2 Bibɔrb 19 - Uwumbɔr aagbaŋ

Ubɔr Hesekia aah ban Uwumbɔr aabɔnabr Aisaya aasurm pu na

¹ Ubɔr Hesekia aah ŋun baah len pu na, libuul ngbaan ni le u daa kar waawanpeenkaan, usui aah bii sakpen pu na, le ki di tiwan ni saak kuub na peen, le ki buen Uwumbɔr Aadichal ni,

² le ki tun Eliakim, u ye libɔrdichal ponn ni aaninkpel na, ni Sebna, u ye nnaan aabɔr mɔmɔk aaninkpel na, ni Uwumbɔr aatotoorninkpiib, ke bi buen Uwumbɔr aabɔnabr Aisaya u ye Amos aajapɔɔn na chee. Binib ngbaan mɔmɔk mu nan pee tiwan ni saak kuub na la.

³ Waah nan bui bi ke bi ti bui Aisaya pu na sɔ: “Din aawiin mue ye timi falaa aawiin la; bi daa titafal aan ki jinn timi inimɔɔn. Ti gur naahn upii u imalween joo u, u ban u maa ki mu aa ki kpa mpɔɔn u maa na la.

⁴ Asiria aatiŋ aabɔrkpaan tun ni waaninkpiib aaninkpel ke u nan seei Uwumbɔr u bi kaa kpa ndoon na. Cha Aadindaan Uwumbɔr ŋun ŋisiibil ŋimina ki daa binib bi seei ŋi na aatafal. Kina pu na, mee Uwumbɔr tii timi aanib bi ŋmar na.”

⁵ Aisaya aah ŋun Ubɔr Hesekia aabɔr ngbaan na,

⁶ le u giin ngarm mumina ke: “Uwumbɔr bui ke aa taa cha Asiria yaab faan si ke uma Uwumbɔr aan ŋmaa gaa si lii.

⁷ Uwumbɔr ga cha ubɔrkpaan ngbaan ŋun tibɔr ti ga cha ijawaan chuu u aan u gir buen udo aatingbaln ni na, nima chee le Uwumbɔr ga ti cha bi ku u.”

Asiria yaab ki gir faan Jerusalem yaab lelee

⁸ Asiria aajab aaninkpel ngbaan ŋun ke waabɔrkpaan nyan Lakis aatiŋ ni aan u ni Libna aatiŋ ki bi gbɔk Lakis aatiŋ na yaab bi jaa kijaak; kina pu le u buen nima u ti kan u.

⁹ N‑yoonn ngbaan le Asiria yaab ŋun tibɔr ke Kus aatiŋ aabɔr Tiraka joo Ijipt aajab choo u nan tak bi. Asiria aatiŋ aabɔrkpaan ngbaan aah ŋun tibɔr timina na, le u ŋmee kigbaŋ tii Juda yaab aabɔr Hesekia ke,

¹⁰ “Uwumbɔr u aa mak u pu sakpen na bui si ke maan ŋma nyaŋ si, aa mu taa tee cha kina ngbaan ŋmann si.

¹¹ Aa ŋun min Asiria aatiŋ aabɔrkpaan aah ŋani litingbaln li m ban ke m kuln li na pu na. Aa dak ke aa ga ŋmaa san ŋmar aa?

¹² N‑yaajatiib le nan kuln Gosann, ni Harann, ni Resef aatim, le ki ku Bef Edenn aanib bi nan bi Telasar aatiŋ ni na, le bi mɔmɔk aawaa aa nan ŋman ki gaa bi lii.

¹³ Hamaf, ni Aapad, ni Sefafaim, ni Hena, ni Ifa aatim aabɔrb bi la?”

¹⁴ Ubɔr Hesekia nan gaa kigbaŋ ngbaan ntuuntiib ngbaan chee le ki karn ki, le ki buen Uwumbɔr Aadichal ni, ki ti di ki bil Uwumbɔr aanimbiin ni,

¹⁵ le ki mee u ke, “Uwumbɔr Mpɔɔnsakpiindaan u ye timi Israel yaab Aadindaan, ki ka saabɔrjal li bi tiwan ni kpa ifeen na aapaacham na, sin baanja le ye Uwumbɔr, ki joo dulnyaa aanaan mɔmɔk. Sin le naan taab ni paacham.

¹⁶ Uwumbɔr, ŋun timi aameel ki lik tiwan ni bi ŋani timi na. Li pel tiwan ni mɔmɔk Senakerib len ki joo seei si Uwumbɔr u bi kaa kpa ndoon na.

¹⁷ Uwumbɔr, ti mɔmɔk nyi ke Asiria aatiŋ aabɔrkpaan kuln ŋitimbol pam, ki bii baatim,

¹⁸ ki see baawaa mmii; ŋi nan ye unibɔn aah di uŋaal naan idɔ ni ŋitakpal ni na la.

¹⁹ Kina pu na, Tidindaan Uwumbɔr, gaa timi Asiria yaab ngbaan chee lii aan dulnyaa aatimbol mɔmɔk bee ke sin baanja le ye Uwumbɔr.”

Aisaya aah naŋ Ubɔr Hesekia chee pu na

²⁰ Le Aisaya tun ti bui Ubɔr Hesekia ke waah mee Uwumbɔr pu na,

²¹ u bui ke, “Jerusalem aatiŋ laa si, Senakerib, ki lik seen si.

²² Aa dak ke ŋma aan aa bi seei ki ŋani u mbɔnyun? Saa pak mi, Israel yaab Aawumbɔr u bi chain na kpala.

²³ Aa tun ni saanaagbiib ke bi nan puk kipupuk m chee ke aa di saataan aatɔroku tiib ki nyaŋ Lebanonn aajoo ŋi fɔk na aanib, le ki gaa santina aasui i fɔk na, ni isui i ŋan na mɔmɔk lii kitiŋ, ki koo tichoor ponn ni pam.

²⁴ Aa puk kipupuk ke aa gbii inyunbun ki nyun biwɔwɔm aatim ni aanyun, ki bui ke saajab taa taa foor Nail Aamɔɔl aanyun.

²⁵ “Saa kee ŋun ke min le kpokl kina n‑yoonn mu jer na, aan ki cha ni ŋa kina dandana aa? M nan tii si mpɔɔn ke aa di labr ntisakpem mu bi maa ŋigon kiir mu na di ŋa ŋilangbentanjal aakpuk.

²⁶ Binib bi nan bi nima chee na aa nan kpa mpɔɔn mubaa; ijawaan nan chuu bi le bi fik. Bi nan naahn timoor ti bi nkpaakon ni na, bee timoor ti punn kidiik aapaacham pu na la, liwipuul wɔb aabuln li ton na ga kuur ti.

²⁷ “Le m nyi saabɔr mɔmɔk, saah ŋani ni na, ni saah chaa nimɔk na. M nyi saah kpa liŋuusakpeln m pu pu na.

²⁸ M ŋun saah kpa liŋuusakpeln ni kigaak pu na, le dandana m ga di njapiin di pui aamɔfal ni, le ki di itangar mu di ŋa aamɔb ni, ki di si giin dii nsan mu aa dii ni ki dan na.”

²⁹ Tɔ, le Aisaya bui ubɔrkpaan Hesekia ke, “Nimina le ga li ye limɔkl ki mɔk nimi tiwan ni ga ŋa na. Libiln limina, ni libiln li ga paan ni na, ni ga ji tijikaar ti naa kon ti, ti punn tibaa pu na la; libiln li ga paan na ma kan, ni ga ŋmaa bu nibaa aajikaar aan ki nan chee ti, ki ga bu ŋisubil aasui ki moo yaasubil mu.

³⁰ Juda aanib bi ŋmar na ga pɔr ke isui i aasubon koo kitiŋ mbamɔm aan i lu ŋisubil sakpen na la.

³¹ Binib ga li bi Jerusalem aatiŋ ni, ni Sionn Aajool pu ki ŋmar, ba pu? Uwumbɔr le puu ke ni ga ŋa kina.

³² “Uwumbɔr aah len Asiria aatiŋ aabɔrkpaan aabɔr ti na sɔ: ‘Waan koo ni kitiŋ kee ponn ni, kaan too mpiin mubaa ki ponn ni. Butɔb aajab bi joo ŋipen kii bibaa na ubaa aan duun ni kitiŋ ngbaan, le baan maa ŋibimbin tam tam kaagon.

³³ Waah dii nsan mu ki dan na, muma le u ga ki gir dii, kaan koo ni kitiŋ kimina ni. Min Uwumbɔr le len kina.

³⁴ M ga kiir kitiŋ kimina, ki biin ki pu, maapak, ni maah puu tipuur ti tii maatutunn Ubɔr David na pu.’”

³⁵ Kinyeek ngbaan le Uwumbɔr aatuun nan buen Asiria aajab ni, ki ti ku baajab ŋichur nkub ni imonko inaa ni ŋiŋmu. Nwiin mu paa na aachakpinaanyeek ni, le bi kan bi mɔmɔk kpo ki dɔ.

³⁶ Le Asiria aatiŋ aabɔrkpaan Senakerib fenn ki gir buen Ninefa aatiŋ ni.

³⁷ Nwiin mubaa daal le u nan bi dooni liwaal Nisrok, laawaadiik ni, le ujapɔtiib bilee, Adramelek, ni Sareser, buen ti di baajaak aajum ku u, le ki san ŋmar buen Ararat aatiŋ pu. Le ujapɔɔn uken, u bi yin u ke Esaradonn na, nab waanaan pu.