2 Bibɔrb Aabɔr 16 - Uwumbɔr aagbaŋ

Juda yaab aah nan kan ŋimuk ŋi Israel yaab chee na

¹ Ubɔr Asa aanaan aayoonn aabin piitaa ni ŋiloob Juda aatiŋ ni, le Israel Aabɔr Baasa nan koo Juda ni ki piin ki maa ŋigon gob Rama aatiŋ, ke nibaa taa ki ŋmaa koo, bee ni nya Juda aatiŋ ni.

² Kina pu le Asa nan nyan tikunabr ni salmaa Uwumbɔr Aadichal, ni libɔrdichal ni, ki di tun Damaskus ni, Siria Aabɔr Ben‑Hadad chee ke:

³ “Cha ti li ye maantɔtiib ke titetiib aah nan bi pu na. Tikunabr ni salmaa wee ye ipiin le m joo tii si. Kina pu na, yii Israel yaab Aabɔr Baasa aamaantɔl ki cha u nyan waajab maapepel ni.”

⁴ Ben‑Hadad nan kii Asa aalandak ngbaan, le ki cha waajab aaninkpiib ni baajab buen ti tak Israel aatim. Bi nan nyaŋ Ijonn, ni Dann, ni Abel Bef Maaka, ni Naftali aatim mumɔk nan ye tiwan mɔk aah sii nin chee na.

⁵ Ubɔr Baasa aah ŋun tibɔr ti bi ŋani na, le u siir cha Rama aatiŋ aagon aamaam, kaa ki tun kina aatuln.

⁶ Le Ubɔr Asa kuun Juda aajab mɔmɔk ki cha bi yoor ŋitakpal ni idɔ i Baasa nan joo tun lituln Rama aatiŋ ni na, ki di maa ŋigon gob Geba ni Mispa aatim.

Uwumbɔr aabɔnabr Hanani aabɔr

⁷ N‑yoonn ngbaan le Uwumbɔr aabɔnabr Hanani buen Ubɔr Asa chee le ki ti bui u ke, “Saah ŋa Siria aabɔr naadii ki yii Aadindaan Uwumbɔr na le cha Israel aabɔr aajab ŋmar si.

⁸ Kus ni Libia aajab aa nan wiir ki kpa itaan aatɔroku tiib ni bitandam ki jer kina aa? Tɔ, saah nan lik Uwumbɔr pu na, u nan cha aa nyaŋ bi.

⁹ Uwumbɔr aanimbil waa dulnyaa wee mɔmɔk, le ki tii binib bi aasui bi u ni na mpɔɔn. Aa tun kijɔrk aatuln la, kina pu na, ki nyan n‑yoonn mue ki joo cha, aa ni butɔb le ga li bi.”

¹⁰ Nimina nan cha Asa aaŋuul fii Uwumbɔr aabɔnabr ngbaan pu sakpen, le u cha bi baa u tikululn. N‑yoonn baan mue, le Asa nan piin ki ŋani binib ngem mbiin.

Asa aanaan aah doo pu na

¹¹ Asa aah nan piin ki tun pu na, ni waah ti doo pu na, bi Juda ni Israel Aabɔrb Aatun Aagbaŋ ni la.

¹² Asa aanaan aabin piitaa ni ŋiwae ni, le kitaafaak aabuun aaween mubaa nan wɔb u. Hali n‑yoonn mumina ni, u nan beenin ban biteteeb chee le nterm, kaa teer Uwumbɔr bɔr kpala.

¹³ Joo cha ni ŋibin ŋilee ni le u kpo,

¹⁴ le bi di u sub waah nan lukr kitakpaluŋ ki kiir ubaa, David Aatiŋ ponn ni na ni. Bi nan di nnyɔknii ni nkpan mu nun mɔ na le toor uwon ki nin sub u. Bi nan see mmii sakpiin le ki di wii waakpuul.