2 Bibɔrb Aabɔr 25 - Uwumbɔr aagbaŋ

Juda Aabɔr Amasia aabɔr

¹ Amasia nan ye ŋibin moninko ni ŋiŋmu aanii le ki jin nnaan, le ki bi Jerusalem ni, ki joo waanib ki ti saa ŋibin moninko ni ŋiwae. Una nan ye Jerusalem ni aanii la, le bi yin u ke Jehoadinn.

² U nan tun tiwan ni piir Uwumbɔr aasui na. U mu aa nan joo usui mɔmɔk tun kina aatuln.

³ Waah ti bee buyoonn ke u nyal baan na, le u ku bininkpiib bi nan ku ute na.

⁴ Waa nan tee ku baabim ma, u nan dii Uwumbɔr aah nan len pu Moses Aakaal ni na la. Nima le ye ke, “Bi taa ku tetiib ni natiib baabim aatunwanbir pu, ki taa ku mbim mu tetiib ni natiib aatunwanbir pu; bi ga ku unii, uma ubaa aah tun titunwanbir ti na pu la.”

Juda yaab ni Edom yaab aatɔb

⁵ Ubɔr Amasia nan kuun Juda ni Benjaminn aajab mɔmɔk, baataŋaal pu ŋiker ŋiker, le ki tii bi mɔmɔk bininkpiib. Bininkpiib ngbaan bibaa aajab nan ye lichur lichur, le biken mu joo bijab nkub nkub. Bijab ngbaan mɔmɔk nan ye bijab bi ye ŋibin moninko ki jer na. Bi nan ti saa bijab ŋichur ikui itaa la. Bi nan ye bijab bi bi gann bi na la, le bi nan ŋeer butɔb. Bi nan nyi tikpaatunn ni kijaak aapen aabɔr mbamɔm.

⁶ U nan ti ki pan Israel aajab ŋichur nkub pu ke bi nan ter u. U nan di tikunabr ti aanyunyuun ga pii njikaabim bɔtɔ imonko inaa na le pan bi pu.

⁷ Tɔ, Uwumbɔr aabɔnabr ubaa nan buen ubɔr chee le ki ti bui u ke, “Taa cha Israel aajab bimina dii nimi buen. Uwumbɔr aa bi bijab bi nyan ni ŋŋangan wɔb aanaan ngbaan ni na chee.

⁸ Aa ga li dak ke bi ga ti moo tii si mpɔɔn butɔb ni, tɔ, ni mu tee ye Uwumbɔr le tii linyaŋ, bee nlirm, uma le ga cha saadim nyaŋ si.”

⁹ Le Amasia baa ubɔnabr ngbaan ke, “Tɔ, m ga ŋa maah di tikunabr aamombil ŋimɔk pan bi pu na kinye?” Le ubɔnabr nan giin gar u ke, “Uwumbɔr ga ŋmaa tii si ŋi jer kina na.”

¹⁰ Nima pu le Amasia nan cha kina aajab gir kun. Baah ŋun kina na, le bi gir kun, ki gee liŋuusakpeln Juda aanib pu.

¹¹ Amasia nan ŋa lipobil le ki loln waajab pu nsan buen N‑yaan Aafataŋ ni. Nima chee, le bi nan to butɔb ki ku Edom aajab ŋichur kipiik,

¹² le ki chur bijab ŋichur kipiik mu tinaagbiir. Bi nan di binaagbiib ngbaan buen Sela aatiŋ ni aajool aapaacham, nin chee yaan ti jɔn kifataŋ pu na, le ki tur bi lii; le bi ti lir ŋitakpal ŋi dɔ taab na pu ki kpoi.

¹³ Baah bi ŋani kina na, le Israel aajab bi Amasia nan yii ke bi taa dii bi buen butɔb ni na mu ti tak Juda aatim mu bi Samaria ni Bef Horonn aasisik ni na, ki ku bijab ŋichur ŋitaa, le ki yoor tiwan pam.

¹⁴ Amasia aah ti nyaŋ Edom ki gir choo kun ni na, le u yoor baawaa ki nan baan ŋi, ki dooni ŋi, ki seer nnyɔknii tii ŋi.

¹⁵ Nimina nan cha Uwumbɔr aaŋuul fii, le u tun waabɔnabr ubaa Amasia chee. Le ubɔnabr ngbaan ti baa u ke, “Ba ŋa aa dooni ŋiwaa ŋi kaa ŋmaa gaa ŋaanib saapɔɔn ni lii na?”

¹⁶ Le Amasia kpaan baa u ke, “Bayoonn aan ti di si ŋa ubɔr aasusur? Ŋmin aamɔb, naa ye kina kan, m ga cha bi ku si.” Le ubɔnabr ngbaan bui ke, “Dandana ma kan, m bee ke Uwumbɔr le siin ke saamɔfal junn, saah yii u ki tun pu na mɔmɔk pu,” le ki nin ŋmin.

Juda ni Israel yaab aatɔb aabɔr

¹⁷ Juda Aabɔr Amasia ni waasusurb nan kpokl Israel yaab pu. Le u tun Israel yaab Aabɔr Jehoas chee. Jehoas aate le nan ye Jehoahas, le uyaaja ye Jehu. U nan tun u chee ki ban kijaak la.

¹⁸ Jehoas nan di ngarm mue le tun Amasia chee. U nan bui ke, “N‑yoonn mubaa le Lebanonn Aajoo ponn ni aakokon aasub waatiir bubaa nan tun ti tuk Lebanonn aasantina aasub ke, ‘Di aabisal tii njapɔɔn u di ŋa upuu.’ Upeel ubaa nan jer nima chee le ki taa kool kool bukokom waatiir ngbaan.

¹⁹ Tɔ, Amasia, aa kpa kipupuk ke aa nyaŋ Edom yaab a, tɔ, m ban m sur si ke aa li ka aado suuna. Ba ŋa aa ban tibɔr tii aa ni saanib?”

²⁰ Le Amasia yii, kaan ŋun. Ni nan ye Uwumbɔr aageehn le ke Amasia lir. Waah nan dooni Edom yaab aawaa ŋi na pu, le Uwumbɔr nan siin kina.

²¹ Kina pu na, Israel Aabɔr Jehoas ni Juda Aabɔr Amasia nan faa tɔb butɔb. Bi nan ti pii tɔb Bef Semes aatiŋ ki bi Juda ni na la.

²² Bi nan nyaŋ Juda aajab, le bi san kun bido, bido.

²³ Jehoas nan chuu Amasia le ki di u buen Jerusalem aatiŋ ni. Nima chee le u nan tur kitiŋ ngbaan aagoln ki nyan Efraim Aabisamɔb mɔk ki ti saa kilɔlɔŋ ni Aabisamɔb na chee lii kitiŋ. Waah nan tur nimɔk lii na aafɔfɔk ga nan li pii ŋitaa ikui iloob.

²⁴ Waah nan nyaŋ ki yoor tiwan ni gir Samaria aatiŋ ni na le nan ye salmaa ni tikunabr ti mɔmɔk nan bi Uwumbɔr Aadichal ni na, ni Uwumbɔr Aadichal ponn ni aawan ni mɔmɔk Obed Edom aayaabitiib nan kii na, ni libɔrdichal ni aawangol mɔmɔk. U nan ki chur binib mu buen.

²⁵ Juda Aabɔr Amasia nan yunn nnaan ni jer Israel Aabɔr Jehoas ŋibin kipiik ni ŋiŋmu la.

²⁶ Amasia aah nan ki ŋa tiwan ni mɔmɔk, ki nyan bundaal u jin nnaan na, ki ti saa mu aah doo pu na, bi Juda ni Israel Aabɔrb Aatun Aagbaŋ ni la.

²⁷ Ki nyan bundaal u nyan Uwumbɔr aapuwɔb na, bi nan gur kpokl u pu n‑yoonn mɔmɔk, Jerusalem ni la. Kookoo na le u nan san buen Lakis aatiŋ ni. Tɔ, waadim mu nan beenin paa u pu nima le ki ti ku u.

²⁸ Bi nan giin ni waanikpol Jerusalem ni, utaan pu, le ki nan sub u nnaan aacheek ni, David Aatiŋ ni.