2 Bibɔrb Aabɔr 13 - Uwumbɔr aagbaŋ

Abija ni Jeroboam aatɔb aabɔr

¹ Ubɔr Jeroboam aah nan ye Israel aabɔr pu na aabin kipiik ni lininiin ni, le Abija jin Juda aanaan.

² U nan bi Jerusalem ni ki joo waanib ki ti saa ŋibin ŋitaa. Una aayimbil le nan ye Mikaya. Mikaya aate le nan ye Uriel u nyan ni Gibea aatiŋ ni na. Butɔb nan fii Abija ni Jeroboam aakaasisik ni.

³ Abija nan ban bijab ŋichur ikui inaa la, le Jeroboam di bijab ŋichur ikui iniin to bi butɔb.

⁴ Bijab ngbaan nan ti kan tɔb Efraim aajoo aatiŋ na ni la. Ubɔr Abija nan jon Semarayim Aajool paab le ki teen bui Jeroboam ni Israel yaab ke, “Li pel man.

⁵ Naa nyi ke timi Israel yaab Aadindaan Uwumbɔr nan puu tipuur ti kaa bii na tii David, ki di Israel aanaan tii u ni uyaabitiib ki cha n‑yoonn mu kaa kpa ndoon na aa?

⁶ Nebat aajapɔɔn Jeroboam nan yii waabɔr Solomonn aamɔb.

⁷ Puwɔb le u di nifam bi kaa bi tibaa ni na, le bi di baageehn tii Solomonn aajapɔɔn Rehoboam u nan par kaa nyi waah ga ŋa pu ki giin bi kaan na.

⁸ Le aa fii ke aa ni Uwumbɔr aah di nnaan aapɔɔn tii David aayaabitiib bi na jan kijaak. Ni kpa butɔb aajab bi wiir na, ni salmaa aanaaja i Jeroboam naan ke nimi aawaa na, ni chee.

⁹ Ni jenn nyan Aaronn aayaabitiib bi ye Uwumbɔr aatotoorb na, ni Liifai yaab, nimi aatiŋ ni, le ki nyan bitotoorb ke ŋitimbol ŋiken aah ŋani pu na leŋ baaleleŋ. Unii umɔk joo ni unaaja bee ipiih ilole na kan, le ni kpaan di u ŋa tiwan ni kaa ye Uwumbɔr na aatotoor.

¹⁰ “Le tima beenin dii Tidindaan Uwumbɔr, kaa yii u. Aaronn aayaabitiib bi ye bitotoorb na beenin tun baatun, le Liifai yaab ter bi.

¹¹ Bi tii Uwumbɔr kichakpiik ni, ni kijook mɔk aatulalee aayon aapiin, ki toor tiwakor ki joo seer mmii ni tii u. Bi tii u boroboro aapiin teebul u paab bi chain u chee na, le kijook mɔmɔk kan, bi seer karyaa tiib bi tɔk salmaa aawan pu na. Ti tun Tidindaan Uwumbɔr aah mɔk pu na la, le nima yii u.

¹² Uwumbɔr ubaa le ye timi aasaloln, le waatotoorb bi do, ki gor ke bi pii ikpiin aan ti to nimi butɔb. Israel aanib, taa tak niyaajatiib Aadindaan Uwumbɔr. Naan ŋmaa nyaŋ u.”

¹³ N‑yoonn mue na, Jeroboam nan cha waajab bibaa buen bi ti loon Juda aajab bipuwɔb, le ki cha bi gur na si tok bi.

¹⁴ Juda aajab nan fenn lik, le ki kan ke bijab gob bi a. Le bi wii yin Uwumbɔr ke u ter bi, le bitotoorb na pii ikpiin.

¹⁵ Juda yaab nan teen mpɔɔn pu, le Abija loln bi nsan, le bi di pii tɔb. Uwumbɔr nan nyaŋ Jeroboam ni Israel aajab.

¹⁶ Juda yaab nan jenn Israel yaab, le Uwumbɔr cha bi nyaŋ bi pel pel.

¹⁷ Abija ni waajab nan doo Israel yaab. Israel aajab bi nan nyi butɔb aabɔr mbamɔm na ŋichur ikui iŋmu le nan bee butɔb ni.

¹⁸ Juda aanib aah nan di bibaa tii biyaajatiib Aadindaan Uwumbɔr na, le bi nan nyaŋ Israel yaab ngbaan.

¹⁹ Abija nan san dii Jeroboam aajab le ki gaa baatim mubaa. Bi nan gaa Betel, ni Jesana, ni Efronn, ni ntiwaatiir mu bi gbɔk ntim ngbaan mɔk na.

²⁰ Abija aanaan yoonn ngbaan, Jeroboam aa nan ki ŋmaa gaa waapɔɔn u chee. Kookoo yaan le Uwumbɔr faa u bil, le u kpo.

²¹ Abija ma nan moo kan mpɔɔn la. U nan kpa bipiib kipiik ni binaa la, le ki ma mbijabim moninko ni bilee, ni mpiibim mu kipiik ni biloob.

²² Abija aah nan len pu ki ŋa pu aan kaa bi do na, bi Uwumbɔr aabɔnabr Ido aah nan ŋmee pu na ni.