2 Bibɔrb Aabɔr 21 - Uwumbɔr aagbaŋ

¹ Jehosafat nan kpo, le bi di u sub nnaan aacheek ni, David Aatiŋ ni, le ujapɔɔn Jehoram kal waanaanjal pu.

Juda Aabɔr Jehoram aabɔr

² Juda aabɔr Jehosafat aajapɔɔn Jehoram nan kpa naatiib biloob la; baayimbil le ye Asaria, ni Jehiel, ni Sekaria, ni Asariahu, ni Maikel, ni Sefatia.

³ Bite nan tii bi salmaa, ni tikunabr, ni tiwanbankaan niken sakpen, le ki di bi kaan kaan ntim mu bi maa ŋigon gob mu Juda aapepel ni na ni. Tɔ, Jehoram aah nan ye upol na, Jehosafat nan di uma le kaan waajal pu.

⁴ Jehoram aah ti nyal baan nnaan ngbaan ni na, le u ku unaatiib ngbaan mɔmɔk, ki ku Israel aaninkpiib bibaa mu.

⁵ Jehoram nan ye ŋibin piitaa ni ŋilee aanii le ki jin nnaan. U nan bi Jerusalem ni, le ki joo waanaan ni aanib ki ti saa ŋibin ŋiniin.

⁶ Waah nan joo Ahab aabisal ubaa na, le u nan gaa Ahab ni Israel aabɔrb biken aabiin. U nan tun Uwumbɔr titunwanbir,

⁷ Uwumbɔr mu aa nan gee ke u kuln David aanaan, ba pu? u nan puu tipuukpaan tii David ke u ga li kpa yaabil n‑yoonn mɔmɔk, u ji nnaan.

⁸ Jehoram aanaan yoonn, le Edom aatiŋ nan nyan Juda aanaan aapuwɔb ki gur si kibaa pu.

⁹ Nima pu le Jehoram ni waajab nan di itaan aatɔroku tiib buen ti koo Edom aatiŋ ni. Edom aajab nan gob bi nima chee, tɔ, kinyeek le bi nan ŋmaa kar nyan ki san ŋmar.

¹⁰ Ki nyan n‑yoonn ngbaan Edom aa ki bi Juda aataab. N‑yoonn baan mue le Libna aatiŋ yaab mu nyan Juda aapuwɔb, ba pu? Jehoram nan yii uyaajatiib Aadindaan Uwumbɔr.

¹¹ U nan kpaan maa baah dooni ŋiwaa nin chee na Juda aagongon aatim ni, ki cha Juda ni Jerusalem aanib tun Uwumbɔr titunwanbir.

¹² Uwumbɔr aabɔnabr Elaija nan ŋmee kigbaŋ tii Jehoram. Kigbaŋ ngbaan aah nan len pu na sɔ: “Saah kaa dii aate, Ubɔr Jehosafat, bee aayaaja, Ubɔr Asa aasan pu na, Uwumbɔr u ye aayaaja David Aadindaan na len ke saabɔr bii a.

¹³ Aa tee fenn le ki dii Israel yaab aabɔrb aasan ki cha Juda ni Jerusalem aanib nyan Uwumbɔr aapuwɔb, ke Ahab ni bibɔrb bi nan loln u pu nsan na aah nan cha Israel aanib ŋa pu na. Hali aa kpaan ku aanaatiib bi nan ye binib ki jer si na.

¹⁴ Kina pu na, Uwumbɔr ga daa saanib aatafal pam, ki kpee saabim, ni aapuutiib, ki ga kuln saawan mɔmɔk.

¹⁵ Le sin aabaa ga kan tineer aaween i wu sakpen ki ga li moo wu kpae kitaak mɔk na.”

¹⁶ Filistia yaab ni Arab yaab bibaa nan koo Kus aanib bi nan ka kpak nnyusakpem aagbaan na chee. Uwumbɔr nan saan bi ke bi buen ti faa Jehoram butɔb.

¹⁷ Bi nan buen ti koo Juda aatiŋ ni, le ki yoor libɔrdichal ni aawan mɔmɔk, ki kpee ubɔr aapuutiib mɔmɔk, ni ujapɔtiib. Ujapɔɔn waatiir Ahasia baanja le bi nan ti gur, kaa di u buen.

¹⁸ Nee aapuwɔb le Uwumbɔr nan cha tineer aaween i wu sakpen na nan lir ubɔr ngbaan pu.

¹⁹ I nan moo wu kpae kina ki ti ban ni pii ŋibin ŋilee, le u ti baa kpo iween ni. Waanib aa nan see mmii ke bi wii waakpuul, ke baah nan ŋa uyaajatiib pu na.

²⁰ Jehoram nan ye ŋibin piitaa ni ŋilee aanii le ki jin nnaan. U nan bi Jerusalem ni, le ki joo waanib ki ti saa ŋibin ŋiniin. Waah nan kpo na, ubaa aasui aa nan bii u pu. Bi nan sub u David Aatiŋ ni la, bi mu aa nan tee sub u bibɔrb aacheek ni.