2 Bibɔrb Aabɔr 12 - Uwumbɔr aagbaŋ

Ijipt yaab aah nan gaa Juda aatiŋ pu na

¹ Rehoboam aah kan nnaan aapɔɔn na, naa yunn le u ni waanib mɔmɔk suln Uwumbɔr aakaal bɔr.

² Rehoboam aanaan aabiŋmuŋmur ponn ni, le Uwumbɔr daa bitafal, baah yii u pu na pu. Ijipt Aabɔr Sisak nan tak Jerusalem.

³ U nan joo ni itaan aatɔroku tiib lichur ni ikui ilee, le bitandam nan ye bijab ŋichur imonko itaa, le bijab bi nan chuun kitiŋ na ma, baa nan ti ki nyi bi mɔk. Libia, ni Suk, ni Kus aajab nan kpee bi pu.

⁴ U nan nyaŋ tijawan aatim mu bi Juda aan bi maa ŋigon gob mu na ki yoor ti saa Jerusalem aatiŋ.

⁵ Uwumbɔr aabɔnabr Semaya nan buen Ubɔr Rehoboam, ni Juda aasalolm bi nan kuun ti bi Jerusalem ni ke bi loon san ŋmar Sisak chee na chee. U nan bui bi ke, “Uwumbɔr aanaŋ i u joo tii nimi na sɔ: ‘Ni yii mi, kina pu le m mu yii nimi ki di nimi tii Sisak.’”

⁶ Ubɔr ni bisalolm ngbaan nan kii ke bi tun taani, le ki bui ke, “Uwumbɔr aah bi ŋani pu na ŋan.”

⁷ Uwumbɔr aah kan kina na, le u ki len Semaya chee, le ki bui ke, “Baah kii ke bi tun taani na kan, maan kuln bi. Sisak yaa tee nan tak bi kan, siib le ga ti gur. Maan cha Jerusalem ji maaŋuul mɔk aafalaa.

⁸ Tɔ, Sisak tee ga nyaŋ bi le bi bee ke bi yaa dii mi kan, ni ŋan jer ke bi li dii dulnyaa wee ni aajojoob.”

⁹ Ubɔr Sisak nan fuu ni Jerusalem ni, le ki yoor Uwumbɔr Aadichal ponn ni, ni libɔrdichal ni aawangol. U nan yoor tiwan mɔmɔk. U nan kpaan yoor salmaa aajaak aapen ŋi Ubɔr Solomonn nan ŋa na.

¹⁰ Rehoboam nan ŋa tikumann aapen le ki di leŋ ŋima ngbaan aaleleŋ, le ki di ti ŋa bininkpiib bi kiir libɔrdichal aabisamɔi na aaŋaal ni.

¹¹ N‑yoonn mumɔk ubɔr nan cha Uwumbɔr Aadichal ni na, bikikiib ngbaan nan joo ŋipen ngbaan le ki dii u buen, ki nan ki giin ŋi bikikiib aadiik ni.

¹² Waah nan sunn ubaa taab tii Uwumbɔr na, Uwumbɔr aaŋuul aa nan kuln u pel pel, le Juda aatiŋ nan ki ŋaŋ.

Rehoboam aanaan aabɔr mɔmɔk aah ye pu na

¹³ Rehoboam aah nan ye ubɔr na, u nan ka Jerusalem ni le ki moo kan nnaan aapɔɔn. U nan ye ŋibin imonko ilee ni libaa le ki jin nnaan. U nan ye ubɔr ki bi Jerusalem ni ki ti saa ŋibin kipiik ni ŋilole. Jerusalem le nan ye Israel aapepel mɔmɔk ni aatiŋ ki Uwumbɔr nan lee ke bi li dooni u nima chee na. Rehoboam aana aayimbil le nan ye Naama. Naama nan ye Amonn aatiŋ aanii la.

¹⁴ Rehoboam nan tun ni kaa ŋan na, ba pu? waa nan pɔɔn ubaa ke u ŋa Uwumbɔr aageehn.

¹⁵ Rehoboam aah nan piin waatuln pu na ki ti saa ndoon na bi tigbann ti Uwumbɔr aabɔnabtiib Semaya ni Ido nan ŋmee na ni la. Rehoboam ni Jeroboam nan jaa kpakpaayuk la.

¹⁶ Rehoboam nan kpo, le bi sub u bibɔrb aacheek ni, David Aatiŋ ni. Le ujapɔɔn Abija nab waanaan pu.