2 Bibɔrb Aabɔr 10 - Uwumbɔr aagbaŋ

Ŋŋangan wɔb aanibol aah yii Ubɔr Rehoboam pu na

¹ Rehoboam nan buen Sekem, nin chee Israel aanib bi mɔmɔk bi ŋŋangan wɔb na nan kuun ke bi kaan u nnaan na.

² Nebat aajapɔɔn Jeroboam, u nan san buen Ijipt aatiŋ ni, Ubɔr Solomonn pu na, aah nan ŋun tibɔr ngbaan na le u gir kun ni.

³ Ŋŋangan wɔb aanibol ngbaan aanib nan tun yin ni u, le bi mɔmɔk buen Rehoboam chee ki ti bui u ke,

⁴ “Aate nan muk timi sakpen a. Aa yaa ga bar aate aamuk ngbaan pu aan mbimbin taa ki li pɔɔ tii timi kan, ti ga li ye saatutum mbamɔm.”

⁵ Rehoboam nan bui bi ke, “Tii mi iwiin itaa aan m dakl lik. Iwiin itaa ngbaan yaa jer kan, ni gir ni.” Le binib ngbaan siir.

⁶ Ubɔr Rehoboam nan ti ŋoon bininkpiib bi nan ye ute Solomonn aasusurb na pu. U nan baa bi ke, “M ga gar binib ngbaan kinye?”

⁷ Le bi bui u ke, “Aa yaa kpa binib bee pu tiŋann ki tii bi ngarm mu ga piir bisui na kan, bi ga li dii si mbamɔm.”

⁸ Tɔ, u nan yii bininkpiib ngbaan aasurm le ki labr buen u ni binachipɔm bi nan kpaan tinachipɔnn na chee. Bima le u nan di ŋa waasusurb.

⁹ U nan bui bi ke, “Ni ga sur mi kinye? M ga bui binib bi bi mee mi ke m bar baamuk pu tii bi na kinye?”

¹⁰ Le bi gar u ke, “Saah ga bui bi pu na sɔ: ‘Maaŋanbiseeŋ filk jer nte aachaŋ.’

¹¹ Bui bi ke, ‘Nte nan di ŋitun ŋi nyuun na le tun nimi, le m ma ga tun nimi ŋi nyuun jer kina na. U nan joo ibanbaan le gbaa nimi; le m ma ga loe nimi ŋinaalab.’”

¹² Iwiin itaa aapuwɔb le Jeroboam ni binib ngbaan mɔmɔk nan gir buen Ubɔr Rehoboam chee, waah nan bui bi pu na.

¹³ Ubɔr ngbaan nan yii bininkpiib na aasurm le ki len binib ngbaan chee gala gala,

¹⁴ binachipɔm na aah nan sur u ke u len pu na. U nan len ke, “Nte nan di ŋitun ŋi nyuun na le tun nimi; le m ma ga moo tun nimi ŋi nyuun jer kina na. U nan joo ibanbaan le gbaa nimi, le m ma ga loe nimi ŋinaalab.”

¹⁵ Ni nan ye Bidindaan Uwumbɔr aageehn le ke waah nan cha waabɔnabr Ahija u nyan ni Silo aatiŋ ni na tuk Nebat aajapɔɔn Jeroboam tiwan ni ga ŋa na. Nima pu le ubɔr nan yii, kaa pel binib ngbaan aah nan len pu na.

¹⁶ Binib ngbaan aah ti bee ke ubɔr aan ŋun tii bi na, le bi teen mpɔɔn pu ke, “David mu ni waadichal. Ni ye ba aan bi kee ŋa tii timi? Israel yaab, cha ti kun man. Cha Rehoboam li joo ubaa man.” Kina le Israel aanib nan yakr,

¹⁷ ki cha Rehoboam gur ye Juda aanib aapepel baanja aabɔr.

¹⁸ Le Ubɔr Rehoboam nan tun Adoniram, u nan ye binaagbiib aayidaan na, ke u buen Israel yaab chee, le bi ti yur u ŋitakpal u ti kpo. Nimina pu le Rehoboam ŋa mala ki koo waataan aatɔroku ni ki san buen Jerusalem aatiŋ ni.

¹⁹ Ki nyan liyaadaal ngbaan, Israel aanibol ŋi bi ŋŋangan wɔb na aanaan, ni Ubɔr David aadichal aanaan aa nan ki ŋmaa kpaan.