2 Bibɔrb 2 - Uwumbɔr aagbaŋ

Uwumbɔr aah yoor Elaija buen paacham pu na

¹ N‑yoonn nan fuu ni ke Uwumbɔr yoor Elaija kinaakpaajabuŋ ni buen paacham. Elaija ni Elaisa nan nyan Gilgal le ki cha.

² Baah cha na le Elaija ti bui Elaisa ke, “Tɔ, gaar do; Uwumbɔr bui mi ke m buen Betel.” Tɔ, Elaisa nan gar u ke, “Maah kii tii aa ni Uwumbɔr u bi n‑yoonn mɔmɔk na pu na, m puu ke maan buen nibaa chee ki cha si.” Le bi nan dii buen Betel.

³ Uwumbɔr aabɔnabtiib bibaa nan bi nima le ki buen Elaisa chee ki ti baa u ke, “Aa nyi ke Uwumbɔr ban u yoor saaninkpel din wee ki cha si ii?” Le Elaisa gar bi ke, “M nyi. Maa ban ke ti li len ti.”

⁴ Le Elaija bui Elaisa ke, “Tɔ, gaar do; Uwumbɔr bui mi ke m buen Jeriko aatiŋ ni.” Le Elaisa gar u ke, “Maah kii tii aa ni Uwumbɔr u bi n‑yoonn mɔmɔk na pu na, m puu ke maan buen nibaa chee ki cha si.” Le bi nan dii buen Jeriko aatiŋ ni.

⁵ Uwumbɔr aabɔnabtiib bibaa nan bi nima le ki buen Elaisa chee ki ti baa u ke, “Aa nyi ke Uwumbɔr ban u yoor saaninkpel din wee ki cha si ii?” Le Elaisa gar bi ke, “M nyi. Maa ban ke ti li len ti.”

⁶ Le Elaija bui Elaisa ke, “Tɔ, gaar do; Uwumbɔr bui mi ke m buen Jɔɔdann Aamɔɔl ni.” Le Elaisa gar u ke, “Maah kii tii aa ni Uwumbɔr u bi n‑yoonn mɔmɔk na pu na, m puu ke maan buen nibaa chee ki cha si.” Kina pu le bi nan di siir,

⁷ le Uwumbɔr aabɔnabtiib piiŋmu dii bi buen Jɔɔdann Aamɔɔl ni. Elaija ni Elaisa nan ti sil limɔɔl ngbaan aanyun chee, le bibɔnabr piiŋmu na mu sil dandar siib.

⁸ Le Elaija chuu peer waakpalk na ki tam tam ki di faa nnyun ngbaan; le nnyun ngbaan chuu yakr nfum mulee, le u ni Elaisa chuun kitikuun pu ki puur lidapuul.

⁹ Nima chee le Elaija bui Elaisa ke, “Bui mi saah ban ke m ŋa tiwan ni tii si na waahr aan Uwumbɔr nin yoor mi buen.” Le Elaisa gar u ke, “Cha m kan aa chee saapɔɔn mu ga cha m nab saatuln pu na.”

¹⁰ Le Elaija bui u ke, “Nimina ye tiwan ni pɔɔ na le aa mee na. Tɔ, aa yaa waa baah joo mi cha pu na kan, aa ga kan mpɔɔn ngbaan; aa yaa kaa waa mi kina kan, saan kan mu.”

¹¹ Bi nan chuun cha le ki beenin gbaa tibɔr; libuul ngbaan ni le mmii aataan aatɔroku, u mmii aataan dar u na nan koo bikaasisik ni, le kinaakpaajabuŋ yoor Elaija di buen paacham.

¹² Elaisa nan kan kina le ki teen yin Elaija ke, “Nte, nte. Israel yaab aakikiir kpaan. Aa buen a.” Le waa ki kan Elaija kpala. Elaisa nan di mpombiin le daa kar waakpalk nfum mulee pu,

¹³ le ki yoor Elaija aakpalk ki ŋmar lir ni na, le ki gir ti sil Jɔɔdann aamɔɔgbaln,

¹⁴ le ki di Elaija aakpalk na faa nnyun ngbaan, le ki bui ke, “Elaija Aadindaan Uwumbɔr bi la chee?” le ki ki gir faa nnyun ngbaan, le mu yakr nfum mulee pu, le u chuun puur lidapuul.

¹⁵ Uwumbɔr aabɔnabtiib piiŋmu bi nan nyan ni Jeriko na nan kan u le ki bui ke, “Elaija aapɔɔn bi Elaisa pu.” Bi nan tooh u nsan pu, le ki gbaan unimbiin ni,

¹⁶ le ki bui ke, “Ti ye bijab piiŋmu le ki bi do. Ti mɔmɔk ye bijab bi pɔɔ na la. Cha ti buen ti ban kan saaninkpel. Nibaakan Uwumbɔr Aafuur Nyaan ga li di u ti lii lijool libaa pu, bee kifataŋ kibaa ni.” Le Elaisa bui ke, “Aayii, taa buen man.”

¹⁷ Le bi yii, ke bi ga buen, le u ti kii tii bi ke bi li cha. Bijab piiŋmu ngbaan nan chuun iwiin itaa ki bi ban Elaija paacham ni taab, kaa kan u.

¹⁸ Le bi gir ni Elaisa, u nan bi Jeriko aatiŋ ni ki kii bi na chee, le u bui bi ke, “Maa nan bui nimi ke ni taa buen aa?”

Elaisa aajinjii aatun aabɔr

¹⁹ Bijab bibaa nan nyan Jeriko aatiŋ ni le ki buen Elaisa chee ki ti bui ke, “Uninkpel, aa nyi ke kitiŋ kimina ye kitinyaan la, tɔ, kaanyun ma aa ŋan, le ki cha bipiib joo ŋipuu lir.”

²⁰ Le u bui bi ke, “Di n‑yaan ŋa lisambipɔln ni ki li joo tii ni mi man.” Bi nan joo nan tii u,

²¹ le u buen uyayak aanyunbun ngbaan chee, le ki ti di n‑yaan ngbaan mee ŋa nnyun ngbaan ni, le ki bui ke, “Uwumbɔr aah len pu na sɔ: ‘M ŋaŋ nnyun mumina, le mu aan ki cha unii kpo, kaan cha upii di lipuul lii.’”

²² Le ki nyan liyaadaal ngbaan nnyun ngbaan ŋaŋ Elaisa aah len ke mu ga ŋaŋ pu na.

²³ Elaisa nan nyan Jeriko ki cha Betel, le nsan ni, mbijabim bibaa ti nyan ni kitiŋ kibaa ni ki nan ŋani u mbɔnyun. Bi nan tar ke, “Li cha paacham, uyikundaan.”

²⁴ Elaisa nan fenn lik bi, le ki di Uwumbɔr aayimbil puun lii bi pu. Le tipeewanbir tibaa nyan ni kichook ni ki nan dar par par bi ponn ni mbijabim imonko ilee ni bilee.

²⁵ Elaisa nan jer buen Kamel Aajool pu, le ki nan nin gir buen Samaria aatiŋ ni.