Hesekia nan gaa bi, ki chann bi tichann, le ki mɔk bi waawangol: u nan mɔk bi waakunabr, ni waasalmaa, ni tikpin aawan, ni nkpan mu nun mɔ na, ni waajar aawan mɔmɔk. Tiwan nibaa aa nan gur waadir ni, bee nibaa chee waanaan ni, aan waa mɔk bi.

¹⁴ Nee aapuwɔb le Uwumbɔr aabɔnabr Aisaya buen ubɔrkpaan Hesekia chee ki ti baa u ke, “Bijab bimina nyan ni la chee, bi len ke ba aa chee?” Hesekia nan giin kii u ke, “Bi nyan ni dandar la, bi nyan ni Babiloŋ aatiŋ ni la.”

¹⁵ “Bi kan ba libɔrchiln ni?” “Bi kan tiwan mɔmɔk. Tiwan nibaa aa gur tidir ni aan maa mɔk bi.”

¹⁶ Le Aisaya bui u ke, “Uwumbɔr bui ke,

¹⁷ ‘N‑yoonn choo le tiwan nimɔk bi saabɔrchiln ni na, ni tiwan nimɔk aayaajatiib nan di bil ki nan saa din na mɔmɔk ga buen Babiloŋ aatiŋ ni. Nibaa aan gur.

¹⁸ Bi ga nan yoor sin aabaa aayaabitiib bibaa di buen Babiloŋ aatiŋ ni, aan ki ti lee bi, aan bi li tun lituln ubɔrkpaan ngbaan aadichal ni.’”

¹⁹ Ubɔr Hesekia nan dak ke tibɔr ngbaan aatataa le ye ke nsuudoon ga li bi waamɔfal aayoonn, le u giin kii ke, “Uwumbɔr aah di tibɔr ti tii ni si na ŋan.”

Hesekia aanaan aah doo pu na aabɔr

²⁰ Ubɔr Hesekia aah nan ki tun ŋitun ŋi mɔmɔk na, ni waajakaan, ni waah nan gbii limɔɔl li na, ki gbii nnyunsan mu ke nnyun li diir koo ni kitiŋ ponn ni na mɔmɔk bi Juda Aabɔrb Aatun Aagbaŋ ni la.

²¹ Hesekia nan kpo, le ujapɔɔn Manase nab waanaan pu.