1 Samuel 8 - Uwumbɔr aagbaŋ

Israel aanib aah ban ubɔr pu na

¹ Samuel aah nan ti por na, le u di ujapɔtiib ŋa bibɔlem Israel yaab ponn ni.

² Bi nan yin ujapɔpol ke Joel, le ki yin uwaatiir mu ke Abija. Bi nan ye bibɔlem Beerseba ponn ni la.

³ Bi mu aa nan tee dii bite aasan. Baalandak nan ye le ke bi kan ŋimombil, kina pu na, bi nan gaal igaŋgaŋlik, kaa nan ji tibɔr mbamɔm.

⁴ Le Israel aayidam mɔmɔk kuun tɔb, ki di buen Samuel chee Rama aatiŋ ni,

⁵ le ki ti bui u ke, “Lik, aa bi por la, le aajapɔtiib mu aa dii saasan. Kina pu na, nyan ubɔr u ga li joo timi na, aan ti mu li kpa ubɔr ke ntim muken aah kpa pu na.”

⁶ Baah nan ban pu na aa nan piir Samuel aasui, kina pu le u mee Uwumbɔr,

⁷ le Uwumbɔr bui u ke, “Ŋun binib ngbaan aah len pu na mɔmɔk. Naa ye sin le bi yii, min le bi yii ke maa ye baabɔr.

⁸ Ki nyan n‑yoonn mu m nyan ni bi Ijipt na, le bi fenn bipuwɔb tii mi, ki dooni ŋiwaa, le dandana wee bi bi ŋani si tiwan ni bi ŋani mi n‑yoonn mɔmɔk na.

⁹ Kina pu na, ŋun tii bi, ki tee sak bi, ki kpiir tuk bi baabɔr ngbaan aah ga nan li ŋani bi pu na.”

¹⁰ Le Samuel bui binib bi nan dan nan bui u ke u nyan ubɔr tii bi na Uwumbɔr aah len pu na mɔmɔk.

¹¹ Samuel nan kpiir tuk bi ke, “Kina le nimi aabɔr ngbaan ga nan li joo nimi: u ga di nijapɔtiib ŋa butɔb aajab; bibaa ga li ye butɔb aataan aatɔroku aatutum, biken mu ga li ye waatɔb aajab bi dik itaan pu na, le biken mu ga loln waataan aatɔroku mam pu nsan ki san.

¹² Bibaa ga li ye bijab lichur aaninkpiib, le biken mu ye bijab piiŋmu aaninkpiib. Nijapɔtiib le ga ko waakpaakon ni, ki chee waajikaar, ki mɔɔ waajawan, ni waataan aatɔroku mam aawan.

¹³ Nibisatiib le ga li ŋani waatulalee mam, ki li ye waasaamɔm, ni bi ŋani maab na.

¹⁴ U ga gaa nimi aakpaakon i ŋan na, ni ŋisubil aakpaakon i ŋan na, ni ŋikpan aasui i ŋan na ni chee, ki di tii waatun aaninkpiib.

¹⁵ U ga nan gaa nimi aajikaar ni ndaan aasubil ŋigetek kipiik mɔmɔk ponn ni libaa, ki di tii waachiln ni aaninkpiib, ni bininkpiib bi gur na.

¹⁶ U ga nan gaa nimi aanaagbiib, ni nimi aanaa, ni ibon i ŋan na le ni li tun waatun.

¹⁷ U ga nan gaa nimi aawakor ŋigetek kipiik mɔmɔk ponn ni libaa. Le nimi nibaa ga ŋa waanaagbiib.

¹⁸ N‑yoonn ngbaan yaa nan fuu ni kan, ni ga li wii nimi aabɔr u nimi nibaa lee u na aah ŋani nimi pu na, le Uwumbɔr aan gar nimi.”

¹⁹ Binib ngbaan aa nan pel Samuel aah len pu na, le ki bui ke, “Aayii. Ti ban ubɔr la,

²⁰ aan ti mu li bi ke ŋitimbol ŋiken na, ki kpa tibaa aabɔr u ga li joo timi, ki loln ti pu nsan butɔb ni na.”

²¹ Le Samuel nan pel baah len pu na mɔmɔk, le ki buen ti bui Uwumbɔr.

²² Le Uwumbɔr gar u ke, “Ŋa baah ban pu na, ki tii bi ubɔr.” Le Samuel bui Israel aajab ngbaan mɔmɔk ke bi gir kun.