2 Bibɔrb 1 - Uwumbɔr aagbaŋ

Elaija ni Ubɔr Ahasia aabɔr

¹ Israel yaab aabɔr Ahab aah kpo na, le Moab aatiŋ nyan Israel aatiŋ aapuwɔb.

² Israel yaab aabɔr Ahasia nan si waabɔrdichal aachiln li bi ŋa lidichal ngbaan aapaacham na, le ki ker lir ni, ki kan titotonn pam. Kina pu le u nan tun Filistia yaab aawaal Baal‑Sebub li bi Ekronn aatiŋ ni na chee, ke bi ti baa lik ke u ga ŋmar aan waan ŋmar.

³ Le Uwumbɔr aatuun nan bui Elaija, u nan ye waabɔnabr ki nyan ni Tisbe aatiŋ ni na, ke u buen ti keln Ubɔr Ahasia aah tun binib bi na, ki baa bi ke, “Ba ŋa ni cha ni ti buu tibɔɔr Ekronn aatiŋ aawaal Baal‑Sebub chee? Ni ye le ke ni dak ke Uwumbɔr aa bi Israel aatiŋ ni ii?

⁴ Ti bui man ubɔr ke Uwumbɔr len ke, ‘Saan fii saabunbunn tee pu; aa ga kpo.’” Elaija nan ŋa Uwumbɔr aah nan tuk u pu na,

⁵ le ituun ngbaan nan gir ubɔr chee. Le u baa bi ke, “Ba ŋa ni gir ni?”

⁶ Le bi gar u ke, “Uja ubaa le ton timi nsan ni, le ki bui timi ke ti gir ni ki nan tuk si ke Uwumbɔr bui si ke, ‘Ba ŋa aa tun binib ke bi ti buu Ekronn aawaal Baal‑Sebub chee tibɔɔr? Ni ye le ke aa dak ke Uwumbɔr aa bi Israel aatiŋ ni ii? Saan fii saabunbunn tee pu; aa ga kpo.’”

⁷ Le ubɔr ngbaan baa bi ke, “Uja ngbaan bi kinye?”

⁸ Le bi gar u ke, “U pee kikpalk ki bi di kiwakork aagban ŋal ki na, le ki di ligbapapaln buu uchaŋ ni.” Le ubɔr ngbaan teen ke, “Tisbe aatiŋ aanii Elaija ye,”

⁹ le ki di uninkpel ubaa ni bijab piiŋmu tun ke bi ti chuu ni Elaija. Uninkpel ngbaan nan ti kan u, u ka ligongoln libaa paab le ki bui u ke, “Uwumbɔr aanii, ubɔr bui ke aa dan.”

¹⁰ Le Elaija gar u ke, “M yaa ye Uwumbɔr aanii kan, u cha mmii nyan ni paacham ki nan ku aa ni saajab bee.” Libuul ngbaan ni le mmii sunn ni ki nan ku uninkpel ngbaan ni waajab na mɔmɔk.

¹¹ Le ubɔr nan ki di uninkpel uken ni bijab piiŋmu tun, le u mu buen ki ti bui Elaija ke, “Uwumbɔr aanii, ubɔr bui ke aa dan libuul lee ni.”

¹² Le Elaija gar u ke, “M yaa ye Uwumbɔr aanii kan, u cha mmii nyan ni paacham ki nan ku aa ni saajab bee.” Libuul ngbaan ni le Uwumbɔr aamii sunn ni ki nan ku uninkpel ngbaan ni waajab na mɔmɔk.

¹³ Ubɔr ngbaan nan ki di uninkpel uken ni bijab piiŋmu tun. U nan jon ligongoln ngbaan le ki gbaan utaŋaayil pu Elaija aanimbiin ni, le ki gaŋ u ke, “Uwumbɔr aanii, san m ni maajab kinimbaak. Taa ku timi.

¹⁴ Mmii nan nyan paacham le ki nan ku bininkpiib bilee na ni baajab; mma gaŋni si la, san mi kinimbaak.”

¹⁵ Le Uwumbɔr aatuun bui Elaija ke, “Li dii u cha, ki taa san ijawaan.” Le Elaija nan dii uninkpel ngbaan buen ubɔr chee,

¹⁶ le ki ti bui u ke, “Uwumbɔr aah len pu na sɔ: ‘Saah tun binib ke bi ti buu Ekronn aatiŋ ni aawaal Baal‑Sebub chee tibɔɔr ke Uwumbɔr le aah kaa bi Israel aatiŋ pu aan aa ga baa u chee na, saan fii saabunbunn tee pu; aa ga kpo.’”

¹⁷ Uwumbɔr aah nan cha Elaija len pu na, Ahasia nan sil kpo. Ahasia aa kpa ubijabo, kina pu na, unaal Joram le nan nab waanaan pu. Juda aabɔr Jehoram, u aate nan ye Jehosafat na aanaan aabileler ni le nan bi na.

¹⁸ Ubɔr Ahasia aah nan ki ŋa tiwan ni mɔmɔk na bi Israel Aabɔrb Aatun Aagbaŋ ni la.