2 Bibɔrb Aabɔr 9 - Uwumbɔr aagbaŋ

Upiibɔr aah nyan ni Seba aatiŋ ni pu na

¹ Seba aatiŋ aapiibɔr nan ŋun Solomonn aayimbil pu, le ki buen Jerusalem aatiŋ ni ke u ti di mbaan mu pɔɔ sakpen na tɔŋ u ki lik. Bitutum pam le nan dii u buen, ki kpee laakumii tiib bi tu tulalee aabɔŋ aabɔŋ, ni ŋitakpanyaan na, ni salmaa u wiir sakpen na. U ni Solomonn aah nan ti kal ke bi gbaa tibɔr na, u nan baa u mbaan pɔɔl mumɔk u nan joo uyil ni na.

² Solomonn nan tii u mbaan ngbaan mɔmɔk aagarm; nibaa aa nan pɔɔ waa ŋmaa tuk u naatataa.

³ Seba aapiibɔr ngbaan nan kan Solomonn aah kpa nlan sakpen pu na, ni waah nan maa libɔrdichal li na.

⁴ U nan kan tijikaar ti u ji na, ni waaninkpiib aakookoo yaan chee aah bi pu na, ni waatutum aah tun baatuln pu na, ni baawanpeenkaan ni bi peeni na, ni waatutum bi si gbɔk u njim aayoonn na aawanpeenkaan, ni kitork aawan ni u joo chaa ti toor Uwumbɔr Aadichal ni na. Le ni ŋa u lijinjiir waa ti ki nyi waah bi nin chee na.

⁵ Le u bui Solomonn ke, “Maah ŋun saatun ni saalan mu pu maatiŋ ni na ye mbamɔn la.

⁶ Maa nan ŋa naadii tii baah tuk mi pu na, see maah dan aan nnimbil nan kan pu na. Maah ŋun saalan pu pu na aa fuu maah nan kan pu na aageln libaa. Saalan jer binib aah joo bimɔi len pu na.

⁷ Binib bi tun saatuln ki bi aa chee n‑yoonn mɔmɔk, ki kpa nsan ki bi li ŋun saaninkpeliin na kpa liyinyaan.

⁸ Li pak Aadindaan Uwumbɔr. U mɔk si waah gee si pu na le ki di si ŋa ubɔr, ke aa di waayimbil joo saanib. Waah gee waanib Israel yaab pu ki ban ke bi li bi n‑yoonn mɔmɔk na, le u di si ŋa baabɔr ke aa cha waakaal ni ibamɔn li bi.”

⁹ Seba aapiibɔr ngbaan nan di waah joo ni ipiin i na tii Solomonn. U nan tii u salmaa u aanyunyuun ga jer njikaabim bɔtɔ mam nkub na, ni tulalee tiib bi saan ŋmaa kahn na, ni ŋitakpanyaan mu kina. Waah nan joo tulalee tiib bi nan tii Solomonn na aaŋeen aatɔ aa ki bi.

¹⁰ (Ubɔr Hiram ni Solomonn aajab bi nan joo salmaa nyan ni Ofir tii ni u na mu nan joo ni santina nyaan ubaa aadɔ ni ŋitakpanyaan.

¹¹ Solomonn nan di idɔ ngbaan ŋa Uwumbɔr Aadichal ni libɔrdichal aabimbin ŋi bi taar koo li ni na, ni tibar tii biwangbaab. Tiwan ngbaan aaŋeen aatɔ aa kee dan Juda aatiŋ pu.)

¹² Ubɔr Solomonn nan tii Seba aapiibɔr ngbaan tiwan nimɔk u nan ban na, le ni jer upiibɔr ngbaan aah nan joo tiwan ni na tii u na. Le u ni waatutum ki gir kun waatiŋ Seba ni.

Ubɔr Solomonn aawankpal

¹³ Libiln mɔk ni kan, Solomonn nan kani salmaa u aanyunyuun ga pii njikaabim bɔtɔ tiib ikui iŋmu na,

¹⁴ le ki kpee biwankoob ni biwantiirb aah pa lampoo u na pu. Arabia aabɔrb ni Israel aapepel aayidam mu nan joo ni u salmaa ni tikunabr.

¹⁵ Solomonn nan ŋa kijaak aapen ŋi pee na ikui ilee, le ki di salmaa u aanyunyuun ga pii njikaabim kuruwaa bilole na boon libaabaa,

¹⁶ le ki ŋa ŋiwaatiir mu ikui itaa, ki di salmaa u aanyunyuun ga pii njikaabim kuruwaa binaa na boon libaabaa. U nan di ŋipen ngbaan siin libɔrdichal aanaakook ki bi yin ki ke Lebanonn Aachook Aanaakook na ni la.

¹⁷ Ubɔr Solomonn nan ki cha bi ŋa libɔrjal sakpeln libaa. Bi nan di iluub aanyin le ŋa lipepel libaa, le ki di salmaa bamɔnn boon lipepel li gur na.

¹⁸ Li nan paa, kina pu le u nan ŋa ŋibimbin ŋiloob ke u li taar ti kaa li pu. U nan ŋa utaa aajabik dab li, ki di salmaa boon ki mu. U nan ŋa uŋaal aah ga li paani nin chee na ŋipepel ŋilee ngbaan pu, le ki naan ichinn ilee siin ŋipepel ŋilee ngbaan pu.

¹⁹ Ichinn kipiik ni ilee le u nan naan siin ŋibimbin ngbaan pu. Libaa mɔk aapepel nan kpa uchinn la. Kina aabɔrjal aaboln aa nan ki bi nnaan mubaa ni.

²⁰ Ubɔr Solomonn aayikur mɔmɔk nan ye salmaa aayikur la, le ŋisambil ŋi mɔmɔk nan bi Lebanonn Aachook Aanaakook na ponn ni na nan ye salmaa bamɔnn aawan ŋmeen. Buyoonn Solomonn nan ye ubɔr na, baa nan ki yin tikunabr nibaa.

²¹ U nan kpa nnyusakpem aaŋɔi, le i ni Ubɔr Hiram aaŋɔi nan chuun. Libitatar mɔk ni kan, i nan joo ni u salmaa, ni tikunabr, ni iluub aanyin, ni ŋikpal, ni ilatan la.

²² Ubɔr Solomonn nan kpa liwankpal ni nlan ki jer dulnyaa wee ni aabɔrb mɔmɔk pel pel.

²³ Bi mɔmɔk nan choo u chee, ki nan pel nlan mu Uwumbɔr di tii u na aabɔr.

²⁴ Unii umɔk nan choo na nan joo ni Solomonn ipiin: tikunabr ni salmaa aawan, ni tiwanpeenkaan, ni tijawan, ni tulalee tiib, ni itaan, ni tiwakor ti naahn itaan ki bi ke ibon na aapiin la. Libiln mɔk kan, bi nan joo ni kina le nan tii u.

²⁵ Ubɔr Solomonn nan ki kpa itaan ni yaatɔroku tiib aasisii chee ŋiker ŋichur ŋinaa la, le ki kpa butɔb aataan mu ŋichur kipiik ni ŋilee. Ibaa nan bi Jerusalem ponn ni, le iken mu bi bi ntim muken na ni.

²⁶ Uma le nan ye bibɔrb bi mɔmɔk nan bi Yufrates Aamɔɔl wɔb ki ti saa Filistia ni Ijipt aatinaanmɔk na aabɔrkpaan.

²⁷ Waayoonn, tikunabr nan wiir Jerusalem aatiŋ ni ke ŋitakpal na la, le santina mu aadɔ wiir ke sufam bu si Juda aataataab aagongon ni na la.

²⁸ Solomonn nan daa itaan nya ni Musri, ni kitiŋ kimɔk nan kpa itaan na ni la.

Solomonn aanaan aabɔgem

²⁹ Solomonn aatun aabɔr ti gur ki nyan waah piin pu na, ni waah ti doo pu na bi Uwumbɔr aabɔnabr Natann aagbaŋ ni, ni Ahija u nyan ni Silo na aah nan di Uwumbɔr aabɔr ti nabr na aagbaŋ ni, ni Uwumbɔr aabɔnabr Ido aabɔkpiirkaan aagbaŋ ni la. Uma Ido aagbaŋ ngbaan ponn ni le Israel yaab aabɔr Jeroboam mu aanaan aabɔr bi.

³⁰ Solomonn nan bi Jerusalem ni le ki joo Israel mɔmɔk ki ti saa ŋibin imonko ilee.

³¹ U nan kpo, le bi di u sub David Aatiŋ ni, le ujapɔɔn Rehoboam kal waajal pu ki ye ubɔr.