2 Bibɔrb 13 - Uwumbɔr aagbaŋ

Israel yaab aabɔr Jehoahas aabɔr

¹ Ahasia aajapɔɔn Joas aah nan ye Juda yaab aabɔr pu na aabin moninko ni litatar ponn ni, le Jehu aajapɔɔn Jehoahas jin Israel aanaan, ki nan bi Samaria aatiŋ ni ki joo waanib ki ti saa ŋibin kipiik ni ŋilole.

² U nan tun Uwumbɔr titunwanbir ki di Israel yaab mɔk titunwanbir ke Jeroboam u nan puen kal lijal ngbaan pu na la. Waa nan di cha titunwanbir aatuln.

³ Kina pu le Uwumbɔr aaŋuul nan fii Israel aanib pu, le u cha Siria aatiŋ aabɔr Hasael ni ujapɔɔn Ben‑Hadad nan nyaŋni Israel yaab n‑yoonn mu mɔk bi di biyil kpaa tɔb na.

⁴ Le Ubɔr Jehoahas mee Uwumbɔr, le Uwumbɔr aah nan waa Siria aatiŋ aabɔr aah ŋani Israel yaab mbiin sakpen pu na, le u kii waameel ngbaan.

⁵ Uwumbɔr nan tii Israel yaab usaloln u gaa bi Siria yaab chee lii na. Le Israel yaab nan ki kan nsuudoon ke baah nan bi pu njan na.

⁶ Tɔ, baa nan di cha titunwanbir ti Ubɔr Jeroboam nan di mɔk Israel yaab na. Bi nan beenin tun titunwanbir ngbaan; le liwaapii Asera aanaŋ beenin bi Samaria aatiŋ ni.

⁷ Jehoahas aa nan ki kpa bijab bi kpa tijawan na; bitandam piiŋmu, ni tɔroku tiib kipiik, ni bitaabɔndam ŋichur kipiik baanja le nan gur. Siria aatiŋ aabɔr nan taa taa bi gur na ŋmal titan ni ke kitangbaak na ki kuln bi.

⁸ Jehoahas aah nan ki tun ŋitun ŋi mɔmɔk na, ni waajakaan aatun mɔmɔk, bi Israel Aabɔrb Aatun Aagbaŋ ni la.

⁹ U nan kpo, le bi di u sub Samaria aatiŋ ni, le ujapɔɔn Jehoas nab waanaan pu.

Israel yaab aabɔr Jehoas aabɔr

¹⁰ Juda yaab aabɔr Joas aanaan aabin piitaa ni lilolole ponn ni, le Jehoahas aajapɔɔn Jehoas jin Israel aanaan, le ki bi Samaria aatiŋ ni ki joo waanib ki ti saa ŋibin kipiik ni ŋiloob.

¹¹ U mu nan dii Ubɔr Jeroboam u nan di titunwanbir aatuln mɔk Israel aanib na aasan, le ki tun Uwumbɔr titunwanbir.

¹² Jehoas aah nan ki tun ŋitun ŋi mɔmɔk na, ni waajakaan i u nan di mɔk Juda yaab aabɔr Amasia butɔb ni na bi Israel Aabɔrb Aatun Aagbaŋ ni la.

¹³ Jehoas nan kpo, le bi di u sub nnaan aacheek ni, Samaria aatiŋ ponn ni, le ujapɔɔn u bi nan ki yin u mu ke Jeroboam na nab waanaan pu.

Uwumbɔr aabɔnabr Elaisa aakun aabɔr

¹⁴ Iween i bir sakpen na nan chuu Uwumbɔr aabɔnabr Elaisa, le waah dɔ kibundiik ni na, Israel yaab aabɔr Jehoas buen u ti mann u. U nan wii le ki bui Elaisa ke, “Nte, nte, sin le ye Israel yaab aakikiir kpaan.”

¹⁵ Le Elaisa bui ubɔr ngbaan ke, “Ban butɔm ni ipiin.” Jehoas nan ban kina aawan,

¹⁶ le Elaisa bui u ke u gor ke waah ban u too mpiin le na. Le ubɔr nan ŋa kina, le Elaisa di uŋaal paan ubɔr aaŋaal pu.

¹⁷ Le ubɔr nan dii Elaisa aah mɔk u pu na, le ki piir takolu u bi Siria aatiŋ wɔb na. Le Elaisa bui u ke, “Too mpiin ngbaan.” Ubɔr aah too mpiin ngbaan na, libuul ngbaan ni le Elaisa teen ke, “Sin le ye Uwumbɔr aapiin mu u ga di nyaŋ Siria yaab na. Aa ni Siria yaab ga ti jan Afek aatiŋ ni ki ti saa buyoonn aa ga nyaŋ bi na.”

¹⁸ Le Elaisa ki bui ubɔr ke u yoor ipiin i gur na ki di faa kitiŋ. Ubɔr nan di i faa nfum mutaa le ki di cha kina.

¹⁹ Nimina nan cha liŋuul chuu Elaisa, le u bui ubɔr ngbaan ke, “Aa ba ga faa nfum muŋmu bee muloob la, le ki ba nyaŋ Siria yaab pel pel; tɔ, aa ga nyaŋ bi nfum mutaa baanja la.”

²⁰ Elaisa nan kpo, le bi di u sub. Libiln mɔk kan, Moab aajab nan koo ni Israel aatiŋ ni le ki nan tak bi.

²¹ N‑yoonn mubaa, likpuul libaa ni, le bi kan kina aajab, le binib ngbaan nan di utekpiir ngbaan mee lii Elaisa aakaakul ni ki san. Linikpol ngbaan aah ti meeh Elaisa aakpab na, libuul ngbaan ni le uja ngbaan fikr nkun ni, ki fii sil.

Israel yaab ni Siria yaab aatɔb aabɔr

²² Jehoahas aanaan aayoonn mɔmɔk ni, Siria aatiŋ aabɔr Hasael nan muk Israel yaab pam,

²³ le Uwumbɔr nan kpa tibulchinn ki san bi kinimbaak. Waa nan kii ke bi kuln bi, le ki ter bi waah nan puu tipuur ti tii Abraham, ni Aisak, ni Jakob na pu. Waa kee suln waanib bɔr daalbaadaal.

²⁴ Siria aatiŋ aabɔr Hasael aah nan kpo na, ujapɔɔn Ben‑Hadad le nan nab waanaan pu.

²⁵ N‑yoonn ngbaan le Israel yaab aabɔr Jehoas nyaŋ Ben‑Hadad nfum mutaa butɔb ni, le ki ki gaa ntim mu Ben‑Hadad nan gaa, Jehoas aate Jehoahas aah nan ye ubɔr pu na.