2 Bibɔrb 16 - Uwumbɔr aagbaŋ

Juda yaab aabɔr Ahas aabɔr

¹ Remalia aajapɔɔn Peka aah nan ye Israel yaab aabɔr pu na aabin kipiik ni lilolole ni, le Jotam aajapɔɔn Ahas jin Juda aanaan.

² U nan ye ŋibin moninko aanii la, le ki nan bi Jerusalem aatiŋ ni ki joo waanib ki ti saa ŋibin kipiik ni ŋiloob. Waa nan dii uyaaja Ubɔr David aah nan dii nsanyaan mu na. Uma nan labr tun Udindaan Uwumbɔr aah kaa gee pu na la,

³ le ki dii Israel aatiŋ aabɔrb aasan i kaa ŋan na. U nan kpaan di ujapɔɔn kɔr toor ŋiwaa ki see u mmii ni tii ŋi, le ki tun tijɔŋ aatunwanbir ti binib bi Uwumbɔr nan jenn nyan bi baatiŋ ni buyoonn Israel yaab nan choo na nan tun na.

⁴ Ahas nan toor kitork ki seer nnyɔknii tiwaadir ni, ni ŋigongon paab, ni busub bumɔk nan kpa mboon na taab tii ŋiwaa.

⁵ Siria aatiŋ aabɔr Resinn, ni Israel yaab aabɔr Peka nan tak Jerusalem le ki gob ki, ki mu aa nan tee ŋmaa nyaŋ Ahas.

⁶ N‑yoonn baan ngbaan le Edom aatiŋ aabɔr nan ki gaa Elaf aatiŋ, le ki jenn nyan Juda aanib bi nan koo nima chee na. Edom aanib nan maa kal Elaf aatiŋ ni, le ki beenin bi nima.

⁷ Ahas nan di inaŋ tun Asiria aatiŋ aabɔrkpaan Tiglaf Pileser chee ke: “M ye saatutunn u kii tii si mbamɔm na la. Dan nan gaa mi Siria yaab aabɔr, ni Israel yaab aabɔr bi bi tak mi na chee lii.”

⁸ Ahas nan yoor Uwumbɔr Aadichal, ni libɔrdichal aakunabr ni salmaa, ki di tun ti tii Siria aatiŋ aabɔrkpaan ngbaan ipiin.

⁹ Ahas aagaŋ ngbaan pu, le Tiglaf Pileser nan di waajab buen Damaskus aatiŋ pu, le ki ti nyaŋ ki, le ki ku Ubɔr Resinn, le ki chur kaanib tinaagbiir buen Kir aatiŋ ni.

¹⁰ Ubɔr Ahas aah nan buen Damaskus aatiŋ ni, u ti kan Ubɔrkpaan Tiglaf Pileser na le u nan ti kan kitork aabimbiln nima, le ki di laanaŋ ti mɔk utotoor Uria. Ni nan naahn ke naah ye foto le na.

¹¹ Le Uria maa kina aatork aabimbiln, aan li ni lima ngbaan ye tiwanbaan, le ki maa li doo le Ahas nin gir kun ni.

¹² Ahas aah nyan ni Damaskus aatiŋ ni ki gir ni na, le u kan ke kitork aabimbiln ngbaan maa a,

¹³ kina pu le u nan see tiwakor ni njikaabim aapiin mmii ni li pu. U nan ki di ndaan aapiin, ni kimɔbaan aapiin aasin kpir li pu.

¹⁴ Tikumann aatork aabimbiln li bi nan di tii Uwumbɔr na nan si libimbipɔln ngbaan ni Uwumbɔr Aadichal aasisik ni la. Kina pu le Ahas nan yoor li ti siin waabimbipɔln ngbaan aaŋangan wɔb,

¹⁵ le ki bui Uria ke: “Li gur seer kichakpiik ni aatork, ki li toor kijook aajikaabim aatork maabimbiln li wiir na pu, ki li joo min ubɔr, ni binib aatork seer mmii ni li pu, ki li toor baajikaabim aapiin li pu, ki li joo binib aadaan aapiin mu kpir li pu. Li joo baah kɔr tiwakor ti mɔmɔk na aasin kpir li pu. Tɔ, tikumann aabimbiln na ma kan, aa cha li li si m li joo buu tibɔɔr.”

¹⁶ Le Uria nan ŋa ubɔr aah bui u pu na.

¹⁷ Ubɔr Ahas nan chuu bii tikumann aatɔroku tiib bi bi nan joo tun lituln Uwumbɔr Aadichal ni na, le ki nyan tisapar ti nan tɔk bi pu na; u nan ki nyan tikumann aakin na mu tikumann aanaaja naankee kipiik ni ilee na pu, le ki di mu tɔŋ ŋitakpal pu.

¹⁸ Ahas nan ki nyan libɔrjal aah tɔk paangara u pu na Uwumbɔr Aadichal ni, ke ni piir Asiria aatiŋ aabɔrkpaan ngbaan aasui, le ki laŋ ubɔr aah diir nin chee koo Uwumbɔr Aadichal ni na.

¹⁹ Ubɔr Ahas aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

²⁰ Ahas nan kpo, le bi di u sub nnaan aacheek ni, David Aatiŋ ni, le ujapɔɔn Hesekia nab waanaan pu.