1 Samuel 6 - Uwumbɔr aagbaŋ

Baah di Uwumbɔr Aakaal Aadakaa giin pu na

¹ Uwumbɔr Aakaal Aadakaa aah nan bi Filistia yaab aatiŋ ponn ni ki ti saa iŋmal ilole aapuwɔb na,

² le binib ngbaan yin ni bitotoorb, ni binib bi joo inyɔk tun lituln na, ki nan baa bi ke, “Ti ga ŋa Uwumbɔr Aakaal Aadakaa ngbaan kinye? Ti yaa di u ke ti di giin waah nyan ni nin chee na kan, ti ga di ba kpee u pu ki di u giin?”

³ Le bi bui ke, “Ni yaa ga giin Israel yaab Aawumbɔr Aadakaa kan, ni ŋan ke ni tii ipiin i ga ti pa nimi aatunwanbir pu na. Dakaa ngbaan aan ŋmaa gir iŋaalkuun. Ni yaa ŋa kina kan, ni ga pɔɔk, le ni ga bee naah ŋa pu aan u dar nitafal na.”

⁴ Le binib ngbaan baa ke, “Ba aapiin aan ti ga di tun?” Le bi bui ke, “Salmaa ŋisayik aanaŋ ŋiŋmu, ni salmaa ŋichakpelar aanaŋ ŋiŋmu, ubaa mɔmɔk le si Filistia yaab aabɔr ubaa mɔmɔk aasisii. Tibɔbir baan ngbaan le u nan di tun tii ni mɔmɔk, ni bibɔrb biŋmu ngbaan mu pu.

⁵ Ni di salmaa naan ŋichakpelar ngbaan, ni ŋisayik ŋi bii nimi aatiŋ aajikaar na, ki di bunyuŋ tii Israel yaab Aawumbɔr. Nibaakan u ga di cha, kaan ki daa nimi, ni nimi aawaa aatafal, kaan ki bii nimi aatiŋ.

⁶ Ba ŋa nitafal pɔɔ ke Ijipt aabɔr ni waanib aatafal aah nan pɔɔ pu na? Taa suln man Uwumbɔr aah nan ŋa bi falaa aan ki ti nin cha Israel yaab nyan baatiŋ ponn ni pu na.

⁷ Kina pu na, ŋa man inaa aatɔroku pɔɔn, ki ban inaa ilee i baa kee cha i dar tɔroku daalbaadaal na, ki di tɔroku ngbaan tul i pu, ki jenn giin yaanaabi koon kinaabak ponn ni.

⁸ Yoor man Uwumbɔr Aakaal Aadakaa di tɔŋ tɔroku ngbaan pu, ki di salmaa aawan aapiin i ni joo tun nimi aatunwanbir pu na ŋa dakaa ponn ni, ki di siin gbaŋ Uwumbɔr Aakaal Aadakaa ngbaan, ki cha inaa ngbaan li dar tɔroku ngbaan cha, ubaa taa dii i,

⁹ ki li si lik i, i li cha; i yaa di toŋ Bef Semes aatiŋ ni kan, ni mɔk ke Israel yaab Aawumbɔr le tun ni nimi tibɔbir sakpen ngbaan. I yaa kaa toŋ nima kan, ti ga bee ke naa ye uma le tun ni tibɔbir ngbaan, ti dan tibaa pu la.”

¹⁰ Bi nan ŋa baah mɔk bi ke bi ŋa pu na: bi nan chuu inaa ilee le ki di tɔroku ngbaan tul i pu, le ki di inaabi laŋ kinaabak ponn ni.

¹¹ Bi nan di Uwumbɔr Aakaal Aadakaa ngbaan ni dakaa u kpa salmaa aawan ngbaan na ŋa tɔroku ngbaan ponn ni.

¹² Inaa ngbaan nan siir le ki di toŋ Bef Semes ki kpaa tok ki, kaa par nsan ni nibaa chee. I nan cha le ki wooni. Filistia aabɔrb biŋmu ngbaan nan dii i ki ti saa Bef Semes aatiŋ mɔk.

¹³ Bef Semes yaab nan bi chee tijikaar kifataŋ ponn ni, le ki yaar lik ki kan Uwumbɔr Aakaal Aadakaa ngbaan. Baah nan kan u na, le ni mɔɔr bi naa ti sɔ.

¹⁴ Le inaa ni tɔroku ngbaan di nan fuu bukpaab bubaa ni, bu nan ye uja u bi yin u ke Josua aan u koo Bef Semes ni na aakpaab la, le ki sil nima litakpasakpeln libaa chee. Le binib ngbaan chuu gaa nyan ŋikpan aatɔroku ngbaan ki kɔr inaa ngbaan toor kitork ki di see mmii ni tii Uwumbɔr.

¹⁵ Le Liifai yaab chuu nyan Uwumbɔr Aakaal Aadakaa, ni dakaa u kpa salmaa aawan na mu, le ki di bi toŋ litakpasakpeln ngbaan pu. Le Bef Semes aanib toor kitork ki di see mmii ponn ni, ni kitork kiken, tii Uwumbɔr.

¹⁶ Filistia aabɔrb biŋmu ngbaan nan si lik bi, le bi ŋa ni mɔmɔk ti doo, le bi gir kun Ekronn liyaadaal ngbaan.

¹⁷ Filistia yaab aah nan tii Uwumbɔr salmaa aachakpelar aanaŋ aawan niŋmu ni ke ipiin i ga pa baatunwanbir pu na, nan si ntim muŋmu mue: Asdod, ni Gasa, ni Askelonn, ni Gaf, ni Ekronn aasisii la.

¹⁸ Bi nan ki tii salmaa aasayik ŋiŋmu mu, libaa mɔmɔk nan si tii ntim mu Filistia aabɔrb biŋmu na nan joo mu na la, mu bi nan maa ŋigon gob na, ni itingbaan i kaa kpa ŋigon na. Litakpasakpeln li pu bi nan di Uwumbɔr Aakaal Aadakaa toŋ, aan li bi Josua u koo Bef Semes aatiŋ ponn ni na aakpaab ni na, beenin bi nima din wee ki ye seeraa.

¹⁹ Uwumbɔr nan ku Bef Semes aajab imonko itaa ni kipiik, ba pu? bi nan lik Uwumbɔr Aakaal Aadakaa ngbaan ponn ni la. Le binib ngbaan nan wii ikpowiil, Uwumbɔr aah tun bi litusakpeln pu na.

Uwumbɔr Aakaal Aadakaa aah kun Kiriaf Jearim pu na

²⁰ Kina pu le Bef Semes aajab bui ke, “Ŋma ga ŋmaa sil Tidindaan Uwumbɔr u bi chain na aanimbiin ni? Ti ga di dakaa ngbaan buen la chee ki cha tibaa?”

²¹ Le bi tun binib Kiriaf Jearim aanib chee ke bi ti len ke, “Filistia yaab di Uwumbɔr Aakaal Aadakaa giin ni. Dan ki nan yoor u man.”