2 Bibɔrb 15 - Uwumbɔr aagbaŋ

Juda yaab aabɔr Usia aabɔr

¹ Israel yaab aabɔr Jeroboam aanaan aabin moninko ni lilolole ponn ni, le Amasia aajapɔɔn Usia nan jin Juda aanaan.

² U nan laa ye ŋibin kipiik ni ŋiloob aanii la, le ki bi Jerusalem aatiŋ ni ki joo waanib ki ti saa ŋibin piiŋmu ni ŋilee. Una nan ye Jerusalem aatiŋ ni aanii la, le bi yin u ke Jekolia.

³ Usia nan dii ute aasan, le ki tun Uwumbɔr aageehn.

⁴ Tɔ, waa nan tee ber baah dooni ŋiwaa nin chee na, le binib ngbaan nan beenin toor kitork ki seer nnyɔknii nima chee.

⁵ Uwumbɔr nan cha tiwon aaween i bir sakpen na chuu Usia, ki gaar u pu kina le u ti kpo. U nan gur koo ubaa aadichal ni la, le kaa ki tun nnaan aatuln libaa. Ujapɔɔn Jotam le nan gur joo kitiŋ ngbaan.

⁶ Usia aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

⁷ Usia nan kpo le bi di u sub nnaan aacheek ni, David Aatiŋ ni, le ujapɔɔn Jotam nab waanaan pu.

Israel yaab aabɔr Sekaria aabɔr

⁸ Juda yaab aabɔr Usia aanaan ni aabin piitaa ni ŋiniin ni, le Jeroboam aajapɔɔn Sekaria jin Israel aanaan. U nan bi Samaria aatiŋ ni le ki joo waanib ki ti saa iŋmal iloob.

⁹ U nan bi ke Israel yaab aabɔrb bi nan puen u kal lijal ngbaan pu na la, le ki tun Uwumbɔr titunwanbir ke bima na. U nan dii Nebat aajapɔɔn Jeroboam, u nan di titunwanbir mɔk Israel yaab na aabiin aasan la.

¹⁰ Le Jabes aajapɔɔn Salum nan nyan sil Ubɔr Sekaria pu, le ki nan ti ku u Ibleam aatiŋ ni, ki nab waanaan pu.

¹¹ Sekaria aah nan ki tun ŋitun ŋi mɔmɔk na bi Israel Aabɔrb Aatun Aagbaŋ ni la.

¹² Kina pu na, Uwumbɔr aah nan puu tipuur ti tii Jehu ke: “Aayaabitiib aayaabisɔsɔk ga li ye Israel yaab aabɔrb na” nan gbiin.

Israel yaab aabɔr Salum aabɔr

¹³ Juda yaab aabɔr Usia aanaan aabin piitaa ni ŋiwae ni, le Jabes aajapɔɔn Salum nan jin Israel aanaan, le ki nan bi Samaria aatiŋ ni ki joo waanib uŋmal ubaa.

¹⁴ Gadi aajapɔɔn Menahem nan nyan Tirsa aatiŋ ni le ki buen Samaria aatiŋ ni, le ki ti ku Salum ki nab waanaan pu.

¹⁵ Salum aah nan ki tun ŋitun ŋi mɔmɔk na, ni waah nan lok Sekaria ibuu pu na mɔmɔk bi Israel Aabɔrb Aatun Aagbaŋ ni la.

¹⁶ Menahem aah nan nyan Tirsa ki cha na, Tapua aatiŋ aanib aa nan tii u nsan ke u jer, kina pu na, u nan kuln ki ni kaanib, ni lipepel li mann goln ki na. U nan kpaan saa gbir bipiipudam mɔmɔk aapuu.

Israel yaab aabɔr Menahem aabɔr

¹⁷ Juda yaab aabɔr Usia aanaan ni aabin piitaa ni ŋiwae ni, le Gadi aajapɔɔn Menahem nan jin Israel aanaan, le ki nan bi Samaria aatiŋ ni ki joo waanib ki ti saa ŋibin kipiik.

¹⁸ U nan tun Uwumbɔr titunwanbir la. U nan dii Nebat aajapɔɔn Jeroboam, u nan di titunwanbir mɔk Israel yaab na aabiin aasan, le ki ti saa waakun daal.

¹⁹ Asiria aatiŋ aabɔrkpaan Tiglaf Pileser nan koo ni Israel aatiŋ ni, le Menahem tii u tikunabr ti aanyunyuun ga pii njikaabim kuruwaa ŋichur piitaa ni ŋinaa aanyunyuun na ke u ter u ki tii u mpɔɔn Israel aatiŋ pu.

²⁰ Menahem nan chur Israel yaab bi kpa ŋimombil na mpɔɔn, le ki cha uwankpadaan mɔk too tikunabr aamombil piiŋmu piiŋmu. Le Tiglaf Pileser nan gir kun waatiŋ pu.

²¹ Menahem aah nan ki tun ŋitun ŋi mɔmɔk na bi Israel Aabɔrb Aatun Aagbaŋ ni la.

²² U nan kpo le bi di u sub, le ujapɔɔn Pekahia nab waanaan pu.

Israel yaab aabɔr Pekahia aabɔr

²³ Juda yaab aabɔr Usia aanaan aabin piiŋmu ni, le Menahem aajapɔɔn Pekahia jin Israel aanaan, le ki nan bi Samaria aatiŋ ni ki joo waanib ki ti saa ŋibin ŋilee.

²⁴ U nan dii Nebat aajapɔɔn Jeroboam, u nan di titunwanbir mɔk Israel yaab na aabiin aasan, le ki nan tun Uwumbɔr titunwanbir.

²⁵ Pekahia aajab aaninkpel u bi nan yin u ke Peka, aan ute ye Remalia na nan lok u ibuu, le ki kan bijab piiŋmu Gilead aatiŋ ni, le bi ti ku Pekahia ni Agob ni Arie, libɔrdichal aadiik ki kpa mpɔɔn na ni, Samaria aatiŋ ni, le u nab waanaan pu.

²⁶ Pekahia aah nan ki tun ŋitun ŋi mɔmɔk na bi Israel Aabɔrb Aatun Aagbaŋ ni la.

Israel yaab aabɔr Peka aabɔr

²⁷ Juda yaab aabɔr Usia aanaan aabin piiŋmu ni lileler ni, le Remalia aajapɔɔn Peka jin Israel aanaan, le ki nan bi Samaria aatiŋ ni ki joo waanib ki ti saa ŋibin moninko.

²⁸ U nan dii Nebat aajapɔɔn Ubɔr Jeroboam, u nan di titunwanbir mɔk Israel yaab na aabiin aasan, le ki tun Uwumbɔr titunwanbir.

²⁹ Peka aah nan ye Israel yaab aabɔr buyoonn na, le Asiria aatiŋ aabɔrkpaan Tiglaf Pileser nyaŋ Ijonn, ni Abel Bef Maaka, ni Janoa, ni Kedes, ni Hasor aatim, ni Gilead, ni Galilee, ni Naftali aapepel, le ki chur binib tinaagbiir buen Asiria aatiŋ ni.

³⁰ Usia aajapɔɔn Jotam aah nan ye Juda aatiŋ aabɔr pu na aabin moninko ni, le Ela aajapɔɔn Hosea nan lok Ubɔr Peka pu ibuu, le ki ku u, ki nab waanaan pu.

³¹ Peka aah nan ki tun ŋitun ŋi mɔmɔk na bi Israel Aabɔrb Aatun Aagbaŋ ni la.

Juda yaab aabɔr Jotam aabɔr

³² Remalia aajapɔɔn Peka aah nan ye Israel yaab aabɔr pu na aabileler ni, le Usia aajapɔɔn Jotam jin Juda aanaan.

³³ U nan ye ŋibin moninko ni ŋiŋmu aanii la, le ki nan bi Jerusalem aatiŋ ni ki joo waanib ki ti saa ŋibin kipiik ni ŋiloob. Una le nan ye Jerusa, le bi yin una aate ke Sadok.

³⁴ Jotam nan dii ute Usia aasan la, le ki tun Uwumbɔr aageehn.

³⁵ Tɔ, waa nan ber baah dooni ŋiwaa nin chee na, le binib nan beenin toor kitork ki seer nnyɔknii nima chee. Jotam le nan ŋa Uwumbɔr Aadichal Aaŋangan wɔb Aabisamɔb na.

³⁶ Jotam aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

³⁷ Waah nan ye ubɔr buyoonn na, le Uwumbɔr nan cha Siria aatiŋ aabɔr Resinn, ni Israel yaab aabɔr Peka tak Juda aatiŋ njan.

³⁸ Jotam nan kpo, le bi di u sub nnaan aacheek ni, David Aatiŋ ni, le ujapɔɔn Ahas nab waanaan pu.