2 Bibɔrb Aabɔr 14 - Uwumbɔr aagbaŋ

Ubɔr Asa aah nan nyaŋ Kus yaab pu na

¹ Ubɔr Abija nan kpo, le bi sub u bibɔrb aacheek ni, David aatiŋ ponn ni. Ujapɔɔn Asa le nan kal waajal pu ki ye ubɔr. Asa aayoonn ngbaan le kitiŋ ngbaan nan kan nsuudoon ki ti saa ŋibin kipiik.

² Asa nan tun ni ŋan ki tok na, le ki piir Udindaan Uwumbɔr aasui.

³ U nan nyan ŋiwaabimbin, ni baah dooni ŋi nin chee na. U nan gbaa wiil ŋiwaatakpal ŋi bi maa siin siin na, ki gaa geei liwaapii Asera aanaŋ na mu.

⁴ U nan bui Juda aanib ke bi li tun biyaajatiib Aadindaan Uwumbɔr aageehn, ki kii tii waamɔkm ni waakaal.

⁵ Waah nan kuln biwaadam aadoon, ni ŋibimbin ŋi pu bi seer nnyɔknii na Juda aatim ni na, le nnaan ngbaan nan kan nsuudoon waayoonn.

⁶ N‑yoonn mue le u nan maa ŋigon kiir Juda aatim. Le Uwumbɔr aah tii u nsuudoon na, ŋibin pam nan jer kaa joo ni butɔb.

⁷ U nan bui Juda aanib ke, “Cha ti maa ŋigon ni tidir ti fɔk na, ni ibisamɔi i ga li laŋni na kiir timi aatim. Taah tun Tidindaan Uwumbɔr aageehn na le ti kpa mpɔɔn kitiŋ kee pu. U kii timi ki tii timi lifuur ŋipepel mɔmɔk pu.” Kina pu na, bi nan maa, ki kan nkam.

⁸ Ubɔr Asa nan kpa Juda aajab ŋichur ikui itaa, le bi kpa kijaak aapen ni tikpaatunn; le ki kpa Benjaminn aajab ŋichur ikui ilee ni imonko inaa, le bi kpa kijaak aapen ni itɔi. Bi mɔmɔk nan kaar le ki bae butɔb aatuln mbamɔm.

⁹ Kus aanii ubaa, bi nan yin u ke Sera nan di bijab ŋichur ŋichur lichur, ni itaan aatɔroku tiib ikui itaa koo Juda aatiŋ ni, ki yoor ti saa Maresa aatiŋ ni.

¹⁰ Asa nan nyan ke bi ti kan tɔb, le bi mɔmɔk lul kiir butɔb, Sefata Aafataŋ ki bi duun Maresa aatiŋ na ni.

¹¹ Asa nan mee Udindaan Uwumbɔr ke, “Uwumbɔr, aa ga ŋmaa ter bijab bi kaa kpa mpɔɔn na ke saah ga ter bi kpa mpɔɔn na pu na la. Tidindaan Uwumbɔr, ti lik sin pu, le ki nyan ni saayimbil pu ke ti ni bijab sakpem bee nan faa tɔb butɔb, ter timi n‑yoonn mue. Uwumbɔr, si le ye Tidindaan, ubaa aan ŋmaa nyaŋ si.”

¹² Asa ni Juda aajab aah ti tak Kus aajab na, le Uwumbɔr nyaŋ Kus yaab ngbaan. Bi nan san,

¹³ le Asa ni waajab san dii bi ki ti saa Gerar aatiŋ ni. Kus yaab aajab ngbaan aah nan bee butɔb ngbaan ponn ni sakpen pu na, bi gur na aa nan ki ŋmaa sil ki nya buen butɔb ni. Uwumbɔr ni waajab nan nyaŋ bi pel pel, le bijab ngbaan yoor baawan pam.

¹⁴ Bi nan ŋman ki kuln ntim mu bi gbɔk Gerar na, ba pu? Uwumbɔr nan cha binib bi bi nima chee na san ijawaan sakpen. Juda aajab ngbaan nan binn ntim ngbaan mɔmɔk ki nyaŋ mu ki yoor baawan pam.

¹⁵ Bi nan ki tak biwakodam bibaa baakakaa ni, ki gaa ipiih ni laakumii tiib pam, le ki gir kun Jerusalem ni.