2 Bibɔrb Aabɔr 18 - Uwumbɔr aagbaŋ

Uwumbɔr aabɔnabr Mikaya aah nan sak Ahab pu na

¹ Juda yaab Aabɔr Jehosafat aah nan pɔɔk ki kan liyimbil na, le u ban isan le udo yoo ubaa ni Israel yaab Aabɔr Ahab aado yoo ubaa mɔn.

² Ŋibin siib aapuwɔb le Jehosafat nan buen Samaria aatiŋ ni u ti mann Ahab. Ahab nan kɔr ipiih ni inaa pam le ki ŋa njim, ke u di nyuŋ Jehosafat ni binib bi dii ni u na. U nan pɔɔn ubaa ki gaŋ Jehosafat ke u kpee u pu aan bi ti tak Ramof aatiŋ ki bi Gilead ni na.

³ U nan baa u ke, “Aa ga cheen mi aan ti tak Ramof aatiŋ aa?” Jehosafat nan gar u ke, “Buyoonn aa gor na, m mu ni maajab gor le na. Ti ga kpee aa pu,”

⁴ le ki ki len ke, “Cha ti puen baa Uwumbɔr waahr.”

⁵ Kina pu, le Ahab nan yin bibɔnabr bi aawiwiir ga nan pii ikui inaa na, le ki nan baa bi ke, “M buen ti tak Ramof aatiŋ aan m taa buen?” Bi nan gar u ke, “Ti tak ki. Uwumbɔr ga tii si linyaŋ.”

⁶ Le Jehosafat baa ke, “Uwumbɔr aabɔnabr ubaa aa ki bi ki ga ŋmaa baa Uwumbɔr tii timi ii?”

⁷ Le Ahab gar u ke, “Ubaa bi, Imla aajapɔɔn Mikaya. M tee nan u la, ba pu? waa kee nabr tibɔnyaan tibaa tii mi; uma nabr tibɔbir ŋmeen le n‑yoonn mɔmɔk.” Jehosafat nan ki gar u ke, “Taa len kina.”

⁸ Kina pu, le Ahab nan yin ni libɔrchiln ni aaninkpel ubaa ki nan bui u ke u li cha ti yin ni Mikaya mala.

⁹ Bibɔrb bilee ngbaan nan pee baanaan aawanpeenkaan, le ki ka baabɔrjal pu, lidipoipaal li bi Samaria aatiŋ aabisamɔb chee na, le bibɔnabr ngbaan mɔmɔk si binimbiin ni ki nabr Uwumbɔr aabɔr.

¹⁰ Kenaana aajapɔɔn Sedekia, u nan ye bi ponn ni ubaa na, nan naan tikur aayiin le ki bui Ahab ke, “Uwumbɔr aah len pu na sɔ, ‘Aa ga di nimina le jan Siria yaab kijaak ki nyaŋ bi pel pel.’”

¹¹ Bibɔnabr bi nan gur na mu nan len tibɔbaan ngbaan la. Bi nan bui ke, “Ti tak Ramof aatiŋ ki nyaŋ ki. Uwumbɔr ga tii si linyaŋ.”

¹² N‑yoonn mue na, libɔrchiln ni aaninkpel u nan buen u ti yin ni Mikaya na nan ti bui u ke, “Bibɔnabr biken na mɔmɔk nabr ke ubɔr ga ti kan linyaŋ, ni ŋan ke aa mu ti nabr tibɔbaan ngbaan.”

¹³ Le Mikaya gar u ke, “Uwumbɔr u bi na pu, m ga ti len uma Uwumbɔr aah bui mi ke m len pu na la.”

¹⁴ Waah ti sil Ubɔr Ahab aanimbiin ni na, le ubɔr baa u ke, “Mikaya, m ni Ubɔr Jehosafat ga ŋmaa buen ti tak Ramof aatiŋ aan taan ŋman?” Mikaya nan gar u ke, “Ti tak ki man. Uwumbɔr ga tii nimi linyaŋ.”

¹⁵ Le Ahab ki gar u ke, “Aa yaa len m chee tibɔr Uwumbɔr aayimbil pu kan, len mbamɔn. Aa ban ke m tuk si kina nfum muŋa?”

¹⁶ Le Mikaya nan giin u ke, “M waa Israel aatɔb aajab aah yaa ŋigongon paab ke ipiih i kaa kpa upihkpaal na aah bi pu na. Le Uwumbɔr bui ke, ‘Bijab bee aa kpa usaloln, cha bi li chaa kun nsuudoon ni.’”

¹⁷ Le Ahab bui Jehosafat ke, “M ba puun bui ke waa kee nabr tibɔnyaan tibaa tii mi; uma nabr tibɔbir ŋmeen le n‑yoonn mɔmɔk.”

¹⁸ Mikaya nan ki len ke, “Tɔ, li pel man Uwumbɔr aah len pu na. M waa Uwumbɔr ka waabɔrjal pu paacham, le waatuuntiib mɔmɔk si gbɔk u.

¹⁹ Le Uwumbɔr baa ke, ‘Ŋma ga ŋmann Ahab aan u buen bi ti ku u Ramof aatiŋ ni?’ Ntuuntiib ngbaan bibaa nan len tibaa, le biken mu len tiken,

²⁰ le ntuun mubaa ti nyan sil, le ki buen Uwumbɔr chee, ki ti len ke, ‘M ga ŋmann u.’ Le Uwumbɔr baa mu ke, ‘Aa ga ŋa kinye ki ŋmann u?’

²¹ Le mu gar ke, ‘M ga buen le ki ti cha Ahab aabɔnabr mɔmɔk gii inyamɔn.’ Le Uwumbɔr bui ke, ‘Li cha ti ŋmann u. Aa ga ti ŋman.’”

²² Mikaya nan ki len ke: “Naah ŋa pu na le bi na. Uwumbɔr le cha bibɔnabr bee geei si inyamɔn. Tɔ, uma ubaa le siin ke aa ga ti kan tibɔbir.”

²³ Le ubɔnabr u bi yin u ke Sedekia na buen Mikaya chee, le ki ti faa u kitapak unimbil wɔb, ki baa ke, “N‑yoonn mulamu aan Uwumbɔr Aafuur Nyaan nyan mi ni ki ti len aa chee?”

²⁴ Le Mikaya bui u ke, “Buyoonn aa ti koo puwɔb aadiik ni aa ti bɔr na, le aa ga bee.”

²⁵ Le Ubɔr Ahab bui waaninkpiib ponn ni ubaa ke, “Chuu Mikaya, ki di u buen kitiŋ kee aayidaan Amonn, ni Ubɔrbo Joas chee.

²⁶ Aa ti bui bi ke bi di u ŋa kiyondiik ni, ki li tii u tikonjiir ki ti saa bundaal m ga gir ni, ni laafee na.”

²⁷ Le Mikaya teen ke, “Aa yaa gir ni ni laafee kan, kina kan, Uwumbɔr le aa len m chee tibɔr ke m di nabr si,” le ki ki len ke, “Ni mɔmɔk pel maah len pu na man.”

Ahab aakun aabɔr

²⁸ Israel yaab Aabɔr Ahab ni Juda yaab Aabɔr Jehosafat nan buen ti tak Ramof aatiŋ ki bi Gilead ni na.

²⁹ Ahab nan bui Jehosafat ke, “Taah cha butɔb ni na, maan peen tibɔrwan, aa ma li pee nnaan aawanpeenkaan.” Kina pu na, Israel yaab aabɔr aa nan pee nnaan aawanpeenkaan le ki ti koo butɔb ni.

³⁰ Siria Aabɔr nan bui waataan aatɔroku tiib aaninkpiib ke bi ti tak Israel yaab aabɔr baanja la.

³¹ Kina pu na, baah nan ti kan Ubɔr Jehosafat na, bi nan dak ke Israel yaab aabɔr le na, le bi fenn ke bi ti lir u pu. Le Jehosafat nan teen mpɔɔn pu, le Uwumbɔr gaa u lii, le bi fenn cha, kaa ki tak u.

³² Itaan aatɔroku tiib aaninkpiib ngbaan nan bee ke Israel aabɔr aa ye, le ki di cha, kaa ki san dii u.

³³ Tɔ, Siria aaja ubaa aa nan nyi, le ki too waapiin, le mu ti yun Ubɔr Ahab aajaak aabɔkul aah nab tɔb pu nin chee na. Le u teen tuk uja u ŋaal waataan aatɔroku na ke, “M kan titotonn. Fenn aapuwɔb ki nya butɔb ni.”

³⁴ Butɔb aah nan toŋ kpan kpan na, Ubɔr Ahab nan gaar ka waataan aatɔroku ni, le ki lik Siria aajab wɔb. Joo cha ni nwiin ti lir na, le u kpo.