2 Bibɔrb Aabɔr 11 - Uwumbɔr aagbaŋ

Semaya aah nan nabr tibɔr ti na

¹ Ubɔr Rehoboam aah ti fuu Jerusalem ni na, le u kuun Benjaminn ni Juda aanibol aatɔb aajab ŋichur nkub ni imonko inaa bi nyi butɔb aabɔr mbamɔm na. Waalandak le nan ye ke u di bi buen ti to Israel aanibol ŋi bi ŋŋangan wɔb na butɔb, ki ki gaa nima chee ŋa uŋaal ni.

² Le Uwumbɔr nan di inaŋ imina tii waabɔnabr Semaya

³ ke u di tii Ubɔr Rehoboam, ni Benjaminn, ni Juda aanibol ngbaan ke,

⁴ “Taa tak nido yaab Israel yaab biken man. Ni mɔmɔk li chaa kun man. Maageehn pu le tiwan ni ŋa na ŋa.” Bi nan kii Uwumbɔr aamɔb le kaa ki buen ti tak Jeroboam.

Rehoboam aah maa ŋigon kiir ntim mu na aabɔr

⁵ Rehoboam nan bee Jerusalem ni, le ki maa ŋigon kiir Juda ni Benjaminn aatim mumina:

⁶ muma le ye Betlehem, ni Etam, ni Tekoa,

⁷ ni Bef Sur, ni Soko, ni Adulam,

⁸ ni Gaf, ni Maresa, ni Sif,

⁹ ni Adoraim, ni Lakis, ni Aseka,

¹⁰ ni Sora, ni Aijalonn, ni Hebronn.

¹¹ U nan cha mu kpa tijawan mbamɔm le ki ban butɔb aajab aaninkpel kaan kitiŋ mɔk ni. U nan cha kitiŋ mɔk ni kpa tijikaar, ni olif aakpan, ni ndaan,

¹² ki kpee kijaak aapen, ni tikpaatunn. U nan ŋa kina le ki ŋmaa joo Juda ni Benjaminn aanibol.

Bitotoorb ni Liifai yaab aah fuu ni Juda pu na

¹³ Bitotoorb ni Liifai yaab nan nyan ni Israel aapepel mɔmɔk ni, ki dan ŋŋangii wɔb, Juda ni.

¹⁴ Naah nan ŋa pu aan bi di cha baawakor aamoŋmɔpaan ni ntim muken ki dan Juda ni na le ye ke Israel Aabɔr Jeroboam ni bibɔrb bi nan paan u pu nnaan ni na aan cha bi tun baatuln li ye Uwumbɔr aatotoorb na aatuln.

¹⁵ Jeroboam nan ban ubaa aatotoorb le bi dooni binib bi kaa dii Uwumbɔr na aawaa, ni ŋiwaa ŋi u naan aan ŋi bi ke iŋoob ni inaajabi na.

¹⁶ Binib bi mɔmɔk nan ban bi dii Israel yaab Aadindaan Uwumbɔr mbamɔm na, nan dii Liifai yaab ngbaan buen Jerusalem nin chee bi ga ti ŋmaa toor kitork tii biyaajatiib Aadindaan Uwumbɔr na.

¹⁷ Nimina nan cha Juda aanaan pɔɔk, le bi nan si Solomonn aajapɔɔn Rehoboam aachaŋ ni ki ti saa ŋibin ŋitaa ki bi ke baah nan bi Ubɔr David ni Ubɔr Solomonn aayoonn pu na.

Rehoboam aadichal aabɔr

¹⁸ Rehoboam aapuu le nan ye David aajapɔɔn Jerimof aabisal u bi nan yin u ke Mahalaf na. Mahalaf aana le nan ye Eliab aabisal Abihail. Abihail aayaaja le nan ye Jese.

¹⁹ Bi nan ma mbijabim mutaa la. Bima le ye Jeus, ni Semaria, ni Saham.

²⁰ Puwɔb le u nan ki yoor Maaka, u aate nan ye Absalom na. U ni u mu nan ma mbijabim munaa la. Bima le ye Abija, ni Atai, ni Sisa, ni Selomif.

²¹ Rehoboam aapuutiib nan ti kpaan kipiik ni biniin la, le u kpa puutiib waatiir mu imonko itaa. Ujapɔtiib nan ye moninko ni biniin la, le ubisatiib mu ye imonko itaa. Upuutiib mɔmɔk ponn ni u nan gee Maaka le jer bi mɔmɔk,

²² le ki neen ujapɔɔn Abija jer waabim mɔmɔk. U nan lee uma le ke u nan kal waabɔrjal pu.

²³ Rehoboam nan di nlan le ki tii ujapɔtiib mɔmɔk lituln ki di bi kaan kaan Juda ni Benjaminn aatim mu kpa tijawan na mɔmɔk ni. U nan cha bi mɔmɔk kpa baah gee pu na, le ki kan bipiib pam tii bi mɔmɔk.