2 Bibɔrb Aabɔr 5 - Uwumbɔr aagbaŋ

¹ Ubɔr Solomonn aah nan tun Uwumbɔr Aadichal aatuln doo na, le u di tikunabr, ni salmaa, ni tiwan niken ni mɔmɔk ute David nan di tii Uwumbɔr na ŋa Uwumbɔr Aadichal aawan aadir ni.

Baah nan di Uwumbɔr Aakaal Aadakaa koon Waadichal ni pu na

² Le Ubɔr Solomonn yin Israel aanibol ni itaŋaal aasalolm mɔmɔk ke bi kuun ni Jerusalem ni, ki nan yoor Uwumbɔr Aakaal Aadakaa nya David Aatiŋ Sionn ni, ki di buen Uwumbɔr Aadichal ni.

³ Bi mɔmɔk nan kuun Tikakar Aajim aayoonn la.

⁴ Bisalolm ngbaan mɔmɔk aah nan kuun na, le Liifai yaab yoor Nkaal Aadakaa ngbaan paacham,

⁵ le ki di buen Uwumbɔr Aadichal ni. Bitotoorb ni Liifai yaab ngbaan nan ki yoor Uwumbɔr Aabool ni laawan mɔmɔk di buen Uwumbɔr Aadichal ni.

⁶ Ubɔr Solomonn ni Israel aanib mɔmɔk nan kuun sil Nkaal Aadakaa ngbaan chee, ki di ipiih ni inaa toor kitork tii Uwumbɔr. Baah nan kɔr tiwakor ti na nan nyaŋ, ubaa aa nan ti ki nyi ti mɔk.

⁷ Le bitotoorb nin yoor Uwumbɔr Aakaal Aadakaa ngbaan koon Chain Chain Aapepel ni, Uwumbɔr Aadichal ponn ni, ki di ti siin tiwan ni kpa ifeen na aataab.

⁸ Naafeen nan biin Dakaa ngbaan, ni idɔ i bi joo tui u na pu.

⁹ Unii yaa nan si Chain Chain Aapepel ngbaan aabisamɔb chee kan, le u ga li waa idɔ ngbaan aajuu aah kpii ni pu na, naa ye kina kan, saan li waa i. Idɔ ngbaan beenin bi nima din wee.

¹⁰ Ŋitakpapapan ŋilee ŋi Moses nan gaa Sainai Aajool paab ki di ŋa u ponn ni na baanja le nan bi Nkaal Aadakaa ngbaan ni, nibaa aa nan ki bi u ni ki kpee. Israel yaab aah nan nyan ni Ijipt aatiŋ ni aan Uwumbɔr ni bima nan ŋa kimɔbaan Sainai Aajool chee na, le Moses nan ŋmee kimɔbaan ngbaan ŋitakpan na pu ki di ŋi ŋa Dakaa ngbaan ponn ni.

Uwumbɔr aanyuŋ

^11-14 Bitotoorb ngbaan mɔmɔk, baa nan ki dii ke wee nyan do bee do, nan toor bibaa. Liifai aalahngaab ni biwangbaab, Asaf, ni Hemann, ni Jedutunn, ni baataŋaal pu yaab mɔmɔk nan pee ŋitanyaan aawanpeenkaan la. Liifai yaab ngbaan nan sil kitork aabimbiln ngbaan aawipuul wɔb, ki joo ichayakrtuun ni tibar, ki di kpee bitotoorb nkub ni moninko bi pii kakaan tiib na pu. Bilahngaab nan gaa, le binib bi pii kakaan tiib na, ni binib bi yikr ichayakrtuun na, ni bi gbaa tiwangbaakaan niken na joo kenni bi. Bi nan gaa ilahn ki pak Uwumbɔr ke: “Uwumbɔr ŋan, pak u man, waageehm aa kpa ndoon.” Bitotoorb ngbaan aah nan bi nya Uwumbɔr Aadichal ngbaan ponn ni na, libuul ngbaan ni, le ntaalangbam mu wiin ki moor Uwumbɔr aawiihn na gbiin lidichal ngbaan, le baa nan ki ŋmaa doo baatuln ngbaan.