2 Bibɔrb Aabɔr 6 - Uwumbɔr aagbaŋ

Solomonn aah nan di tibɔr ti tuk binib ngbaan na

¹ Ubɔr Solomonn nan mee limeel ke, “Uwumbɔr, aa lee ke aa ga li bi ntaalangbam ni mbɔmbɔɔn ni la.

² Tɔ, le m maa lidichal li ŋan sakpen ki wiir na tii si, nin chee aa ga li koo n‑yoonn mɔmɔk na.”

³ Israel aanib mɔmɔk nan si nima. Ubɔr nan fenn toŋ bi le ki mee Uwumbɔr aanyoor tii bi.

⁴ U nan bui ke, “Pak timi Israel yaab Aadindaan Uwumbɔr man. U joo tipuur ti u nan puu tii nte David ke,

⁵ ‘Ki nyan n‑yoonn mu m nyan ni maanib Ijipt ni ki nan saa din na, maa lee kitiŋ kibaa Israel aatiŋ ni ke nima chee le bi ga maa lidichal li ponn ni bi ga li dooni mi na, kaa lee unii ubaa ke u li joo maanib Israel yaab.

⁶ Le dandana ma kan, m lee Jerusalem aatiŋ ni le ke bi li dooni mi nima, le ki lee sin, David, ke aa li joo maanib.’”

⁷ Solomonn nan ki len ke, “Nte David nan ŋa nlandak ke u maa lidichal li ponn ni bi ga li dooni Israel yaab Aadindaan Uwumbɔr na.

⁸ Le Uwumbɔr nan bui u ke, ‘Saah ban ke aa maa lidichal tii mi na, ni ŋan,

⁹ aa mu aan ŋmaa maa li. Sin aabaa aabo le ga maa Maadichal.’

¹⁰ “Tɔ, Uwumbɔr sil joo waah puu tipuur ti na. Min le ka nte aabɔrjal pu ki ye Israel yaab aabɔr, le ki maa lidichal li ponn ni bi ga li dooni timi Israel yaab Aadindaan Uwumbɔr na.

¹¹ M di Nkaal Aadakaa u ŋitakpapapan ŋilee bi u ponn ni na di siin Uwumbɔr Aadichal ni. Ŋitakpan ngbaan pu le Uwumbɔr ni waanib Israel yaab aamɔbaan ŋmee paa.”

Solomonn aah nan mee limeel li na

¹² Binib ngbaan aanimbiin ni nima, le Solomonn nan buen ti sil kitork aabimbiln chee le ki yoor uŋaal paacham ki mee Uwumbɔr.

¹³ Solomonn nan di tikumann le maa libimbiln siin lichiln aakaasisik ni. Laafɔfɔk ni nwawaan nan ye ŋitaa ŋiniin la, le laah fɔk paacham pu na nan ye ŋitaa ŋiŋmu. U nan jon toŋ libimbiln ngbaan paab, le ki gbaan le binib mɔmɔk waa u, le ki yoor uŋaal di mɔk paacham.

¹⁴ U nan mee Uwumbɔr ke, “Israel yaab Aadindaan Uwumbɔr, ubaa aa bi paacham ni kitiŋ mɔmɔk ni ke sin na. Saanib yaa di bisui mɔmɔk dii si kan, le aa joo saah nan puu tipuur ti tii bi na le ki joo saageehm mɔk bi.

¹⁵ Aa joo saah nan puu tipuur ti tii nte David na, ti mɔmɔk gbiin din wee.

¹⁶ Tɔ, Israel yaab Aadindaan Uwumbɔr, li joo tipuur tiken ti aa nan puu tii nte, ki bui u ke uyaabitiib yaa joo saakaal ke waah joo i pu na kan, bi ponn ni ubaa ga li bi n‑yoonn mɔmɔk ki ye Israel yaab aabɔr ki joo bi.

¹⁷ Kina pu na, Israel yaab Aadindaan Uwumbɔr, cha saah nan puu pu tii saatutunn David na mɔmɔk gbiin kina.

¹⁸ “Tɔ, sin Uwumbɔr ga ŋmaa koo taab do, binib aakaasisik ni ii? Hali paacham aah waa sakpen pu na, naa waa ki ŋeer saakokoon yaan. Kina pu na, lidichal limina par ke aa li koo li ponn ni.

¹⁹ Ndindaan Uwumbɔr, m ye saatutunn la. Ŋun maameel ki tii mi maah mee ban pu na.

²⁰ Li kii lidichal limina nwiin pu ni kinyeek mɔmɔk. Aa puu ke do le bi ga li dooni si, kina pu na, m yaa di nnimbil toŋ lidichal limina ki mee si kan, aa ŋun maameel.

²¹ M ni Israel yaab yaa di tinimbil toŋ ni lidichal limina ki mee si kan, aa ŋun timi aameel. Saah bi aado paacham na, ŋun ki di cha pinn timi.

²² “Uwumbɔr, unii yaa tun uken taani aan bi joo ni u kitork aabimbiln taab, Saadichal ni do, ke u nan puu tipuur ke waa nyi ti kan,

²³ saah bi paacham na, pel ki ji saatutum tibɔr. Daa unii u lir na aatafal ki ŋeer waah tun pu na, ki di unii u aabɔr ŋan na lii.

²⁴ “Saanib Israel yaab aadim yaa nyaŋ bi, baah tun si titunwanbir pu na pu, aan bi yaa fenn ki gir ni aa chee Saadichal ni do, ki sunn bibaa taab ki mee si ke aa di cha pinn bi kan,

²⁵ saah bi paacham na, pel baameel. Di cha pinn saanib aatunwanbir ki giin ni bi kitiŋ ki aa di tii bi ni biyaajatiib na pu.

²⁶ “Uwumbɔr, saanib yaa tun si titunwanbir aan aa chuu utaal, u taa ki nu, le bi yaa kpeln baabimbin ki di binimbil toŋ ni Saadichal limina ki sunn bibaa taab ki mee si kan,

²⁷ saah bi paacham na, pel baameel ki di cha pinn saatutum Israel aanib, ki mɔk bi ni ŋan ke bi tun na, ki cha utaal nu saatiŋ ki aa di tii saanib ke ki li ye biyaan na pu.

²⁸ “Nkon yaa lir kitiŋ kee pu, bee iweenlirkee yaa lir, bee libuln li ton na, bee itoon le yaa bii tijikaar, bee saanib aadim le yaa nan tak bi, bee iween le yaa bi bikaasisik ni kan,

²⁹ li pel baameel. Saanib, Israel yaab ubaa aasui yaa bii, le u taln uŋaal limeel ponn ni toŋ ni Saadichal limina kan,

³⁰ li pel waameel. Saah bi aado paacham na, pel ki di cha pinn bi. Sin baanja le nyi unibɔn aasui ponn ni aalandak. Unii aabimbin aah ŋeer pu na kan, aa ŋa udaan kina,

³¹ aan saanib li san si, ki li keei saamɔb n‑yoonn mumɔk bi bi kitiŋ ki aa di tii tiyaajatiib na pu na.

³² “Uwɔwɔnja u bi kitiŋ ki daa na ni yaa ŋun saah kpa mpɔɔn pu na, ni saah gor n‑yoonn mɔmɔk pu ke aa tun na, yaa dan Saadichal lee ni ke u nan mee si kan,

³³ pel waameel. Saah bi paacham na, pel u chee ki ŋa waah ban pu na tii u, aan dulnyaa aanib mɔmɔk bee si, ki li keei saamɔb, ke saanib Israel yaab aah ŋani pu na. Nima le bi ga bee ke maah maa Saadichal li na ponn ni, le bi ga li dooni si.

³⁴ “Aa yaa bui saanib ke bi to baadim butɔb aan bi si nin chee mɔk ki lik ni kitiŋ ki aa lee na, ni Saadichal li m maa tii si na, ki yaa mee si kan,

³⁵ pel baameel. Saah bi paacham na, ŋun baameel ki tii bi linyaŋ.

³⁶ “Aa nyi ke unii ubaa aa bi kaa tun titunwanbir, kina pu na, saanib yaa tun si titunwanbir, le saaŋuul ponn ni aa cha baadim nyaŋ bi ki chur bi tinaagbiir ki di bi buen kitiyayaŋ ni, hali kitiŋ ngbaan ni yaa daa kan,

³⁷ pel saanib aameel nima. Bi yaa bi kitiŋ ngbaan ni, ki yaa kpeln baabimbin ki mee si, ki kpiir baah ye titunwanbirdam ni bibiindam sakpen pu na kan, Uwumbɔr, ŋun baameel.

³⁸ Bi yaa bi kitiŋ ngbaan ni ki yaa sil kpeln baabimbin ki lik ni kitiŋ ki aa di tii tiyaajatiib na, ni kaatisakpeŋ ki aa lee na, ni Saadichal li m maa tii si na ki mee si kan, ŋun baameel.

³⁹ Saah bi paacham na, ŋun ki san bi kinimbaak ki di saanib aatunwanbir cha pinn bi.

⁴⁰ “Tɔ, Maawumbɔr, lik ni timi, ki pel ŋimee ŋi ti joo tii si lidichal lee ni na.

⁴¹ Tidindaan Uwumbɔr, fii sil, ki dii Nkaal Aadakaa, u ye saapɔɔn aamɔkl na, koo Saadichal ngbaan ponn ni, ki li koo do n‑yoonn mɔmɔk. Ŋa saanyoor ŋa saatotoorb aatuln mɔmɔk pu, ki cha saanib li kpa mpopiin saah kpa bi pu tiŋann ti na pu.

⁴² Tidindaan Uwumbɔr, taa yii saah lee ubɔr u na. Teer saah nan kpa ngeehm mu saatutunn David pu na bɔr.”