2 Bibɔrb Aabɔr 8 - Uwumbɔr aagbaŋ

Solomonn aah nan tun ŋitun ŋi na

¹ Solomonn nan di ŋibin moninko le ki di maa Uwumbɔr Aadichal, ni waabɔrdichal.

² U nan ki gir maa ntim mu Ubɔr Hiram nan di tii u na, le ki cha Israel aanib ti koo mu ponn ni.

³ U nan nyaŋ ki gaa Hamaf ni Soba aapepel,

⁴ ni Palmira aatiŋ ki maa ŋigon kiir ki aan ki di tijawan ŋa ki ni. Kitiŋ ngbaan nan bi nteersakpiin ni la. U nan ki gir maa Hamaf aatim mu ponn ni bi nan joo tiwanbankaan siini na.

⁵ Solomonn le nan ki gir maa ntim mumina, Bef Horonn Paacham ni Bef Horonn Taab. Ntim ngbaan nan ye ntim mu bi maa ŋigon kiir mu aan mu kpa tijawan na, le ki kpa ibisamɔi i bi laŋni i na,

⁶ ki kpee Baalaf aatiŋ, ni ntim mumɔk ponn ni bi nan joo tiwanbankaan siini na, ni ntim mu ponn ni waataan ni yaatɔroku tiib bi na. U nan maa Jerusalem ni Lebanonn ponn ni ntamaam mu u nan ŋa nlandak ke u maa na, u nan ŋa kina lipepel limɔk nan ye uyaan na ponn ni.

^7-8 Solomonn nan cha Kanaann yaab aayaabitiib bi Israel yaab aa nan ku bi buyoonn bi nan gaa baatiŋ na tun ntamaam mumina aatuln ke binaagbiib na. Bima le nan ye Hef yaab, ni Amor yaab, ni Peres yaab, ni Hif yaab, ni Jebus yaab. Biyaabitiib beenin ye binaagbiib le ki nan saa din.

⁹ Solomonn aa nan di Israel yaab ŋa binaagbiib, bima le nan ye waatɔb aajab, ni waatuln aaninkpiib, ni bijab bi ŋaal itaan aatɔroku tiib na aayidam, ni bitandam.

¹⁰ Binaagbiib bi nan bi maa ntamaam mu mɔmɔk na aaninkpiib nan ti saa binib ikui ilee ni piiŋmu la.

¹¹ Solomonn nan nyan upuu, u aate nan ye Ijipt aatiŋ aabɔr na, David Aatiŋ ni, ki di u koon waah maa lidichal li tii u na ponn ni. U nan bui ke, “Waan koo Israel yaab Aabɔr David aabɔrdichal ni, ba pu? Uwumbɔr Aakaal Aadakaa aah koo kitiŋ kimɔk ponn ni na ye chain la.”

¹² Solomonn nan toor kitork tii Uwumbɔr, waah nan maa kitork aabimbiln li Uwumbɔr Aadichal aabisamɔb chee na pu.

¹³ U nan toor kitork ki bi joo seer mmii ni na nwinyaan mɔk daal ki dii Moses aakaal aah nan mɔk pu na aasan: u nan toor Likpaakool daal, ni Uŋmapɔɔn aajim daal, ni libiln mɔk aajim mutaa na aatork. Tima le nan ye Lakr‑jer Aajim, ni Lijikaacheel Aajim, ni Tikakar Aajim aatork.

¹⁴ U nan dii ute David aah siin isan i na pu le ki mɔk bitotoorb ni Liifai yaab bi ter bitotoorb ki gaa ilahn baatuln yoonn na, le bi tun baatun. U nan ki mɔk Uwumbɔr Aadichal aakikiib, le bi mu tun baatun ibisamɔi ngbaan mɔk chee iwiin mɔmɔk. Bi nan tun ŋi Uwumbɔr aanii David aah nan mɔk pu na la.

¹⁵ David aah nan mɔk pu ke bitotoorb ni Liifai yaab li tun tiwanbankaan aadir, ni ŋitun ŋiken pu na, bi nan tun ŋi mɔmɔk deedee la.

¹⁶ Joo cha ni n‑yoonn mue na, Solomonn aah nan siin ke u tun pu na mɔmɔk nan doo a. Ki nya Uwumbɔr Aadichal aadinyikl aabiln daal ki ti saa laadoon, u nan nyaŋ ki doo ŋi mɔmɔk pel pel.

¹⁷ Solomonn nan buen Esionn Geber ni Elaf aatim mu bi Akaba Aanyusakpem aagbaan na, Edom aatiŋ ni.

¹⁸ Ubɔr Hiram nan cha ubaa aaninkpiib le di iŋɔsakpiin buen u chee nima. Biŋɔŋaab bi nyi baatuln mbamɔm na le nan ŋaal i buen. Bi ni Solomonn aaninkpiib le nan di iŋɔi ngbaan buen Ofir ki ti joo ni salmaa u aanyunyuun ga jer njikaabim bɔtɔ tiib ikui itaa ni moninko na nan tii Solomonn.