2 Bibɔrb 12 - Uwumbɔr aagbaŋ

Juda yaab aabɔr Joas aabɔr

¹ Israel yaab aabɔr Jehu aanaan aabilololer ponn ni le Joas jin Juda aanaan, le ki bi Jerusalem aatiŋ ni ki joo waanib ki ti saa ŋibin imonko ilee. Una le nan ye Sibia, u nan ye Beerseba aatiŋ aanii na.

² Waamɔfal mɔmɔk ni, u nan tun Uwumbɔr aageehn la, ba pu? utotoor Jehoyada le nan mɔk u waah ga ŋa pu na.

³ Tɔ, baa nan kuln ŋiwaa aadoon chee, le binib nan beenin toor ki seer nnyɔknii nima.

⁴ Joas nan yin ni bitotoorb le ki nan bui bi ke bi li bilni ŋimombil ŋi ye Uwumbɔr Aadichal ponn ni aapiin na, ŋima le ye n‑yoonn mɔmɔk aatork aapar, ni ŋimombil ŋi binib nan tii ipiin na.

⁵ Utotoor mɔk nan yeh waah tun binib bi chee na aamombil aabiln, le bi ga li joo ŋi toor Uwumbɔr Aadichal nin chee ban ntoorm na.

⁶ Tɔ, Joas aanaan aabin moninko ni litatar ponn ni, bitotoorb ngbaan aa nan toor Uwumbɔr Aadichal nibaa chee.

⁷ Kina pu le u nan yin ni Jehoyada ni bitotoorb biken ki nan baa bi ke, “Ba ŋa naa toor Uwumbɔr Aadichal? Ki nya din ki joo cha, ni taa ki di naah gaal ŋimombil ŋi na bil nibaa, ni di ŋi tii ni, aan Uwumbɔr Aadichal aatoorn ga ŋmaa ŋa.”

⁸ Bitotoorb ngbaan nan kii kina, le ki ki kii ke baa yeh Uwumbɔr Aadichal aatoorn.

⁹ Le Jehoyada nan ban dakaa, ki ŋa liboln waabiil pu, le ki di u siin kitork aabimbin chee, unii yaa chaa koo Uwumbɔr Aadichal ni kan, uŋangii wɔb. Bitotoorb bi nan kii mbisamɔb na joo binib bi mɔmɔk dan bi nan doon Uwumbɔr na aamombil ŋani u ni la.

¹⁰ Le ŋimombil aah ti wiir u ponn ni na, le nnaan ni aagbaŋmeer ni Utotoorninkpel ti dan, ki nan kahn tikunabr aamombil mɔmɔk le ki di ŋa bɔtɔ tiib ponn ni.

¹¹ Bi yaa ti ŋmee ŋaah ye pu na bil kan, le bi di ŋi tii binib bi yeh Uwumbɔr Aadichal aatoorn na, le bima le ga pa binib bi kpii ŋikpan na, ni bidimaab,

¹² ni bitapɔlb, ni binib bi kpii ŋitakpal na, ki daa idɔ ni ŋitakpal ŋi bi joo toor lidichal na, ki pa ŋipɔɔn ŋi mɔmɔk bi na.

¹³ Tɔ, baa nan tee joo ŋimombil ngbaan ponn ni libaa ŋani tikunabr aayir, ni ŋisambil, ni kakaan tiib, ni tiwan ni bi joo toor karyaa tiib na, kaa joo ŋani tikunabr ni salmaa aawan nibaa.

¹⁴ Bi nan joo ŋi pa bitutum, le ki daa tiwan ni bi joo toor Uwumbɔr Aadichal ni na baanja.

¹⁵ Bijab bi nan joo lituln ngbaan na nan ye bibulchim la, kina pu na, naa nan ki kpa ke bi yin bi ki nan baa bi baah jin pu na.

¹⁶ Ŋimombil ŋi bi nan tii ipiin aapɔln na, ni titunwanbir aatork aamombil ma aa nan koo dakaa ngbaan ni; ŋima ye bitotoorb aamombil la.

¹⁷ N‑yoonn ngbaan le Siria aatiŋ aabɔr Hasael nan ti tak Gaf aatiŋ ki nyaŋ ki; le ki ŋa nlandak ke u ti tak Jerusalem mu.

¹⁸ Ubɔr Joas nan yoor ipiin i mɔmɔk Jehosafat, ni Jehoram, ni Ahasia bi nan puen u ki jin jin nnaan na nan di tii Uwumbɔr na, ni u mu ubaa aah nan tii Uwumbɔr i na, ni salmaa u mɔmɔk nan bi Uwumbɔr Aadichal ni, ni libɔrdichal ni na, le ki di ni mɔmɔk tun ti tii Ubɔr Hasael ipiin; le u di waajab siir cha Jerusalem aatiŋ kaa ki tak ki.

¹⁹ Ubɔr Joas aah nan ki tun ŋitun ŋi mɔmɔk na bi Juda Aabɔrb Aatun Aagbaŋ ni la.

^20-21 Ubɔr Joas aajab aaninkpiib nan kpokl u pu, le bi ponn ni bilee, Simeaf aajapɔɔn Josakar, ni Somer aajapɔɔn Jehosabad ti ku u lidichal li bi nan maa li kifataŋ aatiŋ ki bi Jerusalem aawipuul wɔb aan bi nan ŋeeb na ponn ni. Li nan bi nsan mu cha Sila aatiŋ ni na chee la. Bi nan sub Joas nnaan aacheek ni, David Aatiŋ ni la, le ujapɔɔn Amasia nab waanaan pu.