2 Bibɔrb Aabɔr 4 - Uwumbɔr aagbaŋ

Uwumbɔr Aadichal ponn ni aawan

¹ Ubɔr Solomonn nan cha bi ŋa tikumann aatork aabimbiln, li aafɔfɔk ni nwawaan nan ye ŋitaa piitaa na, le laah paa paacham pu na ye ŋitaa kipiik ni ŋiŋmu.

² U nan ki ŋa tikumann aakin sakpiin mu bi likokoln ke kitotuk na. Mu aah nan nyoo pu na nan ye ŋitaa ŋilole ni ligeln la, le nwawaan ye ŋitaa kipiik ni ŋiŋmu, le mu aah maln goln pu ki ti to na ye ŋitaa imonko ilee ni ŋiŋmu.

³ U nan ŋa nyɔla nyɔla nfum mulee pu toŋ mu aamɔgbaln. Nyɔla nyɔla tiib ngbaan naahn inaaja la, le ni ni nkin ngbaan aakur ye likubaal.

⁴ Nkin ngbaan nan si tok tikumann aanaaja kipiik ni ilee pu la. I nan si le imunjal lik tɔb, itata lik lipepel libaabaa.

⁵ Nkin ngbaan aakur aa nan filk pii lisangeln. Mu aamɔgbaln nan mir lii yan yan la, le ki naahn nsupuun aah poor pu na. Nkin ngbaan aanyun ga ŋmaa gbiin aankɔra tiib ikui itaa.

⁶ Bi nan ki ŋa tisapar kipiik, le ki di tiŋmu siin Uwumbɔr Aadichal ponn ni aaŋangii wɔb, le tiŋmu mu si ŋŋangan wɔb. Bi nan joo tima le finni kitork aanann ti bi joo seer mmii ni na. Bitotoorb nan fu nnyun mu bi nkin sakpiin na ponn ni na la.

^7-8 Bi nan ŋa salmaa aawan ni pu karyaa tiib tɔŋni na tiwan kipiik, ke baah ti ŋani ni pu na, ni teebul tiib kipiik, ki di bi siin Uwumbɔr Aadichal aadisakpeŋ na ponn ni. Karyaa tiib aawan ngbaan niŋmu, ni teebul tiib biŋmu si lipepel libaa la, le niŋmu ni teebul tiib biŋmu mu si lipepel liken. Bi nan ki ŋa salmaa aasambil nkub mu.

⁹ Bi nan ŋa bitotoorb aachinbik ni lichinjal mu. Bi nan di tikumann le boon jaaleŋ tiib bi yakr lichinjal ni kichinbik ngbaan na.

¹⁰ Bi nan di nkin sakpiin ngbaan siin liwipuul ni ŋŋangii wɔb aalɔlɔŋ ki bi Uwumbɔr Aadichal ni na la.

^11-16 Huram nan ki ŋa ŋibuu, ni tiwan ni bi joo faal nfatan na, ni ŋisambil. U nan ŋa Uwumbɔr Aadichal ni aawan, ni mɔmɔk u nan puu tii Ubɔr Solomonn ke u ga ŋa na. Nima le ye: Jaatɔlk tiib bilee na. Tiwanaankaan nilee ni nan bi ke lisambil ki tok jaatɔlk tiib ngbaan pu na. Tikululn aanyɔla nyɔla tiib bi nan bi tiwanaankaan ngbaan pu na. Tikumann aasubinaankee ikui inaa ŋi bi jaatɔlk tiib aanyɔla nyɔla pu na. Tɔroku tiib kipiik na. Tisapar kipiik na. Nkin sakpiin na. Nkin ngbaan aah nan tɔk inaaja kipiik ni ilee i pu na. Ŋibuu, ni tiwan ni bi joo faal nfatan na, ni inanmoon. Huram u ye uwanŋakpaan na nan di tikumann ti joon kpal kpal na le naan tiwan ngbaan mɔmɔk, Ubɔr Solomonn aah nan tuk u pu na, ke bi li joo tun lituln Uwumbɔr Aameen Aadichal ponn ni.

¹⁷ Ubɔr nan cha bi ŋa ni mɔmɔk bichaab aakakaa mu bi Sukof ni Sereda aatim aakaasisik ni, Jɔɔdann Aafataŋ ni na la.

¹⁸ Baah nan naan tiwan ngbaan aan ni wiir pu na, unii ubaa aa nan nyi baah nan di tikumann ti ŋa ni na aanyunyuun.

¹⁹ Ubɔr Solomonn nan ki cha bi di salmaa mu naan Uwumbɔr Aadichal ni aawan nibaa mu. Nima le ye kitork aabimbiln, ni teebul tiib bi pu bi joo Uwumbɔr aaboroboro paani na,

²⁰ ni karyaa tiib aah tɔŋni tiwan ni pu na, ni salmaa aakaryaa u bi seer siini Chain Chain Aapepel chee na, naah nan mɔk ke bi ŋa pu na;

²¹ ni nsupuun aanyɔla nyɔla na, ni karyaa tiib, ni tiwan ni bi joo moor mmii kitork aabimbiln paab na, ni ŋisambil, ni tulalee aayon aasambim,

²² ni tiwan ni bi joo junni karyaa tiib na, ni nsambim mu bi joo moor mmii na. Bi nan di salmaa le naan tiwan nee mɔmɔk. Bi nan di salmaa le boon jaaleŋ tiib bi bi lipaal wɔb na, ni bi bi Chain Chain Aapepel aabisamɔi na.