2 Bibɔrb Aabɔr 23 - Uwumbɔr aagbaŋ

Baah nyan Atalia aapuwɔb pu na

¹ Utotoor Jehoyada aah nan mɔr ki ti saa ŋibin ŋiloob na, le u bui ke n‑yoonn ŋeer ke u fii sil. U ni butɔb aaninkpiib biŋmu bibaa nan ŋa kimɔbaan: bima le ye Jeroham aajapɔɔn Asaria, ni Jehohanann aajapɔɔn Ismael, ni Obed aajapɔɔn Asaria, ni Adaya aajapɔɔn Maaseya, ni Sikri aajapɔɔn Elisafat.

² Bi nan chuun Juda aatim mɔmɔk ni, le ki ti joo ni Liifai yaab ni itaŋaal mɔmɔk aasalolm Jerusalem ni.

³ Bi mɔmɔk nan kuun Uwumbɔr Aadichal ni, le bi ni ubɔr aajapɔɔn Joas puu tipuur tii tɔb. Jehoyada nan bui bi ke, “Ubɔr aajapɔɔn sɔ. Uma le ga li gur ye ubɔr, Uwumbɔr aah puu pu ke Ubɔr David aayaabitiib ga li ye pu na.

⁴ Taah ga ŋa pu na sɔ: bitotoorb ni Liifai yaab yaa dan lituln ni, Likpaakool daal kan, bi ga yakr nfum mutaa la, le ligeln libaa ga li kiir Uwumbɔr Aadichal aabisamɔi,

⁵ le liken li kii nnaan aadichal, bi gur na mu li kii mbisamɔb mu bi yin mu ke Uyayak Aabisamɔb na. Binib mɔmɔk ga kuun Uwumbɔr Aadichal aachiln ni la.

⁶ Ubaa taa koo Uwumbɔr Aadichal ni ki kpee bitotoorb, ni Liifai yaab bi bi lituln pu na. Baah toor bibaa chain na pu le bi ga ŋmaa koo, le binib bi gur na li joo Uwumbɔr aakaal na ki li bi lipaal.

⁷ Liifai yaab le ga maln goln ubɔr, ki fuur baajaak aajum ki kii u. Bi ga li dii u waah cha nimɔk na. Ni ku unii umɔk ban ke u koo Uwumbɔr Aadichal ni na.”

⁸ Liifai yaab ni Juda aanib mɔmɔk nan ŋa Jehoyada aah nan mɔk pu na mɔmɔk. Baa nan cha bijab bi bi lituln ni Likpaakool daal na kun; kina pu na, biyidam na nan beenin kpa bijab bi choo lituln ni na, ni bi ba chaa kun na mɔmɔk.

⁹ Jehoyada nan di Ubɔr David aakpaatunn ni kijaak aapen ŋi nan bi Uwumbɔr Aadichal ni na tii bininkpiib ngbaan.

¹⁰ U nan di bijab bi fuur baajaak aajum ki joo na siin goln Uwumbɔr Aadichal aabisamɔb ke bi li kii ubɔr ngbaan.

¹¹ Le Jehoyada di Joas nyan ni, le ki nan di kibɔryikpupuk chiŋ u, le ki tii u nnaan aakaal i joo nnaan na aagbaŋ kibaa. Kina le bi nan kaan u nnaan. Utotoor Jehoyada ni ujapɔtiib le nan di nkpan kpir Joas aayil pu, le binib mɔmɔk teen ke, “Limɔfafɔfɔŋ li bi ubɔr chee.”

¹² Atalia nan ŋun binib ngbaan aah pak ubɔr pu na, le u san mala buen Uwumbɔr Aadichal ni, kinipaak ngbaan aah kuun nin chee na.

¹³ Nima chee le u nan ti kan ubɔrpɔɔn ngbaan si Uwumbɔr Aadichal aabisamɔb, jaatɔlk u bi ŋa bibɔrb pu na chee. Butɔb aajab aaninkpiib ni binib bi pii kakaan tiib na le nan si gob u. Binib ngbaan mɔmɔk nan kpa mpopiin aafuuk ki pii kakaan tiib, le Uwumbɔr Aadichal ni aawangbaab, ni bilahngaab joo baawangbaakaan, ki cha binib ngbaan gaa ilahn. Atalia nan daa kar kar waawanpeenkaan mpombiin pu, le ki teen ke, “Linibiil, linibiil.”

¹⁴ Jehoyada aa nan ban ke bi ku Atalia Uwumbɔr Aadichal chee, kina pu le u yin butɔb aajab aaninkpiib ki nan bui bi ke, “Di u bɔ dii bikikiib aakaasisik ni, ki ku unii umɔk ban ke u gaa u lii na.”

¹⁵ Bi nan tɔk u kaakaan la, le ki di u buen libɔrdichal chee, ki ti ku u mbisamɔb mu bi yin mu ke Utaan Aabisamɔb na chee.

Jehoyada aah cha binib kpeln pu na

¹⁶ Utotoor Jehoyada nan cha Ubɔr Joas ni binib ngbaan nan kpee u pu, le bi puu tipuur ke bi ga li ye Uwumbɔr aanib la.

¹⁷ Le bi mɔmɔk dii buen liwaal Baal aawaadiik ni ki ti tur ki lii. Bi nan gbaa wii laawaabimbin, ni baah maa ŋiwaa ŋi siin ki ponn ni na, le ki ku Baal aawaadaan, u bi nan yin u ke Matann na bil ŋibimbin ngbaan chee.

¹⁸ Jehoyada nan ban bitotoorb ni Liifai yaab le bi tun Uwumbɔr Aadichal ponn ni aatuln. Bima le nan yeh lituln li Ubɔr David nan mɔk bi ke bi tun na, ki kpee Moses aakaal aah nan mɔk ke bi li joo kitork ki bi di toor tii Uwumbɔr na seer mmii ni pu na. Bima le nan ki yeh ilahn, ni tiwangbaakaan, ni kitork mɔmɔk aatuln.

¹⁹ Jehoyada nan ki ban bikikiib kaan Uwumbɔr Aadichal aabisamɔi ke bi li kiir binib bi mɔmɔk aa bi chain na aan bi taa koo li ponn ni.

²⁰ Butɔb aajab aaninkpiib, ni binib ngbaan aasalolm, ni ŋitun aaninkpiib, ni binib bi gur na mɔmɔk, ni Jehoyada nan kpaan le ki chɔr gɔngɔn ki di ubɔr nyan Uwumbɔr Aadichal ni ki di buen libɔrdichal ni. Bi nan dii nnaakɔsamɔb le ki koo, le ubɔr ti kal waabɔrjal pu.

²¹ Binib ngbaan mɔmɔk nan kpa mpopiin, le kitiŋ ngbaan ni nan bi suuna, ba pu? bi nan ku Atalia a.