2 Bibɔrb 14 - Uwumbɔr aagbaŋ

Juda yaab aabɔr Amasia aabɔr

¹ Israel yaab aabɔr Jehoahas aajapɔɔn Jehoas aah nan jin Israel aanaan na aabileler ponn ni, le Joas aajapɔɔn Amasia jin Juda aanaan.

² U nan ye ŋibin moninko ni ŋiŋmu aanii le ki jin nnaan, le ki nan bi Jerusalem aatiŋ ni ki joo waanib ki ti saa ŋibin moninko ni ŋiwae. Una nan ye Jerusalem ni aanii la, le bi yin u ke Jehoadinn.

³ U nan tun Uwumbɔr aageehn, u mu aa nan tee pii uyaaja David; u nan tee tun ute Joas aah nan tun pu na la.

⁴ Waa nan ber baah dooni ŋiwaa nin chee na, le binib nan beenin toor kitork ki seer nnyɔknii nima chee.

⁵ Amasia aah nan ti bee buyoonn ke uyil baan na, le u ku bininkpiib bi nan ku ute ubɔr na.

⁶ Tɔ, waa nan tee ku baabim ma, u nan dii Uwumbɔr aah nan len pu Moses Aakaal ni na la. Nima le ye ke: “Tetiib ni natiib aan kpo baabim aatunwanbir pu, le mbim mu aan kpo tetiib ni natiib aatunwanbir pu; unii ga kpo uma ubaa aah tun titunwanbir ti na pu la.”

⁷ Amasia nan ku Edom aajab ŋichur kipiik, N‑yaan Aafataŋ ni; u nan nyaŋ Sela aatiŋ butɔb ni, le ki yin ki ke Jokteel, liyimbil ngbaan le bi beenin joo yin ki.

⁸ Amasia nan tun ituun Israel yaab aabɔr Jehoas chee, ki ban u kijaak.

⁹ Le Ubɔr Jehoas nan di inaŋ imina giin u chee ke: “N‑yoonn mubaa le Lebanonn Aajoo ponn ni aakokon aasub waatiir bubaa nan tun ti tuk Lebanonn aasantina aasub ke, ‘Di aabisal tii njapɔɔn u di u ŋa upuu.’ Tɔ, upeel ubaa nan jer nima chee le ki taa kool kool bukokom waatiir ngbaan.

¹⁰ Tɔ, Amasia, aa kpa kipupuk ke aa nyaŋ Edom yaab a. Cha kina aayimbil ŋeer si, aan aa li ka aado. Ba ŋa aa ban aa ban tibɔr tii aa ni saanib?”

¹¹ Tɔ, Amasia nan yii kaa ŋun tii u, kina pu le Israel yaab aabɔr Jehoas nan di waajab nyan le bi ti di biyil kpaa tɔb Bef Semes aatiŋ ki bi Juda ni na.

¹² Bi nan nyaŋ Amasia aajab, le waajab mɔmɔk san kun bido bido.

¹³ Jehoas nan chuu Amasia tinaagbiir, le ki nyan nima ki ti tak Jerusalem aatiŋ, ki tur kaagon ki nyan Efraim Aabisamɔb mɔk ki ti saa Kilɔlɔŋ ni Aabisamɔb chee lii kitiŋ. Naafɔfɔk kitiŋ ga nan li pii ŋitaa ikui iloob.

¹⁴ U nan yoor tikunabr, ni salmaa u mɔmɔk bi nan kan na, ni Uwumbɔr Aadichal ponn ni aawan mɔmɔk, ni libɔrdichal ponn ni aawan mɔmɔk, le ki di gir buen Samaria aatiŋ ni. U nan ki chur binib mu di buen.

¹⁵ Jehoas aah nan ki tun ŋitun ŋi mɔmɔk na, ni waajakaan i u nan di mɔk Juda yaab aabɔr Amasia butɔb ni na bi Israel Aabɔrb Aatun Aagbaŋ ni la.

¹⁶ Jehoas nan kpo, le bi di u sub nnaan aacheek ponn ni, Samaria aatiŋ ni, le ujapɔɔn Jeroboam nab waanaan pu.

Juda yaab aabɔr Amasia aakun aabɔr

¹⁷ Israel yaab aabɔr Jehoas aah nan kpo na, Juda yaab aabɔr Amasia nan bi ki ti saa ŋibin kipiik ni ŋiŋmu le ki nin kpo.

¹⁸ Amasia aah nan tun ŋitun ŋi mɔmɔk na bi Juda Aabɔrb Aatun Aagbaŋ ni la.

¹⁹ Nkpokl nan bi Jerusalem ni ke bi ku Amasia, le u nan san buen Lakis aatiŋ ni, le waadim nan paan u pu nima chee ki ti ku u.

²⁰ Bi nan di utaan le yoor u ki di gir buen Jerusalem aatiŋ ni ke bi ti sub u nnaan aacheek ni, David Aatiŋ ni.

²¹ Le Juda aanib di ujapɔɔn Usia, u nan laa ye ŋibin kipiik ni ŋiloob aanii na kaan nnaan.

²² Usia aate aakun aapuwɔb le u nan ki nyaŋ ki gaa Elaf aatiŋ ki ki gir maa ki.

Israel yaab aabɔr Jeroboam uken na aabɔr

²³ Juda yaab aabɔr Joas aajapɔɔn Amasia aah nan ye Juda aabɔr pu na aabin kipiik ni liŋmuŋmur ponn ni, le Jehoas aajapɔɔn Jeroboam jin Israel aanaan, ki bi Samaria aatiŋ ni ki joo waanib ki ti saa ŋibin imonko ilee ni libaa.

²⁴ U nan dii Nebat aajapɔɔn Ubɔr Jeroboam u nan puen u kal lijal ngbaan pu, ki nan di titunwanbir mɔk Israel yaab na aabiin aasan, le ki tun Uwumbɔr titunwanbir.

²⁵ U nan ki nyaŋ ki gaa lipepel li mɔmɔk nan ye Israel aapepel na, ki nyan Hamaf Aasan mu bi ŋŋangan wɔb na mɔk ki ti saa N‑yaan Aanyusakpem mu bi ŋŋangii wɔb na. Israel yaab Aadindaan Uwumbɔr aah nan puu pu tii Amitai aajapɔɔn Jona, u nan ye Gaf Hefer aanii, ki ye waatutunn, ki ye waabɔnabr na le na.

²⁶ Uwumbɔr nan kan Israel yaab aah nan ji falaa sakpen u na; le ubaa aa nan bi u ter bi.

²⁷ Tɔ, naa nan ye Uwumbɔr aalandak ke u kuln Israel aanib kookoo, kina pu le u nan cha Jehoas aajapɔɔn Ubɔr Jeroboam gaa bi lii.

²⁸ Jeroboam aah nan ki tun ŋitun ŋi mɔmɔk na, ni waajakaan i u di mɔk butɔb ni na, ni waah nan ki gaa Damaskus ni Hamaf aatim koon Israel aatim ni pu na mɔmɔk bi Israel Aabɔrb Aatun Aagbaŋ ni la.

²⁹ Jeroboam nan kpo, le bi di u sub nnaan aacheek ni, le ujapɔɔn Sekaria nab waanaan pu.