2 Bibɔrb Aabɔr 7 - Uwumbɔr aagbaŋ

Baah di Uwumbɔr Aadichal tii u pu na

¹ Ubɔr Solomonn aah mee waameel doo na, le mmii nyan ni paacham ki nan gaa kitork ki bi toor tii Uwumbɔr na. Le Uwumbɔr aawiihn mu moor ki deer ŋinimbil ni na gbiin Uwumbɔr Aadichal ngbaan.

² Nwiihn ngbaan aah nan moor ki deer ŋinimbil ni na, le bitotoorb aa nan ŋmaa koo li ponn ni.

³ Israel aanib ngbaan aah nan kan mmii nyan ni paacham ki lir ni aan nwiihn gbiin Uwumbɔr Aadichal ngbaan na, le bi lir lichichikr lichiln ngbaan ni, ki dooni Uwumbɔr ki pak u, waaŋann ni waageehm mu kaa kpa ndoon na pu.

⁴ Solomonn ni binib ngbaan mɔmɔk nan toor kitork tii Uwumbɔr.

⁵ U nan di inaa ŋichur moninko ni ŋilee, ni ipiih ŋichur nkub ni moninko le toor kimɔbaan aatork. Kina le u ni binib ngbaan mɔmɔk nan di Uwumbɔr Aadichal tii u.

⁶ Bitotoorb nan sil baabuul ni, le Liifai yaab mu sil baabuul ni ki lik ni bitotoorb, ki joo Ubɔr David aah nan di tiwangbaakaan ni tii bi na pak Uwumbɔr ki gaa nlahn David aah nan mɔk bi pu na ke, “Waageehm aa kpa ndoon.” Bitotoorb nan pii kakaan tiib, le binib ngbaan mɔk nan si.

⁷ Solomonn nan di lichiln ngbaan aakaasisik ni, ni bi Uwumbɔr Aadichal aabisamɔb aapaan ni na tii Uwumbɔr le ki toor kitork ki aanann bi joo seer mmii ni na nima chee. U nan ki di njikaabim ni kimɔbaan aatork aakpan mu see mmii ni nima chee. Waah nan maa tikumann aatork aabimbiln li na nan par ke u di kitork ngbaan mɔmɔk aanann see mmii ni li pu; nima pu le u nan ŋa kina.

⁸ Solomonn ni Israel aanib mɔmɔk nan jin Tikakar Aajim ki ti saa iwiin ilole. Kinipaak nan nyan ni dandar, ki nyan ni Hamaf aasan mu bi ŋŋangan wɔb na, ni Ijipt aatinaanmɔk ŋŋangii wɔb.

⁹ Bi nan di iwiin ilole le tun baah nan ban bi di kitork aabimbiln di ŋum Uwumbɔr aaŋaal ni pu na aatuln, le ki ki di iwiin ilole mu jin Tikakar Aajim. Kookoo aawiin daal, bi nan ŋa baah ga yaa pu na aajim,

¹⁰ le ki woln ŋmalole aawiin moninko ni itaa daal, le Solomonn cha binib ngbaan gir kun. Bisui nan piir tinyoor ti mɔmɔk Uwumbɔr nan di tii waanib Israel yaab, ni David, ni Solomonn na pu.

Uwumbɔr aah nan ki di ubaa mɔk Solomonn pu na

¹¹ Solomonn aah nan doo Uwumbɔr Aadichal ni nnaan aadichal, ki ŋmaa nyaŋ ki ŋa tiwan nimɔk waalandak nan ban ke u ŋa ni pu na,

¹² le Uwumbɔr nan dan u chee kinyeek ki nan bui u ke, “M ŋun saameel, ki gaa lidichal limina ke li li ye nin chee bi ga li toor kitork tii mi na.

¹³ N‑yoonn mumɔk m chuu utaal, bee m cha itoon dan nan di tijikaar ŋman, bee m yaa cha iween lir maanib pu,

¹⁴ aan bi yaa mee limeel m chee ki kpeln baabimbin ki yii baah tun titunwanbir ti na kan, le m ga li bi paacham ki ŋun baameel ngbaan, ki di baatunwanbir cha pinn bi, ki ki cha baatiŋ ŋa tinyoor.

¹⁵ M ga li lik Maadichal limina pu ki ga kii limeel limɔk bi mee do na,

¹⁶ ba pu? min le lee li, ki ŋa li chain ke li li ye nin chee bi ga li dooni mi n‑yoonn mɔmɔk na. M ga li lik li, ki kii li n‑yoonn mɔmɔk.

¹⁷ Aa yaa dii mi mbamɔm ke aate David aah nan ŋa pu na, ki joo maakaal, ki ŋani maah bui si pu na mɔmɔk kan,

¹⁸ m ga li joo tipuur ti m nan puu tii David ki bui u ke uyaabitiib le ga li joo Israel aanib n‑yoonn mɔmɔk na.

¹⁹ Tɔ, aa ni saanib yaa yii maakaal, ni maah mɔk nimi pu na, ki dooni ŋiwaa kan,

²⁰ le m ga nyan nimi kitiŋ ki m di tii nimi na ni, le ki ga nya cha Maadichal li m ŋa li chain ke li li ye nin chee bi ga li dooni mi na. Binib mɔmɔk ga li joo li ŋani yaansara ki lik seeni li.

²¹ “N‑yoonn mumina, bi nyuŋni Maadichal ngbaan sakpen, tɔ, ni ga nan ŋa unii umɔk jer li chee na iwaan le u baa ke, ‘Ba ŋa Uwumbɔr ŋa kitiŋ kee ni lidichal lee kina?’

²² Le binib ga gar u ke, ‘Baah yii Bidindaan Uwumbɔr u nan nyan ni biyaajatiib Ijipt aatiŋ ni na pu na, le u ŋa kina. Bi di baapak tii ŋiwaa le ki dooni ŋi. Nima pu le Uwumbɔr cha tibɔbir ngbaan dan bi pu.’”