2 Bibɔrb Aabɔr 3 - Uwumbɔr aagbaŋ

¹ Solomonn aate, Ubɔr David nan puen gor nin chee Uwumbɔr Aadichal ga sil na. Nima chee le ye Moria Aajool li pu Uwumbɔr nan di ubaa mɔk David aan li bi Jerusalem ni na. Nima chee le Jebus aanii Arauna nan ŋa waadipoipaal na.

² Ubɔr Solomonn nan piin laamaam, waanaan aabinanar aaŋmalee ni la.

³ Ubɔr Solomonn aah nan maa Uwumbɔr Aadichal li na aafɔfɔk nan ye ŋitaa imonko inaa ni kipiik, le laawawaan mu ye ŋitaa piitaa.

⁴ Kinaakook aawawaan nan ye ŋitaa piitaa la. Le kaah nan paa paacham pu na ye ŋitaa nkub ni imonko inaa. Bi nan di salmaa ŋmeen le pɔn ki ponn ni.

⁵ Bi nan di santina aakpan le tam kidisakpeŋ na ponn ni, le ki di salmaa boon ŋi, ki naan naan libɔkpal aasui, ni tiwan ni naahn tikululn na ŋa salmaa ngbaan pu,

⁶ le ki di ŋitakpanyaan ŋi kpa kidaak na, ni salmaa u nyan ni Paafaim aatiŋ ni na le di toor Uwumbɔr Aadichal ngbaan ponn ni.

⁷ U nan di salmaa le boon Uwumbɔr Aadichal ngbaan aagon, ni ilɔkdɔ, ni jaaleŋ tiib ni baadɔja. Biwanŋab nan naan ifeen aawan ŋa ŋigon ngbaan pu.

⁸ Ponn ni aadiik ki bi yin ki ke Chain Chain Aapepel na aafɔfɔk nan ye ŋitaa piitaa la, le kaawawaan mu ye kina. Kaafɔfɔk ni nwawaan ni Uwumbɔr Aadichal ngbaan aawawaan nan ŋak la. Baah nan di salmaa u pɔn kaagon na aanyunyuun na ga jer ndibim bɔtɔ tiib ikui iŋmu,

⁹ le ki di salmaa u aanyunyuun ga pii ndibim kuruwaa ubaa na di ŋa ikupiin. U nan ki di salmaa le pɔn paacham aadir aagon mu.

¹⁰ U nan ki bui biwanŋab ngbaan ke bi di tikur naan tiwan ni kpa ifeen na nilee, ki di salmaa boon ni, ki di ni siin Chain Chain Aapepel ni,

^11-13 nin chee ni ga li si kpak tɔb ki lik ni mbisamɔb na. Ni mɔmɔk nan kpa ifeen ilelee la, le nfeen mɔk aafɔfɔk nan ye ŋitaa ŋilole ni ligeln. Ifeen ngbaan taln le ki ti tuu tɔb kidiik ngbaan aakaasisik ni, le nibaa aafeen ti tuu ligoln lipepel libaa, le niken na mu aafeen ti tuu ligoln liken na. Naafeen ngbaan aah nan tok tɔb pu na nan ye ŋitaa piitaa, kidiik ngbaan aah waa pu na la.

¹⁴ Chain Chain Aapepel ni aakekeln nan ye ŋitanyaan aakekeln li bi di ŋitan ŋi ye nsiin, ni mbɔmbɔm, ni ŋimaman ŋa li na, le ki naan ifeen aawan ŋa li pu.

Tikumann aajaatɔlk bilee aabɔr

¹⁵ Ubɔr nan cha bi ŋa jaatɔlk tiib bilee. Ubaa mɔk aafɔfɔk nan ye ŋitaa piiŋmu ni ŋilee, le ki di bi ŋum Uwumbɔr Aadichal aabisamɔb chee. Ubaa mɔk aapaacham nan kpa tiwanaankaan ni aafɔfɔk nan ye ŋitaa ŋilole ni ligeln na.

¹⁶ Bi nan naan tiwan ni naahn tikululn na bi mɔmɔk aapaacham, le ki ŋa tikumann aanyɔla nyɔla ni bi ke ŋisubil na nkub ŋa bi mɔmɔk pu.

¹⁷ U nan di jaatɔlk tiib ngbaan ŋum Uwumbɔr Aadichal aabisamɔb aapepel ŋilee pu la; u nan yin jaatɔlk u ŋub ŋŋangii wɔb na ke Jakinn, le ki yin u ŋub ŋŋangan wɔb na ke Boas.