1 Samuel 9 - Uwumbɔr aagbaŋ

Sɔɔl aah kan Samuel pu na

¹ Uwankpadaan ubaa nan bi n‑yoonn ngbaan, bi nan yin u ke Kis, u ye Benjaminn aanibol aanii la. Ute le nan ye Abiel, le uyaaja ye Seror, ki ye Bekoraf aadiik ni aanii, ki ye Afia aataŋaal ponn ni aadichal.

² U nan kpa japɔɔn ubaa bi yin u ke Sɔɔl. Sɔɔl nan ye unachipɔɔn u ŋan na la, le ki nan paa Israel yaab aanii mɔmɔk pu liyil, le ki ŋan jer bi mɔmɔk.

³ Kis aabon ibaa le nan wɔŋ, le u bui Sɔɔl ke, “Di maatutum ponn ni ubaa buen ti ban maabon ngbaan.”

⁴ Bi nan buen Efraim aatiŋ ki ŋigongon wiir nima na, ni Salisa aapepel wɔb, le kaa kan i, kina pu le bi nyan nima ki buen Saalim aapepel mu, le kaa kan i nima mu. Le bi bɔ dii Benjaminn aapepel ponn ni, le kaa ki kan i.

⁵ Baah nan ti fuu Suf aapepel na, le Sɔɔl bui waatutum ngbaan ke, “Cha ti gir kun linampal, naa yee kina kan, nte ga li gur dak ti pu la. Waan ki li dak ibon ngbaan pu.”

⁶ Le ututunn ngbaan gar u ke, “Cha m dan waahr. Uja ubaa bi kitiŋ kee ponn ni ki ye Uwumbɔr aanii, le binib mɔmɔk nyuŋni u; ba pu? waah len pu na mɔmɔk gbiini la. Cha ti buen u chee; nibaakan u ga ŋmaa mɔk timi nin chee ibon ngbaan bi na.”

⁷ Le Sɔɔl baa ke, “Ti yaa buen u chee kan, ti ga ti tii u ba? Tijikaar tibaa aa ki gur timi aatuln ponn ni, le taa ki kpa nibaa mu, aan ti kpa ba?”

⁸ Le ututunn ngbaan gar u ke, “M kpa tikunabr aamombil siib. M ga ŋmaa di ŋima tii u, le u ga mɔk timi taah ga kan i nin chee na.”

^9-11 Le Sɔɔl kii u ke, “Ti ŋan. Ti li cha.” Le bi siir buen kitiŋ ki ponn ni Uwumbɔr aanii ngbaan koo na. Baah bi joi ligongoln ki cha kitiŋ ngbaan ni na, le bi ton bisapɔm bibaa nsan ni, bi nan cha bi ti lu nnyun. Le bi baa bisapɔm ngbaan ke, “Ukakann na bi kitiŋ ni ii?” N‑yoonn ngbaan bi nan yin Uwumbɔr aabɔnabr ke ukakann la, kina pu na, unii yaa nan ban u baa Uwumbɔr mbaa kan, u ga bui le ki, “Cha ti buen ukakann na chee.”

^12-13 Le bisapɔm ngbaan kii bi ke, “Een, u bi. Mbamɔn, uma le kpaan bi nimɔb pu na. Ni yaa chuun mala kan, ni ga pii u nsan ni. Ni yaa ti kpaan koo kitiŋ ponn ni kan, ni ga kan u. Din wee le u fuu ni kitiŋ ni do; ba pu? binib ngbaan ban bi toor kitork, kitork aabimbiln paab ligongoln pu la. Baah yin ni binib bi na aan ŋmaa piin tijikaar aajim see u fuu nima waahr, ba pu? uma le ga mee Uwumbɔr kitork ngbaan pu. Ni yaa buen dandana wee kan, ni ga kan u waahr aan u nin buen ligongoln pu ke u ti ji.”

¹⁴ Le Sɔɔl ni waatutunn siir cha kitiŋ ngbaan ponn ni. Baah ban bi koo ki ponn ni na, le bi kan Samuel chaa nyan ni, ki bi nsan pu, ki cha nin chee bi ga ti doon Uwumbɔr na.

¹⁵ Ki nin woln bundaal aan Sɔɔl kan Samuel na, Uwumbɔr nan bui Samuel ke,

¹⁶ “Fen kinakokoona, m ga fe tun ni uja ubaa aa chee. U nyan ni Benjaminn aanibol ponn ni la. Toor u ki di u kaan nnaan, u li joo maanib Israel yaab. Le u ga gaa bi Filistia yaab chee lii. M kan maanib ngbaan aafalaa, ki ŋun baah wii pu ki ban nterm na.”

¹⁷ Samuel aah yaar tuu Sɔɔl pu na, le Uwumbɔr bui u ke, “Uja wee le m tuk si waabɔr na. Uma le ga joo maanib.”

¹⁸ Le Sɔɔl buen Samuel u nan si gbɔk mbisamɔb na chee, le ki bui u ke, “Uninkpel, mɔk mi ukakann na aah koo nin chee na.”

¹⁹ Le Samuel gar u ke, “Min le ye ukakann ngbaan. Loln man m pu nsan, ki li cha nin chee bi dooni Uwumbɔr na. Nimi bilee ngbaan ga ji m chee tijikaar din wee. Fen kichakpiik ni, le m ga fe gar mbaan mumɔk ni kpa ke ni baa mi na, ki nin cha ni li chaa kun.

²⁰ Ni yaa gur ibon i nan wɔŋ iwiin itaa i jer na aabɔr kan, taa cha ni li muk nimi; bi kan i a. Tɔ, ŋma aan Israel aanib ban sakpen? Ni ye sin la, sin ni aate aadichal.”

²¹ Le Sɔɔl gar u ke, “M ye Benjaminn aanibol ni aanii la, le linibol ngbaan mu le ye li par sakpen Israel aanibol mɔmɔk ponn ni na. Le maadichal mu le aa ki kpa liyimbil linibol ngbaan ponn ni. Kina pu na, ni ŋa kinye aan aa len m chee tibɔr tee aaboln?”

²² Le Samuel di Sɔɔl ni waatutunn ngbaan koo kidisakpeŋ kibaa ponn ni, le ki tii bi bininyuum aakakaa chee ŋijal, nin chee bicham ga nan li pii piitaa ki ka na.

²³ Le Samuel bui usaamɔnn ke, “Li joo ni linankpiln li m ba di tii si ke aa di bil mi na.”

²⁴ Le usaamɔnn ngbaan ti joo ni linankpiln li ye litaal aanann na, ki nan di siin Sɔɔl aanimbiin ni. Le Samuel bui Sɔɔl ke, “Lik, linankpiln li m ba di bil si na sɔ. Ŋmɔ li. M lee li bil si ke aa ni maacham bee nan kpaan aan aa ŋmɔ li.” Le Sɔɔl ni Samuel nan kpaan ki jin tijikaar liyaadaal ngbaan.

²⁵ Baah fii nima ki buen kitiŋ ponn ni na, le bi tii Sɔɔl ndɔdooyaan kidiik paab, le u doon nima.

Samuel aah gor Sɔɔl ke u di u kaan nnaan pu na

²⁶ Kichakpinaanyeek ni le Samuel yin Sɔɔl kidiik aapaacham nima ke, “Fii, aan m chɔi si.” Le Sɔɔl fii, le u ni Samuel kpaan buen kitiŋ ponn ni.

²⁷ Baah ti ban bi nyan kitiŋ ngbaan ni na, le Samuel bui Sɔɔl ke, “Bui ututunn ngbaan ke u loln ti pu nsan ki li cha.” Le ututunn ngbaan siir, le Samuel ki bui Sɔɔl ke, “Sil do siib, aan m bui si Uwumbɔr aah len pu na.”