2 Bibɔrb 18 - Uwumbɔr aagbaŋ

Juda yaab aabɔr Hesekia aabɔr

¹ Ela aajapɔɔn Hosea aah nan jin Israel aanaan na aabitatar ni, le Ahas aajapɔɔn Hesekia nan jin Juda aanaan.

² U nan ye ŋibin moninko ni ŋiŋmu aanii la, le ki nan bi Jerusalem aatiŋ ni ki joo waanib ki ti saa ŋibin moninko ni ŋiwae. Una le nan ye Sekaria aabisal Abija.

³ U nan dii uyaaja Ubɔr David aasan, le ki tun Uwumbɔr aageehn.

⁴ U nan ber tiwaadir mɔmɔk, ki gbaa wiil ŋiwaabimbin, ki gaa gii liwaapii Asera aanaŋ. U nan ki gbaa wii tikumann aawaa u Moses nan naan, aan bi nan yin u ke Nehustann na. Ki nan saa n‑yoonn ngbaan na, Israel aanib nan seer nnyɔknii ki nyuŋni uwaa ngbaan la.

⁵ Hesekia nan tii Israel yaab Aadindaan Uwumbɔr naadii; Juda aatiŋ aa kee kan ubɔr ubaa aan u nan bi ke uma na, ubaa aa nan puen u bi, le ubaa aan ki li bi upuwɔb.

⁶ U nan tii Uwumbɔr naadii le kaa kee yii umɔb daalbaadaal, le ki nan tee joo ikaal i Uwumbɔr nan di tii ni Moses na mbamɔm.

⁷ Kina pu na, Uwumbɔr nan bi u chee, le u nan nyaŋni tiwan ni mɔmɔk u nan ŋa na ni. U nan nyan Asiria aatiŋ aabɔrkpaan aapuwɔb, ki yii kaa di ubaa tii u.

⁸ U nan nyaŋ Filistia yaab le ki loon baatiwaatiir ni ntikpaam mɔmɔk. Gasa aatiŋ ni kaapepel mu nan bi waah nan loon ntim mu na ni.

⁹ Hesekia aanaan aabinanar ni, Israel yaab aabɔr Hosea aanaan aabilolole ni le bi na, le Asiria aatiŋ Aabɔrkpaan Salmaneser nan ti tak Israel aatiŋ, le ki gob Samaria aatiŋ.

¹⁰ Bi nan bi nima ki ti saa ŋibin ŋitaa, le Samaria aatiŋ nan lir; Hesekia aanaan aabin ŋiloob ni le nan bi na, le ki ye Hosea aabiwawaer ni.

¹¹ Asiria aatiŋ aabɔrkpaan ngbaan nan chur Israel aanib tinaagbiir buen Asiria aatiŋ ni, le ki ti di bibaa kaan Hala aatiŋ ni, ki kaan biken Habor Aamɔɔl chee, Gosann aapepel ni, ki kaan biken mu Media aatim ni.

¹² Israel yaab aah kaa nan kii Bidindaan Uwumbɔr aamɔb, ki bii tipuur ti u nan puu tii bi na, ki yii ikaal i mɔmɔk Uwumbɔr aatutunn Moses nan di tii bi na pu le Samaria aatiŋ nan ber. Baa nan ŋun kaa kii tii u.

Asiria yaab aah nan faan Jerusalem aatiŋ pu na

¹³ Hesekia aanaan aabin kipiik ni linanar ponn ni, le Asiria aatiŋ aabɔrkpaan Senakerib nan ti tak Juda aatim mu bi maa ŋigon kiir mu, aan mu kpa tijawan na, ki nyaŋ mu.

¹⁴ Hesekia nan tun ntuun Senakerib, u nan bi Lakis aatiŋ ni na chee ke: “M tun taani; ŋaanii ki di cha, le m ga pa saah ban pu na mɔmɔk.” Ubɔrkpaan ngbaan aagarm le nan ye ke Hesekia tii ni u tikunabr ti aanyunyuun ye njikaabim kuruwaa ŋichur kipiik na, ni salmaa u aanyunyuun ye njikaabim kuruwaa lichur na.

¹⁵ Le Hesekia nan di Uwumbɔr Aadichal, ni libɔrdichal ni aakunabr mɔmɔk, tun ti tii u;

¹⁶ u nan pɔkr Uwumbɔr Aadichal aajaaleŋ tiib pu aasalmaa, ni uma ubaa aah nan di salmaa u boon ibisamɔi aadɔ na, le ki di ni mɔmɔk ti tii Senakerib.

¹⁷ Asiria aatiŋ aabɔrkpaan nan di butɔb aajab bi wiir sakpen na nyan Lakis aatiŋ ni ke bi ti tak Hesekia, Jerusalem aatiŋ ni; waajab ngbaan aaninkpekpaam bitaa le nan ye baayidam. Baah nan ti fuu Jerusalem na, le bi ti gaa nsan mu bikpaluub tun baatuln nima chee na, ni bi gbɔk nnyun aasan mu joo nnyun nyan ni paacham aabɔɔk ni na la,

¹⁸ le ki tun ti yin ni Ubɔr Hesekia, le waajab aaninkpiib bitaa nyan bi ti tooh bi nsan pu: bima le nan ye Hilkia aajapɔɔn Eliakim, u ye libɔrdichal aaninkpel na; ni Sebna, u nan ye nnaan aabɔr mɔmɔk aaninkpel na; ni Asaf aajapɔɔn Joa, u ye nnaan aabɔr aagbaŋmeer na.

¹⁹ Le Asiria aajab aaninkpiib ni ubaa nan bui bi ke baabɔrkpaan ban u bee tiwan ni cha Ubɔr Hesekia mak sakpen kina na.

²⁰ U nan baa ke, “Ni dak ke bumɔb aaliin ga ŋmaa nyaŋ tijar aalan ni mpɔɔn na aa? Ni dak ke ŋma ga ter nimi aan ni sil kiir Asiria yaab?

²¹ Ni ka dak ke Ijipt yaab le ga ter nimi, tɔ, kina mu ga li naahn unii u di likal di ŋa waajaangbeek na la, li ga koo le ki saa uŋaal. Ijipt aatiŋ aabɔr bi kina le ki tii unii umɔk mak u pu na.”

²² Asiria aajab aaninkpel ngbaan nan ki len ke, “Bee ni ga bui ke ni lik Nidindaan Uwumbɔr na pu la? Uwumbɔr uchachaan ngbaan aawaachur, ni kitork aabimbin le Hesekia nan ber ki bui Jerusalem ni Juda aanib ke bi li chaa ti dooni Uwumbɔr kitork aabimbiln libaa baanja chee, Jerusalem aatiŋ ni na.

²³ Asiria aatiŋ aabɔrkpaan aayimbil pu le m ga cha ti kpokl nkpokl mubaa. Ni yaa kpa bijab ŋichur ŋilee kan, m ga ŋmaa tii nimi itaan kina aan bi li jak i.

²⁴ Naa fuu Asiria aatɔb aaja u kaa kpa tininkpir na, le ni ka dak ke Ijipt yaab ga tii ni nimi itaan aatɔroku tiib ni butɔb aajab bi jak itaan ki jaa kijaak na.

²⁵ Ni dak ke m di mbaa aapɔɔn le ki nan tak nimi aatiŋ ki kuln ki, kaa ye Uwumbɔr aaterm aa? Uwumbɔr ubaa le bui mi ke m nan tak ki, ki kuln ki.”

²⁶ Le Eliakim, ni Sebna, ni Joa bui butɔb aajab aaninkpel ngbaan ke, “Li len ti chee Aram yaab aaliin ni. Ti ŋun i. Taa len ti chee Hiibru aaliin; binib bi mɔmɔk ka ligoln pu na bi pel la.”

²⁷ Le u gar bi ke, “Ni dak ke nimi ni nimi aabɔr ngbaan baanja pu le Asiria aatiŋ aabɔrkpaan tun ni mi ke m nan len tibɔr tee ee? Aayii, m bi len binib bi mɔmɔk ka ligoln pu na mu chee la, bi ga ŋmɔ baabin ki nyu baanyeen, ke ni mu aah ga ŋmɔ ki nyu pu na.”

²⁸ Le bijab aaninkpel ngbaan nan fii sil paacham ki teen mpɔɔn pu Hiibru aaliin ni ke, “Li pel man Asiria aatiŋ aabɔrkpaan aah bi tuk nimi pu na.

²⁹ U sur nimi ke ni taa cha Hesekia ŋmann nimi. Hesekia aan ŋmaa gaa nimi lii.

³⁰ Ni taa cha u ŋmann nimi ke ni li lik Uwumbɔr pu. Taa ka dak man ke Uwumbɔr ga gaa nimi lii aan ki kiir Asiria aajab, bi taa ŋmaa nyaŋ nimi aatisakpeŋ ngbaan.

³¹ Taa pel Hesekia aah len pu na man. Asiria aatiŋ aabɔrkpaan bui ke ni nyan ni kitiŋ ngbaan ni, aan ki kii ke u nyaŋ nimi. U ga cha ni mɔmɔk moo ŋisubil nimi aasar ni, ki ŋmɔ nimi aakakan, ki nyu nimi aanyunbun ni aanyun,

³² ki ti saa buyoonn Asiria aatiŋ aabɔrkpaan ga ki gir kaan nimi litingbaln li bi ke nimi yaan na, nima chee ndaan aasui aasar bi, ni ga kan ndaan ki nyu, ni nin chee njikaabim bi ni ga kan tijikaar ji na; nima chee le olif aasui bi, olif aakpan ni tisiir bi nima. Ni yaa ŋa waah len pu na kan, naan kpo, ni ga li kpa limɔfal. Taa cha Hesekia ŋmann nimi aan ni li ka dak ke Uwumbɔr ga gaa nimi lii.

³³ Litimbol libaa aawaa ŋman ki gaa ŋaatim Asiria aatiŋ aabɔrkpaan chee ee?

³⁴ Ŋiwaa ngbaan bi la chee dandana? Hamaf ni Aapad aawaa bi la? Sefafaim, ni Hena, ni Ifa aawaa bi la chee? Ubaa ŋmaa gaa Samaria yaab lii ii?

³⁵ Bayoonn ŋitingban ŋimina aawaa ŋman ki gaa ŋi Asiria aatiŋ aabɔrkpaan chee? Kina pu na, ba cha ni dak ke Uwumbɔr ga ŋmaa gaa Jerusalem ma lii?”

³⁶ Tɔ, binib ngbaan nan ŋmin suuna kaa gar, ke baabɔrkpaan Hesekia aah bui ke bi taa gar pu na; baa waar bimɔi.

³⁷ Le Eliakim, ni Sebna, ni Joa daa kar kar baawanpeenkaan mpombiin pu, ki buen baabɔr Hesekia chee ki ti bui u Asiria aajab aaninkpel ngbaan aah len pu na.